ATƏT-in Minsk qrupunun son bəyanatından sonra Paşinyan “B planı” üzərində düşünməyə başlayıb.

Axar.az xəbər verir ki, bu iddia ilə “Past” qəzeti çıxış edib. Məqalədə bildirilib ki, gələcəkdə hansısa xoş olmayan proseslər başlamayacağı halda Paşinyan “günah keçisi” axtaracaq və bu işdə əsas günahkar kimi Xarici İşlər naziri Zöhrab Mnatsakanyanı göstərəcək:

“Bu, Paşinyana iki imkan yaradacaq: Birincisi o, XİN rəhbərini dəyişib, zaman udacaq, ikincisi isə o, günahların hamısını Mnatsakanyanın üzərinə yükləyəcək”.

Qeyd edək ki, ATƏT-in Minsk Qrupu Qarabağ konflikti ilə bağlı bəyanat yayıb. Bəyanatda həmsədrlər Ermənistan və Azərbaycan liderlərinin danışıqlar keçirmək barədə niyyətini alqışlayıblar. Həmsədrlər bəyanatda konfliktin həllinin Helsinki Yekun Aktının əsas prinsiplərinə, o cümlədən güc tətbiqindən yayınmaq, ərazi bütövlüyü, xalqların öz müqəddəratını təyinetməsinə əsaslanmalı olduğunu bildiriblər:

“Bu, həmçinin 2009-2012-ci illərdə həmsədr ölkələrin prezidentləri tərəfindən təklif edilən əlavə elementləri də ehtiva etməlidir: Dağlıq Qarabağ ətrafındakı ərazilərin Azərbaycanın nəzarətinə qaytarılması, Dağlıq Qarabağa təhlükəsizliyi və özünüidarəetməni təmin edən müvəqqəti status verilməsi, Ermənistanı Dağlıq Qarabağla birləşdirən dəhlizin, Dağlıq Qarabağın yekun hüquqi statusunun müəyyən edilməsi, qaçqınların və məcburi köçkünlərin öz yaşayış yerlərinə qayıtma hüququnun və sülhməramlı qüvvələrin yerləşdirilməsinin təmin edilməsi”.

Bu bəyanatın ardınca Ermənistan Baş naziri Nikol Paşinyan Dağlıq Qarabağa səfər edib.

Twitter