Ermənistanda aprel ayında baş verən hadisələrdən sonra hakimiyyətə gələn Nikol Paşinyan baş nazir olduğu ilk gündən sərsəm fikirləri və Azərbaycanın əleyhinə səsləndirdiyi cəfəng iddiaları ilə küçə siyasətçisi səviyyəsindən yuxarı qalxa bilmədiyini sübut etdi. Azərbaycan bu müddət ərzində təmkinli və soyuqqanlı davranmaqla öz hərbi-siyasi gücünə nə qədər arxayın olduğunu nümayiş etdirdi. Çünki Ermənistanda hamının bildiyi bir gerçəklik var ki, əgər havadarları əllərini bu ölkənin arxasından çəksə, Cənubi Qafqazda bu dövlətin mövcud olması mümkün olmayacaq.

Axar.az xəbər verir ki, bu fikirləri Azərtac-a açıqlamasında Milli Məclisin deputatı, “Yeni Azərbaycan” qəzetinin baş redaktoru Hikmət Babaoğlu bildirib.

Hikmət Babaoğlu qeyd edib ki, 2016-cı ilin Aprel döyüşlərindən sonra Ermənistan əhalisinin əksəriyyəti lazımi əşyalarını toplayaraq ölkədən qaçmağa hazırlaşırdı. Siyasi çərənçiliyi ilə hər kəsi bezdirən Paşinyan küçə hərəkatı ilə əldə etdiyi hakimiyyəti elə küçə siyasəti vasitəsilə də əlində saxlamağa çalışır. Ancaq bunun mümkün olmadığını gördükdə isə əhalinin aqressiyasını neytrallaşdırmaq üçün Azərbaycana qarşı verdiyi bəyanatları özünə siyasi sipər etmək istədiyini deyən Milli Məclisin deputatı bildirib ki, Azərbaycan Prezidenti İlham Əliyev bunun müqabilində bir tərəfdən hərbi-diplomatik yollarla yeni müttəfiqlərlə əməkdaşlıq edir, digər tərəfdən isə ordu quruculuğu işlərini keyfiyyətcə yeni mərhələyə qaldırır. Prezident İlham Əliyev Biləsuvar rayonuna səfər edərkən bir daha işğalçı dövlət olan Ermənistana 2016-cı ilin Aprel, 2018-ci ilin Günnüt döyüşlərini xatırladaraq Azərbaycan Ordusunun nəyə qadir olduğunu düşmənin yadına saldı. Dövlətimizin başçısı qeyd etdi ki, bundan sonra da biz onlara lazım olan vaxtda tutarlı cavablar verəcəyik. Düşmən bilir ki, bizim qarşımızda dura bilməz. Baxın, bir neçə gün bundan əvvəl onların silahlı təxribatı nəticəsində Ermənistan-Azərbaycan sərhədində atışma olub və əsgərlərimiz onlara elə dərs veriblər ki, çətin ki, yaxın günlərdə özlərinə gəlsinlər.

“Yaxşı olar ki, Paşinyan özünün sərsəm açıqlamaları əvəzinə Azərbaycan tərəfinin bu qətiyyətli addımlarını nəzərə alsın və torpaqlarımızı işğaldan azad etmək barədə düşünsün. Əks təqdirdə, onu sələflərinin aqibətindən də pis aqibət gözləyə bilər”, - deyə Hikmət Babaoğlu vurğulayıb.

Twitter