Paşinyanın bu səfəri onun Rusiya ilə münasibətləri qaydasına salmaq üçün ikinci və son şansıdır.

Axar.az xəbər verir ki, bu sözləri analitik Ehtiram Aşırlı Ermənistan Baş naziri Nikol Paşinyanın Rusiyaya səfərini şərh edərkən deyib. O bildirib ki, Paşinyanı narahat edən məqamlar var:

“Prezident İlham Əliyevin Rusiyaya rəsmi səfərindən dərhal sonra erməni mətbuatında Ermənistan Baş naziri Nikol Paşinyanın Rusiyaya səfər edəcəyi barədə xəbərlər yayılmağa başladı. Ehtimal ki, görüşmək istəyi Nikol Paşinyandan gəlib. Artıq Azərbaycan getdikcə Rusiyanın siyasi, hərbi, iqtisadi cəhətdən ayrılmaz tərəfdaşına çevirilir. Bu da Ermənistanı, xüsusilə də Paşinyanı narahat edir. Digər tərəfdən, ən önəmlisi odur ki, Putinin Dağlıq Qarabağ məsələsinə münasibəti erməni hökumətində narahatlıqla qarşılanıb. Azərbaycan və Rusiya arasında enerji, turizm, nəqliyyat kimi sektorların inkişafına dair sənədlərin imzalanması Ermənistanda xüsusi həyəcan doğurur”.

Analitik vurğulayıb ki, digər önəmli bir məsələ ölkə daxilində növbədənkənar parlament seçkilərinin keçirilməsidir:

“Rusiyanın Robert Köçəryanı dəstəkləməsi qənaəti var və bu Paşinyanı çox narahat edir. Böyük ehtimalla Paşinyan “sədaqətini” göstərməyə çalışacaq və Gümrüdə yerləşən 102-ci hərbi bazanın daha da genişləndirilməsi, qarşıdakı günlərdə birgə genişmiqyaslı hərbi təlimlərlə də bağlı təklif verəcək”.

Qeyd edək ki, Rusiya Prezidenti Vladimir Putinlə Ermənistan Baş naziri Nikol Paşinyan sentyabrın 8-də Moskvada görüşəcəklər.

Twitter