Rusiyanın Belarusu nəzəri və praktiki cəhətdən özünə birləşdirməsi tamamilə mümkündür.

Bu sözləri Axar.az-a Rusiyanın Belarusu ilhaqı ilə bağlı səsləndirilən iddialara münasibət bildirən siyasi ekspert Natiq Cəfərli deyib.

“Belarus xalqının mövqeyini və bu ölkənin ümumi durumunu, eyni zamanda, Rusiyanın daim genişlənmək və hakimiyyətin ətraf ölkələrin ekspansiyası ilə bağlı siyasətini nəzərə alsaq, sözügedən iddialar tamamilə real görünür. Bunun qarşısını yalnız Belarus Prezidenti Aleksandr Lukaşenko və beynəlxalq təşkilatların Rusiyaya qarşı sərt reaksiyası ala bilər. Ancaq praktiki və praqmatik baxımdan Belarusun anneksiyası mümkünsüz deyil. Çünki Rusiya ilə Belarus arasında ittifaq müqaviləsi var. Tərəflər arasında ortaq valyuta, ortaq ordu və sərhəd məhz bu müqavilə ilə təsbitini tapıb. Hər iki ölkənin parlamentləri razılaşmanı təsdiqləyib. Rusiya da məhz bunu əsas gətirərək Belarusun ilhaqı ilə bağlı müəyyən addımlar ata bilər. Dünya ictimaiyyəti məhz sözügedən müqavilədən ehtiyat edir. Ona görə də açığı, Belarusun Rusiyaya birləşməsi ehtimalı var", - ekspert bildirib.

N.Cəfərli deyib ki, belə bir ehtimalın yaxın zamanlarda gerçəkləşməsi problematik görünür:

“Çünki Rusiya da anlayır ki, belə bir addımın nəticələri daha ağır ola və kifayət qədər sərt reaksiyalara gətirib çıxara bilər. Bu, onsuz da izolyasiya və sanksiyalar şəraitində yaşayan Rusiyanın ümumi durumunu daha da pisləşdirə bilər”.

Ekspert Belarusun ilhaqının indiki dönəmdə Moskva üçün zərurətə çevrilməsinin səbəblərinə də aydınlıq gətirib:

“Rusiyanın son 300 illik tarixi qonşularını “udmaq” üzərində qurulub. Bu məsələnin ikinci praqmatik tərəfi də var. Belə ki, 2024-cü ildə Putinin prezidentlik dövrü bitir və Konstitusiya onun yenidən seçilməsinə imkan vermir. Putin isə Konstitusiyada dəyişikliklər etməyəcəyini öncədən elan edib. Bu halda yalnız bir variant qalır, o da Belarusla Rusiyanın konfederativ dövlət halında birləşməsidir. Bu birləşmə nəticəsində Rusiya-Belarus Birləşmiş dövlət başçısı və yaxud da dövlət şurasının sədri vəzifəsi təsis oluna bilər ki, bu da Putinin siyasətdə qalması üçün növbəti bir plasdarm rolunu oynayar”.

Twitter