 |
|
Azərbaycan Ordusunun 44 günə zəfərlə bitirdiyi Vətən müharibəsində torpaqlarımızın işğaldan azad edilməsində xüsusi qəhrəmanlıq dastanı yazan igidlərimizdən biri də şəhid tağım komandiri Elçin Tağıyevdir.
Elçin Ağaqulu oğlu Tağıyev 1989-ci il iyulun 1-də Biləsuvar rayonunun Zəhmətabad kəndində anadan olub. 1995-ci ildə həmin kənddəki orta məktəbin birinci sinfinə gedib. Hərbə uşaq yaşlarından maraq göstərən E.Tağıyev 2004-cü ildə 9-cu sinfi bitirərək Cəmşid Naxçıvanski adına Hərbi Liseyə daxil olub. Bu hərbi məktəbi də əla qiymətlərlə bitirərək 2007-ci ildə Ali Hərbi Məktəbə daxil olub və zabit kimi hərbi xidmət fəaliyyətinə başlayıb.
"Ölkə.Az" bildirir ki, “Report”un Muğan bürosu onun qəhrəmanlıq hekayəsinə bir daha işıq salmaq üçün onun Biləsuvar rayonunun Zəhmətabad kəndindəki ata ocağına üz tutub.
Əsgərləri Elçini qayğıkeş komandir kimi xatırlayır. Hər bir əsgərinə xüsusi diqqət göstərər, şəxsi heyətin sağlamlığını nəzarətdə saxlayardı. Onu sevdirən də elə bu xüsusiyyətləri idi. Döyüş meydanında da bir an belə tərəddüd etmədən əsgərlərini təhlükədən qurtarar, özünü düşünməzdi. Bir neçə uğurlu əməliyyatda iştirak edən 31 yaşlı şəhid kapitan Elçin Tağıyev 17 nəfərlik düşmən qrupunun məhv edilməsində xüsusi qəhrəmanlıq göstərib.
Hərbi həkim olan qardaşı Yalçın Tağıyev deyir ki, Elçinlə eyni istiqamətdə döyüşüblər: "Hər gün bir-birimizdən xəbər tuturduq. Sonuncu dəfə oktyabrın 1-də danışdıq. Sonra Elçinin taboru Talış istiqamətində gedən döyüşlərə qatıldı. Həmin döyüşlər zamanı yaralansa da, ilk növbədə yaralı əsgərlərin çıxarılmasını əmr edib. Uzun sürən xilasetmə əməliyyatında kapitan Elçin Tağıyev şəhid olub.
Şəhidin anası Ayna Tağıyeva iki hərbçi oğlundan birini, böyük övladını müharibədə itirsə də, övladının igidliyi ilə fəxr edir: "Oğlum üzümü ağ edib, düşmən qarşısından geri çəkilməyib. Ölümündən əvvəl ona mayor hərbi rütbəsi verilmişdi. Özündən sonra üç övladı yadigar qalıb".
Qeyd edək ki, Prezident İlham Əliyev "Azərbaycan Respublikası Silahlı Qüvvələrinin hərbi qulluqçularının təltif edilməsi haqqında" sərəncam imzalayıb. Sərəncamla bir sıra hərbi qulluqçular “Qarabağ” ordeni ilə təltif ediliblər. Onlardan da biri şəhid kapitan Elçin Ağaqulu oğlu Tağıyevdir.
Azərbaycan Ombudsman aparatı sosial media hesabında erməni təcavüzkarlarının vandalizm aktlarını əks etdirən fotolar paylaşıb.
Fotolara belə bir şərh verilib:
"Yüz minlərlə azərbaycanlı Ermənistan siyasi rəhbərliyinin dəstəyi ilə radikal erməni millətçiləri tərəfindən həyata keçirilən 10 illik Azərbaycanafobiya nəticəsində insanlığa qarşı etnik təmizləmə və soyqırım kimi cinayətlərin qurbanına çevrilib".
Daxili İşlər Nazirliyinin Gədəbəy Polis Şöbəsinin Dövlət Yol Polisi Bölməsinin sabiq rəisi, polis polkovnik-leytenantı Vüqar Hüseynov vəfat edib.
Oxu.Az məlumatına görə, o, uzun sürən xəstəlikdən sonra dünyasını dəyişib.
Bildirilib ki, V.Hüseynov iki ay əvvəl təqaüdə çıxıb.
Paytaxt yolları ilə yanaşı, respublikanın magistral yollarında da stasionar postlar qurulacaq.
Bu barədə AZTV-yə DİN-in şöbə rəisi Elşad Hacıyev açıqlama verib.
O bildirib ki, Bakıdan regionlara gedən yollarda qurulacaq postlar hərəkət iştirakçılarınn müvafiq icazələrinin olub-olmamasını yoxlamaq məqsədlidir.
Ətraflı videoda:
Bu gündən etibarən 2021-ci il 18 yanvar saat 00:00-dək bütün ölkə üzrə sərtləşdirilmiş xüsusi karantin rejimi tətbiq ediləcək.
Azərbaycan Respublikası Nazirlər Kabinetinin müvafiq qərarına əsasən:
- Xüsusi karantin rejiminin sərtləşdirilməsindən irəli gələrək 2020-ci il 14 dekabr saat 00:00-dan 2021-ci il 18 yanvar saat 00:00-dək ölkənin bütün ərazisində Azərbaycan Respublikasının Nazirlər Kabinetinin müvafiq qərarı ilə müəyyən edilmiş iş və xidmət sahələri istisna olmaqla digər sahələrdə iş və xidmətlər dayandırılır. Bütün ticarət obyektlərinə, ictimai iaşə obyektlərinə, o cümlədən restoran, kafe və çay evlərinə müştərilərə yalnız çatdırma xidmətlərinin göstərilməsi və ya onlayn satışa icazə verilir;
- 2020-ci il 14 dekabr saat 00:00-dan 2021-ci il 18 yanvar saat 00:00-dək operativ və xüsusi təyinatlı nəqliyyat vasitələrinin, habelə yükdaşıyan avtomobillərin və Azərbaycan Respublikası Ərazilərinin Minalardan Təmizlənməsi üzrə Milli Agentliyinin nəqliyyat vasitələrinin hərəkəti istisna olmaqla, Bakı, Sumqayıt, Gəncə, Mingəçevir, Şirvan şəhərlərinin və Abşeron rayonunun ərazisinə, eləcə də Lənkəran, Masallı, Cəlilabad, Şəki, Zaqatala, Quba, Xaçmaz, Yevlax, Bərdə, Biləsuvar və İsmayıllı rayon mərkəzlərinə (kənd və qəsəbələr istisna olmaqla) giriş-çıxış dayandırılır;
- 2020-ci il 14 dekabr saat 00:00-dan 2021-ci il 18 yanvar saat 00:00-dək Bakı, Sumqayıt, Gəncə, Mingəçevir, Şirvan şəhərlərinin və Abşeron rayonunun ərazisində, eləcə də Lənkəran, Masallı, Cəlilabad, Şəki, Zaqatala, Quba, Xaçmaz, Yevlax, Bərdə, Biləsuvar və İsmayıllı rayon mərkəzlərində (kənd və qəsəbələr istisna olmaqla) hərəkət məhdudiyyəti tətbiq edilir.
Azərbaycan Respublikası Nazirlər Kabinetinin qərarı əsasında müəyyən edilən siyahı üzrə müvafiq qurumlarda çalışan şəxslər xidməti vəsiqə əsasında, eyni zamanda qərarla müəyyən edilmiş digər təşkilatların və qurumların işçiləri onlar barədə məlumatlar işəgötürən tərəfindən elektron imzadan istifadə edilməklə “icaze.e-gov.az” portalına daxil edildikdən sonra yuxarıda qeyd olunan ərazilərdə hərəkət edə bilərlər;
Müvafiq dövlət qurumları və özəl hüquqi şəxslərin əməkdaşları, habelə bəzi könüllülər təşkilatlarının üzvləri barədə məlumatlar “icaze.e-gov.az” portalına 9 dekabr 2020-ci il saat 10:00-dan etibarən daxil edilməlidir.
- 2020-ci il 14 dekabr saat 00:00-dan 2021-ci il 18 yanvar saat 00:00-dək Bakı, Sumqayıt, Gəncə, Mingəçevir, Şirvan şəhərlərinin və Abşeron rayonunun ərazisində, eləcə də Lənkəran, Masallı, Cəlilabad, Şəki, Zaqatala, Quba, Xaçmaz, Yevlax, Bərdə, Biləsuvar və İsmayıllı rayon mərkəzlərində (kənd və qəsəbələr istisna olmaqla) bütün digər şəxslərin yaşayış yerini və olduğu yeri tərk etmələrinə SMS-icazə sistemi və ya Azərbaycan Respublikası Daxili İşlər Nazirliyinin Növbətçi Hissələri İdarəetmə Xidmətinin 102 Xidməti – Zəng Mərkəzi vasitəsilə ilə icazə verilir.
SMS-icazə sistemi aşağıdakı hallarda tətbiq edilir:
- təxirəsalınmaz tibbi zərurətlə və ya qrafik üzrə müalicə almaqla əlaqədar yaşayış yerini və olduğu yeri tərk etmək üçün (icazə rayon və şəhər daxilində 3 saat müddətinə verilir, rayonlar və şəhərlərarası hərəkət zərurəti yarandıqda olduğu ünvanla getməli olduğu ünvan arasında məsafə və müalicə prosedurunun müddəti nəzərə alınır, geri qayıtma müddəti həkim tərəfindən verilən arayışla müəyyən edilir və zərurət olduqda polis əməkdaşlarına təqdim edilir);
- ərzaq və digər gündəlik tələbat mallarının və dərman vasitələrinin alınması (ərzaq mağazalarından, supermarketlərdən, bazar və aptekdən), dövlət xidmətlərinin, bank, poçt və fəaliyyətinin davam etdirilməsinə icazə verilən iş və xidmət sahələrində göstərilən digər xidmətlərdən istifadə edilməsi zərurəti, həmçinin açıq havada vaxtın keçirilməsi ilə əlaqədar yaşayış yerini və olduğu yeri tərk etmək üçün (icazə 3 saat müddətinə gündə 1 dəfə verilir, dövlət xidmətlərindən istifadə edilməsi zərurəti ilə əlaqədar yaşayış yerini və olduğu yeri tərk edən şəxslər üçün geri qayıtma müddəti müvafiq dövlət qurumu tərəfindən verilən arayışla müəyyən edilir).
Yaxın qohumunun dəfnində iştirakla əlaqədar yaşayış yerini və olduğu yeri tərk etmək üçün isə hər bir şəxs Azərbaycan Respublikası Daxili İşlər Nazirliyinin Növbətçi Hissələri İdarəetmə Xidmətinin 102 Xidməti – Zəng Mərkəzi vasitəsilə icazə almalıdır.
Beynəlxalq və ölkədaxili uçuşlara müvafiq reys üçün bileti olan şəxslərin yaşadıqları və olduqları yerdən hərəkətinə onların biletləri əsasında, dövlət sərhədindən müvafiq qaydada ölkəyə daxil olan şəxslərin yaşadıqları və olduqları yerə gəlməsinə isə onların pasportuna vurulmuş ştamp əsasında yol verilir.
- Bakı metropolitenində sərnişindaşımanın fəaliyyətinə tətbiq olunan məhdudiyyət 2021-ci il 31 yanvar saat 06:00-dək uzadılır.
- Bütün ölkə ərazisində şənbə və bazar günləri ictimai nəqliyyatın fəaliyyətinə tətbiq olunan məhdudiyyət 2021-ci il 31 yanvar saat 06:00-dək uzadılır;
2020-ci il 14 dekabr saat 00:00-dan 2021-ci il 18 yanvar saat 00:00-dək tətbiq olunan məhdudiyyətlərin iqtisadi fəallığa təsiri nəzərə alınaraq əvvəlki sərtləşdirilmiş karantin rejimi zamanı müəyyən edilmiş ehtiyacı olan təqribən 600 min nəfərə 190 manat birdəfəlik maddi yardım göstəriləcəkdir. Eyni zamanda zərərçəkmiş sahələrdə fəaliyyət göstərən sahibkarlara yardım edilməsi nəzərdə tutulur.
Xatırladırıq ki, xüsusi karantin rejiminin qüvvədə olduğu müddətdə ölkə üzrə bütün qapalı və açıq məkanlarda müvafiq qaydada tibbi maskalardan istifadə məcburi hesab olunur.
Dekabrın 11-də Azərbaycan Milli Elmlər Akademiyası Rəyasət Heyətinin növbəti iclası keçirilib.
AMEA-dan verilən məlumata görə, yığıncağın gündəliyinə çıxarılan ilk məsələ “Azərbaycanın işğaldan azad edilmiş ərazilərinə dair elmi tədqiqat işləri ilə bağlı AMEA-nın vəzifələri haqqında Tədbirlər planı” barədə olub.
Bildirilib ki, Tədbirlər planında AMEA-nın bölgənin ehtiyacına uyğun fizika məsələlərinin və təbii sərvətlərin fiziki xassələrinin tədqiqi üzrə Fizika Bölməsinin təşkil olunması öz əksini tapıb. Bundan əlavə, Qarabağ Regional Elmi Mərkəzinin və yeni yaradılacaq Qarabağ Universitetinin formalaşdırılmasına elmi və kadr dəstəyinin göstərilməsi, cihaz və qurğularla təminatı nəzərdə tutulur.
Həmçinin, Sərsəng su anbarının istismarında etibarlılıq göstəricilərinin qiymətləndirilməsi, Xudafərin körpüsünün yanında seysmoakustik stansiyanın yaradılması, Dağlıq Qarabağda astronomik stansiyanın qurulması, Elektron Qarabağ konsepsiyasının işlənilməsi və reallaşdırılması layihələrinə elmi-praktiki dəstəyin həyata keçirilməsi, işğaldan azad edilmiş ərazilərdə ehtiyatı 200 milyon ton neft və 250 milyard kubmetr qaz yataqlarının işlənilməsi və emalı üçün yerli xüsusiyyətlər nəzərə alınmaqla təkliflərin hazırlanması da başlıca hədəflərdəndir.
Dağlıq Qarabağdakı Rusiya sülhməramlıları müşahidə məntəqələrini atışmadan və qəlpələrdən qorumaq, habelə yaxınlıqdakı əraziləri izləmək üçün strukturlarla təchiz ediblər.
Bu barədə “RİA Novosti” Rusiya Müdafiə Nazirliyinin verdiyi məlumata istinadla xəbər yayır.
“Rusiyalı sülhməramlıları hərbi qulluqçuları atıcı silahlardan və qəlpələrdən qorumaq, habelə yaxın ərazilərdə hərtərəfli müşahidələr aparmaq üçün hazırlanmış istehkamlarla müşahidə məntəqələrini təchiz ediblər”, - məlumatda deyilir.
Postun infrastrukturuna yaşayış üçün iki, yemək bişirmək üçün bir modul, eyni zamanda daimi elektrik enerjisi verən nəqliyyat və texnoloji modul daxildir.
Bütün modullarda ev avadanlığı, elektrik cihazları, istilik və kondisioner sistemləri mövcuddur.
Ağ çörəkdən və ya ələnmiş ağ undan istifadə qanda şəkərin səviyyəsini kəskin artıra bilər.
“Report” xəbər verir ki, belə xəbərdarlıqla Rusiyanın tanınmış dietoloqu Mixail Qinzburq “Svezda” telekanalına müsahibəsində çıxış edib.
Mütəxəssisin sözlərinə görə, ağ çörəkdə az qida lifi var. Buna görə nişasta tez parçalanır, qlükoza isə tez hopur. Bundan sonra "metabolik dalğa" yaranır.
"Çoxlu şəkər, çoxlu insulin tez düşür və yenidən yemək istəyirsən. Qanda şəkər tez düşür, deməli, o, toxumalarda çox qalır, amma bu, zəhərli təsirdir”, - o telekanala bildirib.
Qinzburq qeyd edib ki, tez qocalma, "yaş xəstəlikləri"nin yaranması və diabet bu dalğa ilə əlaqələndirilir. Bununla əlaqədar olaraq çovdar buğda və çovdar çörəyi daha faydalıdır.
Sosial şəbəkələrdə Vətən Müharibəsindəki qələbənin şərəfinə "8 Noyabr" adlandırılan metro stansiyasının fotosu paylaşılıb.
Xatırladaq ki, Azərbaycan Respublikası Prezidenti, Silahlı Qüvvələrin Ali Baş Komandanı İlham Əliyev Bakı Metropoliteninin yeni stansiyasına Zəfər günü münasibətilə “8 Noyabr” adı verilməsi təşəbbüsü ilə çıxış edib.
Məlumata görə, Azərbaycan Respublikasının Nazirlər Kabinetinin bununla bağlı Qərarında deyilir: “Azərbaycan Respublikasının Prezidenti, Silahlı Qüvvələrin Ali Baş Komandanı İlham Əliyevin təşəbbüsünə əsasən Bakı Metropoliteninin Nəsimi rayonu, Ceyhun Səlimov küçəsi, 1065-ci məhəllə ünvanında yerləşən yeni stansiyası “8 Noyabr” adlandırılsın”.
"Ölkə.Az" avtosfer.az-a istinadən fotonu təqdim edir:
Bu gün Milli Məclisin plenar iclasında “Azərbaycan Respublikası Hesablama Palatasının sədrinin təyin edilməsi haqqında” məsələ müzakirəyə çıxarılıb. İclasda Vüqar Tapdıq oğlu Gülməmmədov yenidən Hesablama Palatasının sədri vəzifəsinə təyin edilməsinə razılıq verilib.
Oxu.az xəbər verir ki, sədr 1971-ci il aprel ayının 3-də Bakı şəhərində anadan olub. 1993-cü ildə Azərbaycan Dövlət İqtisad İnstitutunun istehsalın iqtisadiyyatı və idarəedilməsi fakültəsini bitirib. 1992-ci ildə Suraxanı maşınqayırma zavodunda tərcüməçi işləyib.
V.Gülməmmədov 1993-1997-ci illərdə Suraxanı rayon Səhiyyə şöbəsində baş mühasibin müavini, baş mühasib vəzifələrində çalışıb. 1997-2007-ci illərdə Azərbaycan Respublikası Maliyyə Nazirliyinin Suraxanı rayon Maliyyə şöbəsinin (idarəsinin) müfəttişi, rəis müavini, şöbə müdiri, Səbail rayon Maliyyə idarəsinin rəis müavini, şöbə rəisi, Binəqədi rayon Maliyyə idarəsinin rəis müavini, sektor rəisi, Yasamal rayon Maliyyə idarəsinin rəis müavini, sektor rəisi olub.
2007-2009-cu illərdə Azərbaycan Respublikası Hesablama Palatasının Xarici investisiyalı və infrastruktur layihələrinə nəzarət şöbəsinin müdiri, 2009-2013-cü illərdə isə İnvestisiyalara nəzarət şöbəsinin müdiri vəzifəsində işləyib.
22 Noyabr 2013-cü ildə Azərbaycan Respublikası Milli Məclisinin qərarı ilə Hesablama Palatasının sədri vəzifəsinə təyin edilib.
Azərbaycan Respublikası Hesablama Palatasının yaradılmasının 10 illiyi ilə əlaqədar və Palatanın fəaliyyətində xüsusi xidmətlərinə görə Azərbaycan Respublikası Prezidentinin 2011-ci il 31 oktyabr tarixli 1809 nömrəli Sərəncamı ilə “Dövlət qulluğunda fərqlənməyə görə” medalı ilə təltif edilib.
Ailəlidir, üç övladı var.