ABŞ-Türkiyə münasibətlərində olan gərginliklə bərabər artıq xeyli vaxtdır ki, Türkiyə Avropa İttifaqı arasında da soyuqluq davam edir.

Bu sözləri Axar.az-a açıqlamasında beynəlxalq əlaqələr üzrə ekspert Elşən Mustafayev deyib. O bildirib ki, müxtəlif sahələrdə Avropa ilə həmişə geniş əməkdaşlığı olmuş Türkiyənin bu soyuqluğun aradan qaldırılmasında marağı böyükdür:

“Amma rəsmi Ankara münasibətlərin davam etməsi üçün hər hansı şərtlərin olmasını yolverilməz sayır. Əslində indiki vəziyyət Aİ ölkələri üçün də arzuolunan deyil. Bu situasiyadan onlar da zərər görür. Ərdoğanın Aİ-nin əsas dövləti olan Almaniyaya səfəri böyük ehtimalla hər iki tərəfdən əlaqələrin bərpasına hədəflənib. Hesab edirəm ki, öncədən hansısa məsələlərdə ilkin razılığa gəlinib ki, bu səfərin baş tutması reallaşıb”.

Ekspert vurğulayıb ki, Yaxın Şərq qaçqınlarının Avropaya kütləvi axınının qarşısında duran Türkiyədən uzun müddət aralı qalmaq nəticədə bu problemi Avropada həlli mükün olman səviyyəyə çatdıra bilər:

“Son vaxtlar Rusiya-Türkiyə arasında baş verən yaxınlaşmalar, İdliblə bağlı razılaşma və bu razılaşmanın artıq işləməyə başlaması da Qərbi çox narahat edir. Düşünürəm ki, bu səfərdə, ola bilsin ki, ABŞ da maraqlı olsun. Çünki Tramp Adminstrasiyası birbaşa danışıqlarda hələlik iştirak etməmək üçün Avropadakı əsas partnyoru Angela Merkel vasitəsilə danışıqları irəli aparmaq istəyir. İstənilən halda Ərdoğana hansısa şərtlər irəli sürmək və ya təzyiq etmək üçün Almaniyaya dəvət etməyiblər. Əminəm ki, ilkin olaraq müəyyən məsələlərdə razılaşmaların olacağı səbəbindən dəvət ediblər. Əks halda Türkiyə prezidenti bu səfərə razılaşmazdı”.

Twitter