Bu gün "Azərbaycan İnnovasiyaların İxracı Konsorsiumu” İctimai Birliyinin (AZİNNEX) 1 illik fəaliyyətinə həsr olunmuş hesabat tədbiri keçirilib.

Axar.az xəbər verir ki, tədbirdə çıxış edən Azərbaycan Prezidenti yanında Vətəndaşlara Xidmət və Sosial İnnovasiyalar üzrə Dövlət Agentliyinin sədri Ülvi Mehdiyev bildirib ki, ASAN Xidmət fəaliyyətində ən yeni texnologiyaları tətbiq edir:

"Bunun nəticəsidir ki, "ASAN xidmət" həm ölkə daxilində, həm də beynəlxalq müstəvidə qısa bir müddətdə böyük uğur qazandı. 2015-ci ildə "ASAN xidmət" BMT tərəfindən mükafat layiq görülüb. Bundan sonra BMT təşkilata üzv olan ölkələrə dövlət xidmətinin çatdırılmasında "ASAN xidmət" modelinin tətbiqini tövsiyə edib. Bu modellə bir sıra dövlətlər maraqlanmağa başladı. Hazırda 10 dövlətdə bunun tətbiqi ilə bağlı işlər aparılır".

Daha sonra tədbirdə çıxış edən Dövlət Gömrük komitəsinin sədr müavini İqbal Babayev öz potensialımıza görə dünya bazarında intelektual məhsullarımızın çox az olduğunu bildirib:

"İT intelekt məhsulu olduğu üçün ixracda rüsum tətbiq olunmur. Bu, çox sevindirici haldır. Lakin dünya bazarında intelektual məhsullarımız demək olar ki, yox səviyyəsindədir.

Problem ondan ibarət ki, biznes prosesi ölkəmizdə yeni- yeni formalaşıb. Bütün texnologiyalar həm Sovetlər Birliyindən, həm də Avropadan ixrac olunub. İndi biz prosesi tam mükəmməl tətbiq edəndən sonra İT platformaya keçmək istəyirik. Amma biznes prosesin özündə də hüquqi problemlərimiz var. Birinci odur ki, dünya bazarında hər məhsulua düşən xərclər və onun resursları günü-gündən artır. Bu da bazarın qloballaşması və eyni zamanda resuslara düşən xərcin artması, ümumiyyətlə milli məhsulun dünya bazarında rəqabətliliyini zəiflədir. Ona görə milli məhsulun dünya bazarında yüksək reytinqə mənsub olması üçün əsas konsepsiya satmalıyıq. Yerli İT bazarında çox məhsullarımız varki, çox yüksək reytinqə malikdir.

Gömrük olaraq həmişə İT sahəsini dəstəkləmişik. Hər hansı bir problemləri olarsa, dərhal həll edirik. Çünki artıq İT məhsulumuzu dünya bazarına çıxarmağın vaxtıdır".

Tədbirin sonunda Azərbaycan İnnovasiyaların İxracı Konsorsiumu ilə Sahibkarlar Təşkilatları Milli Konfederasiyası, ADA Universiteti və AMCHAM Azərbaycan arasında Anlaşma Memorandumları imzalanıb. Sonda Konsorsium tərəfdaşları mükafatlandırılıblar və üzvlərə sertifikatlar təqdim olunub.

Twitter