Redaktor.az xəbər verir ki, bu sözləri həkim-infeksionist Vüqar Cavadzadə deyib. O bildirib ki, hazırda Avropa ölkələrində virusun yeni mutasiyaya uğrayan formasına görə yenidən sərt karantin qaydaları tətbiq edilir:

"Virusun yeni forması qonşu ölkələrdə də müşahidə olunur. Nəzərə almalıyıq ki, təhlükə hər zaman var. Hazırki ölüm hallarına nəzər salsaq, görərik ki, onların bir çoxu yanaşı xəstəlikləri olan, yaxud yaşı çox olan xəstələrdir. Buna görə də sərt karantin tədbirləri mərhələli şəkildə aradan qaldırılmalıdı. Bu zaman yaşı 65 yaşdan yuxarı olan insanlar hələ özünü təcrid etməyə davam etməlidir. Statistikanın 50%-i Bakı şəhərində olan yoluxma hallarından ibarətdir, düşünürəm ki, Bakı şəhərinə giriş-çıxışlar da bir müddət bağlı qalsa, daha yaxşı olar. 

Virusun tamamilə aradan qalxması üçün insanların böyük əksəriyyəti vaksinasiya olunmalıdır. Əgər bu proses tam olmasa, cəmiyyət arasında virus məhv olmayacaq. Normal həyatımıza qayıtmaq istəyiriksə, vaksinasiya prosesində hər kəs iştirak etməlidir".