13:50

Köçəryan həddindən artıq radikal bəyanatlarında kiməsə arxalanır.

Bunu Axar.az-a Ermənistanın eks-prezidenti Robert Köçəryanın növbədənkənar parlament seçkisində iştirakını bəyan etməsi haqda danışan sabiq dövlət müşaviri Qabil Hüseynli deyib. Politoloq bildirib ki, Köçəryanın növbədənkənar parlament seçkisində qələbə çalacağı ilə bağlı birmənalı fikir söyləmək çətindir:

“Düzdür, Köçəryan həddindən artıq radikal bəyanatlarında kiməsə arxalanır. Ancaq son vaxtlar ABŞ-dan müəyyən siyasi məsləhətçilərin Ermənistana axını çox şeydən xəbər verir. ABŞ getdikcə Paşinyan və onun komandasının hakimiyyətini himayəsi altına alır. Vaşinqton seçkilərə qədər Paşinyanı kifayət qədər gücləndirmək fikrindədir. Fikir verin, Rusiya mətbuatı da bununla bağlı yazmağa başlayıb və hakim fikir bundan ibarətdir ki, ABŞ Rusiyanı Ermənistan məsələsində qabaqlayır. Üstəlik, Paşinyanın Trampla görüşü hazırlanır. Çox güman ki, Paşinyan ABŞ-Türkiyə münasibətlərinin gərgin olmasından Ermənistanın xeyrinə yararlanmağa çalışacaq. Amerika Erməni Milli Komitəsi artıq konqresmenlərə və senatorlara təsir etmək üçün böyük bir kampaniya başladıb. Bu kampaniyada onlar Paşinyan-Tramp görüşünün hazırlanmasını birinci yerə qoyublar. Hətta bəziləri bu məsələni artıq həll olunmuş sayırlar”.

Q.Hüseynli bildirib ki, buna görə də rus politoloqlar Kremldən Ermənistanla bağlı daha ciddi düşünməyi və orada Moskvanın strateji maraqlarını nəzərə almağı tələb edirlər:

“Göründüyü kimi, Ermənistan ətrafındakı vəziyyət mürəkkəbləşir, qarşıdurma meyilləri artır. Bu prosesdə iştirak edən siyasi qüvvələrin sayının çoxalması Ermənistan üçün ciddi təhlükələr vəd edir. Hesab edirəm ki, sentyabrda bölgədə siyasi temperatur xeyli qalxacaq”.

Politoloqun sözlərinə görə, Paşinyan-Tramp görüşü Rusiya-Ermənistan, Rusiya-ABŞ münasibətlərində yeni qarşıdurma meydanı açacaq:

“Bu isə Cənubi Qafqaz uğrunda mübarizənin yeni mərhələsinin başlamasına və bütövlükdə regionda Rusiya-ABŞ qarşıdurmasının toqquşma vəziyyətinə çatmasına səbəb ola bilər. Ümumiyyətlə, bölgədə xeyli daxili və xarici xarakterli təhlükəli tendensiyalar var”.

Qeyd edək ki, Ermənistanın eks-prezidenti Robert Köçəryan növbədənkənar parlament seçkisində iştirak edəcəyini bəyan edib.

Twitter