Sentyabrın 7-nə planlaşdırılan Rusiya-Türkiyə-İran üçlüyünün görüşündə əslində Suriyadakı problemlərin tam mənası ilə həll ediləcəyi ilə bağlı bir iddia yoxdur.

Bu sözləri Axar.az-a açıqlamasımnda analitik Vüqar Zifəroğlu deyib. O bildirib ki, ümumiyyətlə, belə bir iddianı ortaya qoymaq da olmaz:

“Amma şübhəsiz ki, belə formatlı görüşün keçirilməsi Suriyada olan bir sıra ciddi məsələlərlə bağlı müəyyən irəliləyişlərin əldə edilməsinə öz müsbət töhfələrinə verə bilər. Rusiya, İran və Türkiyə üçlüyünü formalaşdıran ən vacib faktor xarici faktordur. Qərbin Türkiyəyə, İrana, Rusiyaya münasibəti bu üçlüyü bir araya gətirə bildi. İndinin özündə də Suriya məsələsində bu üçlüyü strateji nöqteyi-nəzərdən bir-birindən fərqləndirən ciddi məqamlar olsa da, müəyyən korrektələr etməklə, hər üçü öz siyasətlərini uzlaşdırmağa cəhd göstərir”. 
Analitik vurğulayıb ki, İdlib kifayət qədər prinsipial məsələdir:

“Əslində ABŞ-ın İdlib məsələsinə münasibətinin Türkiyənin mövqeyi ilə üst-üstə düşməsi o demək deyil ki, biz ABŞ və Türkiyənin Suriyada ortaq hərəkət etməsinin şahidi olacağıq. Eyni zamanda İdlib məsələsində Rusiya və İranla Türkiyənin mövqelərinin üst-üstə düşməməsi də Türkiyənin Rusiya və İranla üz-üzə gələ biləcəyi anlamına gəlmir. Yəni mövcud xarici şərtlər ümumilikdə götürdükdə hazırda Türkiyə, Rusiya və İranı hansısa bir nöqtədə ortaq məxrəcə gəlməyə məcbur edir. Mənə elə gəlir ki, müəyyən qədər bu ortaq nöqtələr tapılacaq”.

Qeyd edək ki, Türkiyə, İran və Rusiya prezidentlərinin iştirakı ilə 7 sentyabr tarixində Tehranda üçtərəfli Suriya sammiti baş tutacaq.

Twitter