Rusiyanın Belarusda hərbi aviabaza yaratmasına ehtiyac yoxdur.

Axar.az xəbər verir ki, bunu Minskdə amerikalı analitiklərlə görüşü zamanı Belarus Prezidenti Aleksandr Lukaşenko deyib. Onun sözlərinə görə, Minsk öz gücüylə Belarusun təhlükəsizliyini təmin etmək iqtidarındadır:

“Tez-tez Belarusda rus hərbi aviabazası müzakirə edirlər. Biz Rusiya ilə hərbi-siyasi ittifaqdayıq. Burada Rusiya bazasının olub-olmamasının heç bir fərqi yoxdur. Bu bazanı ərazimizdə özümüzün suveren və müstəqil olduğumuzu göstərmək üçün yox, ona həqiqətən ehtiyacın olmadığı üçün yerləşdirmirik. Biz Rusiya ilə müqavilə nəticəsində üzərimizə düşən öhdəlikləri icra etmək gücündəyik. Əgər biz bunu edə bilməsəydik, inanın ki, biz Rusiyaya təhlükəsizliyimizin təmini üçün müraciət edərdik. Hələlik ehtiyacımız yoxdur”.

O, Polşada ABŞ bazasının yerləşdirilməsinə cavab olaraq Minskin yeni silahlar əldə edəcəyini bildirib:

“Əgər NATO baza yerləşdirməsiylə bizi qorxutmağa davam etsə, biz daha effektiv silahlar əldə edəcəyik. Bu silahlar ilk növbədə raketlər olacaq”.

Qeyd edək ki, bundan öncə Lukaşenko Polşanı öz ərazisində ABŞ bazasını yerləşdirməməyə çağırmış, əks təqdirdə buna Minsklə Moskvanın cavab verəcəyini bildirmişdi.

Twitter