İran ABŞ sanksiyaları ilə əlaqədar dünya bazarına neft tədarükünü gözləniləndən daha sürətli templərlə azaldır.

Axar.az xəbər verir ki, bu barədə məlumatı “Vol Strit Jurnal” qəzeti yayıb. Qəzet sentyabrda İranın ixracatını iyunla müqayisədə azaldacağını bildirib. Tehranın neft tədarükünün 1/3-ni ixtisar edəcəyi yəni gündəlik neft tədarükünü 2,3 milyon barreldən 1,5 milyon endirəcəyi gözlənilir:

“İxracatın noyabra qədər 800 min barrelə qədər azalacağı gözlənilir. Bu da indiki səviyyədən təxminən 2 dəfə azdır”.

Qeyd edək ki, Vaşinqton İranla nüvə razılaşmasından çıxmazdan əvvəl Tehranın neft tədarükü gündəlik 2,68 milyon barrel təşkil edirdi. Avqust ayında bu göstərici 1,66 milyon barrelə qədər geriləyib.

Nüvə razılaşmasından çıxan ABŞ yenidən İrana qarşı sanksiyaları bərpa edib. Vaşinqtonun sanksiyalarının ikinci hissəsinin noyabrda tətbiqi nəzərdə tutulub. Bu tarixdə tətbiq ediləcək sanksiyaların əsas hədəfi İranın neft ixracatı olacaq. Belə ki, ABŞ bunun sayəsində İranın neft ixracatını minimum səviyyəyə endirməyi planlaşdırır.

Twitter