 |
|
“Google Maps” xidmətində ABŞ-dan olan istifadəçilər xəritədə Meksika körfəzi əvəzinə “Amerika körfəzi”, Denali dağı əvəzinə isə “Mak-Kinli dağı” coğrafi adlarına rast gələcəklər. Bu yenilik ABŞ Prezidenti Donald Trampın müvafiq fərmanı qüvvəyə mindikdən sonra tətbiq ediləcək.
Publika.az xəbər verir ki, bu barədə “Google” şirkətindən məlumat verilib.
Bildirilib ki, şirkət rəsmi dövlət mənbələrinə daxil edildikdən sonra yeni adlardan istifadə etməklə bağlı mövcud təcrübəyə sadiq qalacaq. İndiki halda söhbət coğrafi adların məlumat sistemindən (GNIS) gedir.
“Baş verəndən sonra biz tez bir zamanda ABŞ-dakı “Google Maps” xidmətini yeniləyəcəyik ki, Mak-Kinli dağı və Amerika körfəzi xəritədə görünsün”, - deyə şirkətin məlumatında qeyd olunub.
Eyni zamanda, “Google” şirkətinin bəyanatında vurğulanıb ki, Meksikadan olan istifadəçilər xəritədə ölkələrində qəbul edilmiş körfəzin əvvəlki adını görəcəklər. Çünki rəsmi adlar ölkələrə görə dəyişəndə digər dövlətlərin istifadəçiləri hər iki adı görürlər. Obyektlərin adlarının hansı ardıcıllıqla göstəriləcəyi ilə bağlı “Google” dəqiq məlumat verməyib.
"Erməni soyqırımı"nın beynəlxalq səviyyədə tanınması və pislənməsi Ermənistanın xarici siyasətinin prioriteti olmamalıdır.
Bunu Ermənistanın hakim “Vətəndaş müqaviləsi” fraksiyasının deputatı Arsen Torosyan deyib.
“Bu, müxtəlif dövlətlərin vəzifəsidir. Amma "erməni soyqırımı"nın beynəlxalq səviyyədə tanınması və pislənməsi, Ermənistanın xarici siyasətinin prioriteti olmamalıdır. Türkiyənin "erməni soyqırımı"nı tanıyacağı və ya təzminatlara razı olacağı kimi bu boş ümidlərlə, real olmayan xəyallarla nə qədər yaşaya bilərik? Əgər buna görə Ermənistanda yaşayırıqsa, məni bağışlayın, razı deyiləm. Əsas vəzifəmiz vətəndaşların rifahını, təhlükəsizliyini və bütün digər atributlarını təmin etməkdən başqa heç nə olmamalıdır. Əgər biz Ermənistanın qarşısına başqa məqsədlər qoysaq, o zaman qeyd etdiyim o mühüm keyfiyyətləri şübhə altına alacağıq”, - Torosyan deyib.
Suriya keçid hökumətinin prezidenti Əhməd Şara xalqa ilk müraciətini edərək ölkənin gələcəyi ilə bağlı mesajlar verib. Bununla yanaşı, Əhməd Şəranın ilk xarici rəsmi səfər edəcəyi ölkələr də bəlli olub.
Alınan məlumata görə, Əhməd Şara ilk xarici səfərini Səudiyyə Ərəbistanına edəcək. Növbəti səfəri isə Türkiyə olacaq. Əhməd Şara Türkiyəyə səfəri zamanı prezident Rəcəb Tayyib Ərdoğanla görüşü zamanı ən mühüm gündəm mövzusu terror təşkilatı PKK/YPG-nin Suriyada varlığı olacaq.
Onu da qeyd edək ki, Şaranın ötən həftə planlaşdırılan səfəri bəzi texniki səbəblərə görə təxirə salınıb. Şaranın yaxın iki həftə ərzində Türkiyəyə gedəcəyi gözlənilir.
İndiyə qədər Şimali Amerika və Avropanı ayrı qitələr kimi qəbul edirdik. Lakin yeni araşdırmalar bu məsələyə fərqli yanaşma gətirir. Okeanların altında düşündüyümüzdən daha mürəkkəb geoloji strukturlar olduğu ortaya çıxıb.
Yeni geoloji kəşflər və qitələrin sərhədləri
Earth.com xəbər verir ki, alimlər Qrenlandiyadan İslandiyaya və oradan Farer adalarına qədər uzanan gizli bir quru sahəsinin izlərini tapmış ola bilərlər. Bu isə qitələrin və tektonik plitələrin hələ də dəyişməkdə olduğunu göstərir.
Derbi Universitetindən Dr. Cordan Petean bu tədqiqatın aparıcı alimlərindən biridir. İsveçrə, İtaliya və ABŞ-dan olan tədqiqatçılarla birlikdə çalışan Petean İslandiyanın vulkanik təbəqələrinin altında nələrin gizləndiyini araşdırıb.
Alimlərin hesablamalarına görə, Şimali Amerika və Avrasiya plitələri düşündüyümüz kimi tam ayrılmayıb. Daha əvvəl bu ayrılmanın 52 milyon il əvvəl tamamlandığı güman edilirdi. Lakin yeni məlumatlar bu prosesin hələ də davam etdiyini göstərir.
Dr. Petean bildirir ki, qitələrin təkamülü ilə bağlı mövcud nəzəriyyələr dəyişə bilər: "Bu plitələr hələ də hərəkətdədir və parçalanmağa davam edir".
İslandiya və Afrika arasındakı oxşarlıqlar
Araşdırmalar göstərir ki, İslandiyadakı geoloji proseslər Afrika qitəsindəki Rift Vadisi ilə oxşarlıq təşkil edir. Alimlər "Yarılmış Okean Maqmatik Platosu" (ROMP - Rifted Oceanic Magmatic Plateau) adlı yeni bir termin də təqdim ediblər. Bu anlayış, okean dibi təbəqələrinin və plitələrin necə formalaşdığını anlamağımıza kömək edə bilər.
Bəzi tədqiqatçılar hesab edirlər ki, İslandiyanın altında qədim qitə qabığı parçaları mövcud ola bilər. Bu isə bölgənin geoloji tarixini daha da mürəkkəbləşdirir. Dr. Petean bu kəşfləri "Atlantidanı tapmağa" bənzədib.
Yeni "mikro-qitə" kəşfi
Maraqlı bir başqa kəşf isə Kanada ilə Qrenlandiya arasındakı Davis boğazında yerləşən təxminən 400 km uzunluğunda bir mikro-qitədir.
Bu bölgənin 60 milyon il əvvəl formalaşdığı və plitə hərəkətlərinin kiçik quru parçalarının necə meydana gəldiyini anlamağımıza kömək edə biləcəyi bildirilib. Alimlər bu mikro-qitəni peyk məlumatları və seysmik metodlarla müəyyən ediblər.
Bu kəşflər niyə vacibdir?
Bu araşdırmalar sadəcə nəzəri elmi müzakirələr deyil. Plitə hərəkətlərinin və gizli quru parçalarının öyrənilməsi, bir sıra real problemlərin həllinə kömək edə bilər:
Təbii ehtiyatların kəşfi - Yeni qitə strukturlarının aşkarlanması, yeraltı sərvətlərin və enerji mənbələrinin xəritələnməsinə yardım edə bilər.
Zəlzələ və vulkan təhlükəsinin qiymətləndirilməsi - Plitə hərəkətləri daha yaxşı anlaşılsa, təbii fəlakətlərin proqnozlaşdırılması mümkün ola bilər.
Təmiz enerji mənbələrinin inkişafı - Məsələn, İslandiya geotermal enerjinin liderlərindən biridir. Yeni geoloji biliklər başqa bölgələrdə də alternativ enerji mənbələrinin istifadəsinə imkan aça bilər.
Bu araşdırmalar yer qabığının hələ də formalaşmaqda olduğunu və qitələrin sərhədlərinin zamanla dəyişə biləcəyini sübut edir. Beləliklə, gələcəkdə 7 qitə modeli yenidən nəzərdən keçirilə bilər və bəzi bölgələr fərqli qitə statusu ala bilər. / Qaynarinfo
2020-ci il müharibəsindən sonra Ermənistanda hökm sürən hissləri indi Avropa yaşayır.
Bu barədə politoloq Stepan Danielyan yazıb.
Onun sözlərinə görə, Avropa məsələnin əsl mahiyyətini Bayden dövründə başa düşməli idi: “Onlar Rusiyanın enerji resurslarından və Rusiya vasitəsilə Çinlə ticarət kommunikasiyalarından məhrum edildilər”.
Politoloqun fikrincə, pozulan balans nəticəsində Avropa qeyd-şərtsiz ABŞ-nin qucağına düşdü. "Bir sözlə, Bayden Trampın çılpaq imperializminə pəncərə açıb", - o qeyd edib.
Politoloq bildirib ki, artıq himayədarlıq və sponsorluq yoxdur, yalnız maraqlar, quru gəlir və vəhşi kapitalizm var: "Əgər himayə və ya müdafiə olunmaq istəyirsinizsə, heç olmasa bədəninizin bəzi hissələri ilə xidmət göstərməyə və ödəməyə hazır olmalısınız. Bir ölkənin suverenlik dərəcəsi geyim ölçüsü ilə müəyyən edilir. Artıq beynəlxalq nizam yox, güclülərin hökmranlığı var. Ermənistan Türkiyənin təsir agentlərinin rəhbərliyi altında özünü məhv etmək üçün Türkiyəyə doğru gedir. Artıq Avropanın müstəqillik şansları müəyyən çərçivələr daxilindədir.
Reallıq nə qədər acı olsa da, onunla üz-üzə gəlmək lazımdır və nə qədər tez olsa, reallığın vurduğu zərbənin gücü bir o qədər zəif olar”, - deyə o yazıb.
Gürcüstan Ermənistanla Azərbaycan arasında münasibətlərin normallaşmasına kömək etməyə hazırdır.
Bunu Gürcüstanın xarici işlər naziri Maka Boçorişvili İrəvanda erməni həmkarı Ararat Mirzoyanla birgə mətbuat konfransında bildirib
Boçorişvili bildirib ki, Gürcüstan regionda sabitlik və sülhə sadiqdir. "Bu məqsədə çatmaq üçün regionda sülh, sabitlik və firavanlıq hökm sürməlidir", - o qeyd edib.
Gürcü nazir ümidvar olduğunu bildirib ki, Ermənistan və Azərbaycan arasında sülh müqaviləsi hər iki tərəf üçün məqbul olacaq və sülh və sabitliyə nail olmağa imkan verəcək. Gürcüstan öz növbəsində bu istiqamətdə qonşuları ilə əməkdaşlığa hazırdır.
Gürcü nazir onu da qeyd edib ki, onlar regionda təhlükəsizlik çağırışlarından danışarkən Gürcüstanın bölgələrini işğal etmiş Rusiyadan qaynaqlanan çağırışları qeyd etməlidirlər.
Anti-Azərbaycan və anti-türk mövqeyi ilə məşhur olan ABŞ-nin Nyu Cersi ştatının keçmiş senatoru Bob Menendes rüşvət və korrupsiya ittihamlarında təqsirli bilinərək 1 il müddətinə azadlıqdan məhrum edilib.
Manhettendə federal məhkəmədə keçirilən iclasda hakim Sidney Stein Menendesin hökmünü elan edib.
Hakim Stein bildirib ki, Menendes vəzifəsindən sui-istifadə edərək xarici ölkələrə işləməklə yanaşı, qızıl külçələr, nağd pul, dəbdəbəli avtomobillər və digər rüşvətlər aldığı üçün 11 il həbs cəzasına məhkum edilib.
Hakim məhkəmədə çıxışında Menendes haqqında bunları deyib:
"Uğurlu idin, qüdrətli idin, siyasi sistemimizin zirvəsində dayandın. Amma yolunu azdın və ümumi rifah üçün çalışmaq əvəzinə öz şəxsi mənfəətin üçün çalışdın. Siz korrupsioner siyasətçi oldunuz".
71 yaşlı Menendes məhkəmə qərarından kövrələrək ağlayıb.
11 illik həbs cəzası ilə Menendes ABŞ tarixində ən uzun müddətə məhkum olunmuş keçmiş senator kimi tarixə düşüb.
Qeyd edək ki, məhkəmə rüşvət və korrupsiya ittihamları ilə mühakimə olunan ABŞ Senatının xarici əlaqələr komitəsinin keçmiş sədri və Nyu Cersi senatoru Menendesi 2024-cü il iyulun 16-da təqsirli bilərək, onu 16 ayrı-ayrı ittihamın hamısında günahkar olduğuna qərar verib. Məhkəmənin qərarından sonra Menendes 21 avqust 2024-cü ildə ABŞ Senatında 18 il, 7 ay və 4 gün olmaqla Nyu Cersi tarixində ən uzun müddət işləyən dördüncü senator vəzifəsindən istefa vermək məcburiyyətində qalıb.
“Qarabağ müharibəsi nəticəsində Azərbaycan özünü əvvəlkindən qat-qat artıq müstəqil fəaliyyətə qadir hiss edir. 10 il əvvəl Putin bir telefon zəngi ilə Ermənistanla Azərbaycan arasında istənilən münaqişəni dayandıra bilərdi. İndi Bakının Ankara ilə sıx əlaqəsi var. Bundan əlavə, Qərbin İrana münasibəti yaxşılaşmır və Azərbaycan da bundan istifadə edərək özünü daha rahat hiss edir”.
Bunu politoloq Aleksandr İskəndəryan deyib.
Onun sözlərinə görə, 44 günlük müharibə nəticəsində Rusiya Cənubi Qafqazda hegemon olmaqdan çıxdı, bundan sonra Azərbaycan Türkiyəni bölgəyə buraxdı. "Bu, Bakının imkanlar pəncərəsinin genişlənməsinə səbəb oldu", - o qeyd edib.
Moskva-Bakı münasibətlərinə toxunan İskəndəryan deyib ki, bu gün Azərbaycan Rusiya üçün Ermənistandan daha dəyərlidir.
Zəngəzur dəhlizi ilə bağlı Azərbaycan Prezidenti İlham Əliyevin səsləndirdiyi fikri şərh edən erməni politoloq deyib ki, bu, Ermənistana təzyiqlərin davam etməsi deməkdir.
"Azərbaycanın məqsədi dəhlizi tələb etməklə yanaşı, həm də beynəlxalq vəziyyət imkan verdiyi müddətcə Ermənistana təzyiq göstərməkdir. Azərbaycanın əsl məqsədi sülh və ya hətta dəhliz deyil, Ermənistanın mümkün qədər zəif olması və xarici siyasətinin Bakıdan asılı olmasıdır. Demək istəyir ki, Ermənistan nəyisə istəyirsə, Londona, Parisə, Moskvaya yox, onun yanına getsin ki, erməninin bəzi tələblərini təmin etmək və ya təmin etməmək üçün göstərişlər versin.
Onu da qeyd edim ki, Zəngəzur dəhlizi iqtisadi deyil, geosiyasi layihədir", - o qeyd edib.
Müharibə ehtimalına gəlincə, o bildirib ki, bu, bəyanatlardan və ya müqavilələrdən asılı deyil.
Vaşinqtonun Reyqan Milli Hava Limanı yaxınlığında sərnişin təyyarəsi “Blackhawk” helikopteri ilə toqquşaraq Potomak çayına düşüb.
Bu barədə “CNN“ məlumat yayıb.
Məlumata görə, təyyarənin göyərtəsində 64 nəfər olub, onlardan dördü ekipaj üzvüdür. Helikopterdə isə 3 hərbçinin olduğu məlumdur.
Qəzaya uğrayan təyyarədə azı 4 nəfər sağ qalıb, onlar xəstəxanaya aparılıb.
Polis ölənlərin sayını açıqlamadan bir neçə cəsədi çaydan çıxarıb.
Merilend rəsmiləri qəza yerinə dalğıclar göndərib.
FTB-nin Vaşinqtondakı yüksək rütbəli rəsmisinin sözlərinə görə, baş verən hadisədə terror əlaməti yoxdur.
Əhməd əl-Şaraa keçid dövründə Suriya Prezidenti vəzifəsini icra edəcək.
APA xəbər verir ki, bu barədə “Reuters“ məlumat yayıb.