 |
|
Vətən müharibəsində Silahlı Qüvvələrimizin 2 783 nəfər hərbi qulluqçusu həlak olub. Onların sırasında 103 nəfər hərbi qulluqçunun DNT analiz metodu ilə şəxsiyyətinin müəyyən edilməsi üzrə işlər davam etdirilir.
Bu barədə Azərbaycan Respublikası Müdafiə Nazirliyinin yaydığı məlumatda bildirilib.
Qeyd olunub ki, 100 nəfərdən artıq hərbi qulluqçumuz isə itkin düşmüş hesab olunur.
"Onların tapılıb ailələrinə məlumat verilməsi üçün zəruri təbdirlər görülür. Hazırda 1 245 nəfər hərbi qulluqçumuzun tibb müəssisələrində müalicəsi davam edir.
Həlak olan hərbi qulluqçuların adları, təvəllüdü, rütbəsi və keçdiyi döyüş yolu barədə təfərrüatlı məlumatlar əlavə olaraq ölkə ictimaiyyətinə təqdim olunacaqdır. Aidiyyəti dövlət qurumlarının əməkdaşlarından ibarət komissiya bu istiqamətdə fəaliyyət göstərir. Allah bütün şəhidlərimizə rəhmət eləsin! Şəhidlərimizin ruhu qarşısında baş əyirik!", - məlumatda bildirilib.
Ermənistanın 27 sentyabr 2020-ci ildə ölkəmizə qarşı növbəti hərbi təcavüzünə cavab olaraq Azərbaycan Respublikası Silahlı Qüvvələri Ali Baş Komandanın rəhbərliyi altında torpaqlarımızın işğaldan azad edilməsi məqsədilə Vətən müharibəsinə başlamışdır.
Azərbaycan Respublikası Silahlı Qüvvələrinin şəxsi heyəti Vətən müharibəsində qəhrəmancasına və şücaətlə döyüşərək Ermənistan silahlı qüvvələrinə sarsıdıcı zərbələr endirmiş, illər ərzində Ermənistanın işğal altındakı torpaqlarımızda qurduğu mürəkkəb konstruksiyalı mühəndis-istehkam və bunker sistemlərini darmadağın etmiş, bir neçə eşelondan ibarət və sıx şəkildə minalanmış müdafiə xətlərini yararaq torpaqlarımızı işğaldan azad etmişdir.
Rəşadətli və qorxmaz əsgər və zabitlərimiz əksər strateji yüksəkliklərin, əlverişli döyüş mövqelərinin Ermənistan silahlı qüvvələrinin əlində olması, Ermənistanın çoxsaylı artilleriya, yaylım atəşli reaktiv sistemləri və minaatan qurğularından ibarət sıx atəş zərbələri altında və çətin coğrafi relyef və iqlim şəraitində döyüş apararaq Ermənistanı məğlub etməyə müvəffəq olmuşdur.
Qarabağın tacı olan Şuşa şəhərinin azad edilməsi dünya hərb tarixinə düşəcək unikal hərbi əməliyyatlardan biridir.
30 ilə yaxın həsrətində olduğumuz torpaqlarımız şəhidlərimizin qanı və canı bahasına işğaldan azad olunmuşdur. Döyüş əməliyyatı planlarının yüksək peşəkarlıqla hazırlanması, yüksək texnologiyaların tətbiqi, müxtəlif qoşun növlərinin fəaliyyətinin səmərəli əlaqələndirilməsi, havada mütləq üstünlüyün əldə edilməsi, ordumuzun manevr qabiliyyəti və digər taktiki və strateji üstünlükləri şəxsi heyətin sıralarında itkilərimizi əsaslı dərəcədə azaltmışdır. Amma müharibə itkisiz olmur.
Vətən müharibəsində Silahlı Qüvvələrimizin 2783 nəfər hərbi qulluqçusu həlak olmuşdur. Onların sırasında 103 nəfər hərbi qulluqçunun DNT analiz metodu ilə şəxsiyyətinin müəyyən edilməsi üzrə işlər davam etdirilir. 100 nəfərdən artıq hərbi qulluqçumuz isə itkin düşmüş hesab olunur. Onların tapılıb ailələrinə məlumat verilməsi üçün zəruri təbdirlər görülür. Hazırda 1245 nəfər hərbi qulluqçumuzun tibb müəssisələrində müalicəsi davam edir.
Həlak olan hərbi qulluqçuların adları, təvəllüdü, rütbəsi və keçdiyi döyüş yolu barədə təfərrüatlı məlumatlar əlavə olaraq ölkə ictimaiyyətinə təqdim olunacaqdır. Aidiyyəti dövlət qurumlarının əməkdaşlarından ibarət komissiya bu istiqamətdə fəaliyyət göstərir.
Allah bütün şəhidlərimizə rəhmət eləsin!
Şəhidlərimizin ruhu qarşısında baş əyirik!
“Koronavirus (COVID-19) infeksiyasının kütləvi yayılmasının qarşısının alınması məqsədilə tətbiq edilən xüsusi karantin rejimi ilə əlaqədar aktiv koronavirus xəstələrinə nəzarət-profilaktik tədbirlər gücləndirilib”.
Bu barədə Oxu.Az-a açıqlamasında Daxili İşlər Nazirliyinin (DİN) Mətbuat Xidmətinin KİV və ictimaiyyətlə əlaqələr şöbəsinin rəisi polis mayoru Elşad Hacıyev məlumat verib.
O bildirib ki, polis və Daxili Qoşunların hərbi qulluqçuları tərəfindən paytaxt ərazisində, eləcə də bölgələrdə aktiv koronavirus xəstələrinin sərbəst hərəkətinə icazə verilmir:
“COVID-19 xəstəliyi ilə əlaqədar analiz nəticələri pozitiv çıxan bütün şəxslərlə bağlı ərazi polis orqanlarına dərhal məlumat verilir. Koronavirusa yoluxan şəxslər məsuliyyətli davranmalı, ətrafdakı insanları nəzərə almalı, digər şəxslərin həyat və sağlamlığına həssas yanaşmalıdır.
Ötən gün tərəfimizdən küçədə 27 nəfər COVID-19 xəstəsi müəyyən olunub. Onlardan 25 nəfəri evə qaytarılıb, 20 nəfər barəsində cinayət işi başlayıb. 2 nəfər ağır xəstə isə həyatını itirib. Və bu şəxslər polis tərəfindən ictimai yerlərdə müəyyən olunub ki, onların ünsiyyətdə olduğu hər bir şəxs istintaq araşdırmaları zamanı yoxlanılacaqlar. Görünən odur ki, tək bir gündə 27 nəfərin məsuliyyətsiz davranışı, cəmiyyət üçün nə qədər təhlükəlidir. Hər bir evin qarşısına bir polis postu qoyula bilməz, dünyada belə təcrübə yoxdur. Pandemiya dövründə aktiv koronavirus xəstələri sosial təcrid, özünü təcrid tədbirlərinə ciddi əməl etməlidir”.
Sentyabrın 27-dən başlayaraq müzəffər Azərbaycan ordusu tərəfindən keçirilmiş əks-hücum əməliyyatları nəticəsində işğaldan azad edilmiş ərazilərimizdə təhlükəsizlik tədbirləri gücləndirilir.
DİN-in Mətbuat Xidmətinin Bərdə regional qrupundan bildirilib ki, Tərtər Rayon Polis Şöbəsinin əməkdaşları rayonun işğaldan azad edilmiş Suqovuşan və Talış kəndlərində xidməti fəaliyyətini bərpa edib.
Kəndlərin ərazisində təhlükəsizliyi təmin etmək üçün sahə inspektorları təyin edilib və xidməti post qurulub.
Azərbaycan Ordusu tərəfindən azad olunan torpaqlarda təmizləmə və yenidən qurma işləri davam edir. Bütün bu proseslərdən sonra əhalinin köçürülməsinə başlanıla bilər. Bəs, köçürülmə zamanı öncəlik hansı şəxslərdə olacaq?
Redaktor.az-a açıqlamasında politoloq Qabil Hüseynli bildirib ki, işğaldan azad olunan ərazilərə ilk olaraq oranın sahibləri getməlidir:
"Oralar bir müddət sonra cənnətə çevriləcək. Hamının orda torpaq payı, evi, sahələri var. Bu torpaqların hər birinin öz sahibi var. Azərbaycanın müxtəlif ərazilərində yaşayan məcburi köçkünlər ora gedəcəklər.
Qərbi Azərbaycandan olan həmyerlilərimiz isə torpaq alaraq orada qala bilər. Çünki torpaq xüsusi mülkiyyətdir. Bu baxımdan insanların hansı bölgədən olması fərq etmir. Lakin köçürülməyə gəldikdə isə, ilk olaraq həmin torpaqların öz sahibləri evlərinə geri qaytarılacaq. Həmin torpaqların qeydiyyatlı əhalisi köçürülənlər arasında ön sırada olacaq".
Müdafiə Nazirliyi Laçın rayonunun Hüsülü və Malıbəy kəndlərinin videogörüntülərini yayıb.
Həmin görüntüləri təqdim edirik.
Şəhid ailələri, eyni zamanda qazilərin sosial təminatı üçün işlərə başlanıb. Bu qəhrəmanlarımızın kredit ödəmələri ilə bağlı Azərbaycan Banklar Assosiasiyası məlumat yayıb.
Torpaqlarımızın azad edilməsi uğrunda döyüşlərdə Şəhid olmuş hərbçilərimizin banklara olan istehlak kreditləri və onlara hesablanmış faizlər və digər ödəmələr tam həcmdə silinir.
Bu vəziyyət düşmən təxribatı nəticəsində həyatını itirmiş mülki vətəndaşlarımıza da şamildir. Onların da banklara olan istehlak kreditləri və onlara hesablanmış faizlər və digər ödəmələr tam həcmdə silinir. Hərbi əməliyyatlar zamanı yaralanmış hərbçilərin banklara olan kredit öhdəliklərinə faizlərin və digər ödəmələrin hesablanması 27 sentyabr 2020-ci il tarixindən tam dayandırılır.
Bank eksperti Xəyal Məmmədli "ARB24"-ə bildirib ki, Azərbaycan Banklar Assosiasiyası Mərkəzi Bankın tövsiyyələrinə əsasən, Vətən Müharibəsində iştirak edən hərbi qulluqçuların və eyni zamanda zərərçəkmiş şəxslərin sosial müdafiəsini gücləndirmək məqsədilə tədbirlərin həyata keçirilməsinə başlanılıb:
"Banklardan kredit götürmüş hərbi qulluqçular kredit bazalarda hərbi qulluqçu kimi qeydiyyatdan keçiblər. Amma müharibə başalayan dövrdə dövlət başçısı tərəfindən qismən səfərbərlik elan olundu. Bu zaman orduya çağırılan şəxslər ehtiyatda olan hərbçilərdir. Onlar bankdan kredit götürən zaman aralarında dövlət qulluqçuları, özəl sektorda çalışanlar və bizneslə məşğul olanlar var. Onlar hərbi qulluqçu kimi bankların bazalarında qeydiyyatda yoxdur.
Həmin şəxslərin ailələrinə zəng olunması vahid bazanın olmaması ilə əlaqədardır. Təbii ki, əgər bu barədə banklara məlumat daxil olursa, dərhal bazaya daxil olunur".
Şəhid ailələri, eyni zamanda qazilərin sosial təminatı üçün işlərə başlanıb. Bu qəhrəmanlarımızın kredit ödəmələri ilə bağlı Azərbaycan Banklar Assosiasiyası məlumat yayıb.
"Ölkə.Az" xəbər verir ki, torpaqlarımızın azad edilməsi uğrunda döyüşlərdə Şəhid olmuş hərbçilərimizin banklara olan istehlak kreditləri və onlara hesablanmış faizlər və digər ödəmələr tam həcmdə silinir.
Bu vəziyyət düşmən təxribatı nəticəsində həyatını itirmiş mülki vətəndaşlarımıza da şamildir. Onların da banklara olan istehlak kreditləri və onlara hesablanmış faizlər və digər ödəmələr tam həcmdə silinir. Hərbi əməliyyatlar zamanı yaralanmış hərbçilərin banklara olan kredit öhdəliklərinə faizlərin və digər ödəmələrin hesablanması 27 sentyabr 2020-ci il tarixindən tam dayandırılır.
Bank eksperti Xəyal Məmmədli "ARB24"-ə bildirib ki, Azərbaycan Banklar Assosiasiyası Mərkəzi Bankın tövsiyyələrinə əsasən, Vətən Müharibəsində iştirak edən hərbi qulluqçuların və eyni zamanda zərərçəkmiş şəxslərin sosial müdafiəsini gücləndirmək məqsədilə tədbirlərin həyata keçirilməsinə başlanılıb:
"Banklardan kredit götürmüş hərbi qulluqçular kredit bazalarda hərbi qulluqçu kimi qeydiyyatdan keçiblər. Amma müharibə başalayan dövrdə dövlət başçısı tərəfindən qismən səfərbərlik elan olundu. Bu zaman orduya çağırılan şəxslər ehtiyatda olan hərbçilərdir. Onlar bankdan kredit götürən zaman aralarında dövlət qulluqçuları, özəl sektorda çalışanlar və bizneslə məşğul olanlar var. Onlar hərbi qulluqçu kimi bankların bazalarında qeydiyyatda yoxdur.
Həmin şəxslərin ailələrinə zəng olunması vahid bazanın olmaması ilə əlaqədardır. Təbii ki, əgər bu barədə banklara məlumat daxil olursa, dərhal bazaya daxil olunur".
Məlum olduğu kimi işğaldan əvvəlki dövrdə Dağlıq Qarabağ və ətraf rayonların ərazisində yerləşən şəhər, qəsəbə və kəndlərin böyük bir hissəsi Azərbaycan tərəfindən təbii qazla təmin olunurdu. “Qafqazinfo” xəbər verir ki, bu məqsədlə magistral və paylayıcı qaz şəbəkəsi də çəkilib.
Lakin erməni silahlı qüvvələrinin Azərbaycan ərazisinə təcavüzü nəticəsində qeyd olunan ərazilərin həmin vaxt qaz təminatı dayandırılıb. Ssentyabrın27-dən Silahlı Qüvvələrinin Ali Baş Komandanı, Prezident İlham Əliyevin rəhbərliyi ilə müzəffər Azərbaycan Ordusunun əks-hücum əməliyyatı ilə başlayan Vətən müharibəsi zamanı əldə edilən Qələbədən sonra işğaldan azad olunmuş ərazilərin bərpası və müvafiq infrastrukturun yaradılması işləri çərçivəsində, yaşayış ərazilərinin təbii qaz təchizatı üçün SOCAR-ın rəhbərliyinin tapşırığı ilə ilkin texniki-iqtisadi əsaslandırma işlərinə başlanılıb.
Əvvəlcə yeni çəkiləcək magistral qaz xətlərinin istiqamətləri və onların keçəcəyi marşrutlarının araşdırılması işləri aparılıb. Bu istiqamətlərə Böyük Bəhmənli-Füzuli-Hadrut-Şuşa, Azadqaraqoyunlu-Ağdam, Horadiz-Cəbrayıl-Zəngilan-Qubadlı-Laçın, Goranboy-Kəlbəcər aid edilmişdir. Eyni zamanda işğaldan azad olunmuş ərazilərdə vaxtı ilə çəkilmiş qaz xətlərinin bərpasının mümkünlüyü də araşdırılır. Qeyd olunmuş istiqamətlər üzrə çəkilməsi planlaşdırılan magistral qaz xətlərinin imkanları mövcud və yeni salınacaq yaşayış məskənlərinin və sənaye obyektlərinin uzunmüddətli inkişafı nəzərə alınmaqla təbii qazla təmin edilməsinə hesablanacaq. Hal-hazırda planlaşdırılan magistral qaz şəbəkəsinin marşrutlarının münasib konfiqurasiyası, ilkin texniki-iqtisadi göstəriciləri müəyyən edilir. Ərazilərin baş planları hazır olduqdan və istiqamətlər təsdiq olunduqdan sonra qazlaşmanın işçi layihələrinin hazırlanması mərhələsinə başlanılacaq.
Bu barədə hazırlanan video materialı bu ünvandan yükləyə bilərsiniz:
Azərbaycan Müdafiə Nazirliyi Laçın şəhərinin videogörüntülərini yayıb.
Həmin görüntüləri təqdim edirik.
Təəssüf ki, ölkəmizdə hələ də karantin haqda danışılanda ona etiraz edənlər tapılır. Amma hazırkı vəziyyət onu deməyə əsas verir ki, karantin qaydaları sərtləşdirilməlidir.
Bunu trend-ə Azərbaycan Tibb Universitetinin dosenti Fuad İslamzadə deyib.
Onun sözlərinə görə, sərt karantinin vacibliyinin xalqa izah edilməsi də zəruridir.
F.İslamzadə qeyd edib ki, Azərbaycanda xəstələnmə sayı dünya üzrə orta rəqəmlərdən çoxdur: "Adətən, tibbi statistikada xəstələnmə hallarının sayı haqqında məlumat almaq üçün il ərzində əhalinin hər 100 min nəfərindən neçəsinin xəstələndiyini hesablayırlar. Virus öz doğma vətəni olan Çində indiyə qədər hər 100 min nəfərdən yalnız 7-8 nəfərə yoluxub.
Ötən bir gün ərzində isə əhalisi Azərbaycan əhalisındən 140 dəfə artıq olan Çində cəmi 9, bizim ölkədə isə 4246 yeni xəstələnmə halı qeydə alınıb. 100 min nəfərə görə hesablandıqda Azərbaycanda birillik xəstələnmə göstəricisinin 1060-dan artıq olduğu aydınlaşır.
Dünya əhalisi arasında isə indiyə qədər hər 100 min nəfərə orta hesabla 860 xəstələnmə halı qeydə alınıb".
F.İslamzadənin bildirdiyinə görə, indiki dövrdə COVID-19-un spesifik profilaktikası üçün biz yalnız effektiv təsirə malik vaksinə ümid edə bilərik ki, onun da nə vaxt ortaya çıxacağı və bizim ölkəyə nə vaxt çatacağı hələlik məlum deyil.
Buna görə məlum xəstəliyin yayılmasını ləngitmək üçün hələlik maska, məsafə və əl gigiyenası kimi qeyri-spesifik üsullara ümid edə bilərik:
"Azərbaycanda da profilaktik tədbirlərə - xəstələrin vaxtında aşkar edilib, müalicəyə yönləndirilməsi, insanların kütləvi təmaslarının (o cümlədən ictimai nəqliyyatda, toy və yas yerlərində, ticarət mərkəzlərində və s.) minimuma endirilməsi və bunun mümkün olmadığı sahələrdə ara məsafəsinin saxlanılması, tibbi maskaların köməyi ilə qorunmaya, əl gigiyenası kimi üsullardan istifadə etməyə üstünlük verilməlidir.
Bu üsullar yoluxmanın yayılmasını azalda bilər. Lakin bir şərtlə ki, buna bütün insanlar eyni dərəcədə riayət etsin".
Mütəxəssis insanların maskadan düzgün istifadəsini də vacib sayıb: "İnsan burnunu açıq qoyub, ağzını maska ilə qapayırsa və ya hər yerdə maska ilə gəzıb, evinin liftinə çatanda üzünü açırsa, doğrudan da özünü qoruduğunu iddia edə bilməz".