 |
|
Azərbaycan Prezidenti İlham Əliyev Ukraynanın Prezidenti Volodimir Zelenskiyə təbrik məktubu ünvanlayıb.
Məktubda deyilir:
"Hörmətli cənab Prezident,
Ukraynanın milli bayramı – Müstəqillik Günü münasibətilə Sizi və Sizin simanızda bütün xalqınızı öz adımdan və Azərbaycan xalqı adından səmimi-qəlbdən təbrik edirəm.
Xalqlarımızı birləşdirən çoxəsrlik möhkəm dostluq və qarşılıqlı rəğbət hissləri dövlətlərarası əlaqələrimizi və əməkdaşlığımızı şərtləndirən başlıca amillərdəndir. Diplomatik münasibətlərimizin qurulduğu ötən otuz illik dövr ərzində qarşılıqlı faydalı əməkdaşlığımızın dinamik və ardıcıl inkişaf edərək strateji tərəfdaşlıq səviyyəsinə yüksəlməsi məmnunluq doğurur.
Cari ilin yanvarında Ukraynaya etdiyim işgüzar səfəri, Sizinlə görüşümüzü və apardığımız danışıqları xoş təəssüratlarla xatırlayır, bu səfəri ölkələrimiz arasında əlaqələrin genişlənməsi baxımından əhəmiyyətli hesab edirəm.
Beynəlxalq hüququn norma və prinsiplərini, BMT Nizamnaməsini rəhbər tutaraq Azərbaycan bütün dövlətlərin, o cümlədən Ukraynanın ərazi bütövlüyünə və suverenliyinə hörmətlə yanaşır. Biz Ukrayna xalqına humanitar məsələlərdə bundan sonra da yardım göstərməyə davam edəcəyik.
Əminəm ki, Azərbaycan ilə Ukrayna arasındakı ənənəvi dostluq münasibətləri, səmərəli əməkdaşlığımız xalqlarımızın və ölkələrimizin mənafelərinə uyğun olaraq birgə səylərimizlə bundan sonra da genişlənəcəkdir.
Sizi bir daha ürəkdən təbrik edir, möhkəm cansağlığı, dost Ukrayna xalqına sülh və əmin-amanlıq diləyirəm".
Avqustun 24-də Qazaxıstan Respublikasının Prezidenti Kasım-Jomart Tokayevin rəsmi qarşılanma mərasimi olub.
"Yol-xeber.az" xəbər verir ki, hər iki ölkənin Dövlət bayraqlarının dalğalandığı meydanda Qazaxıstan Respublikasının Prezidentinin şərəfinə fəxri qarovul dəstəsi düzülüb.
Azərbaycan Respublikasının Prezidenti İlham Əliyev Qazaxıstan Respublikasının Prezidenti Kasım-Jomart Tokayevi qarşılayıb.
Fəxri qarovul dəstəsinin rəisi Qazaxıstan Respublikasının Prezidentinə raport verib.
Prezident İlham Əliyev və Prezident Kasım-Jomart Tokayev fəxri qarovul dəstəsinin qarşısından keçiblər.
Prezident Kasım-Jomart Tokayev Azərbaycan əsgərlərini salamlayıb.
Qazaxıstan Respublikasının və Azərbaycan Respublikasının Dövlət himnləri səsləndirilib.
Azərbaycan nümayəndə heyəti Qazaxıstan Prezidentinə, Qazaxıstan nümayəndə heyəti isə Azərbaycan Prezidentinə təqdim olunub.
Fəxri qarovul dəstəsi hərbi marşın sədaları altında Azərbaycan Prezidenti İlham Əliyevin və Qazaxıstan Prezidenti Kasım-Jomart Tokayevin qarşısından keçib.
Dövlət başçıları rəsmi foto çəkdiriblər.
Qazaxıstan Prezidenti Kasım-Jomart Tokayev bu gün Azərbaycana səfərə gəlir.
Bu barədə Qazaxıstan Prezidentinin mətbuat xidməti məlumat yayıb.
Bildirilib ki, səfər çərçivəsində ticari-iqtisadi, nəqliyyat, logistika, mədəni-humanitar əməkdaşlığın genişləndirilməsi, həmçinin strateji tərəfdaşlığın inkişafı məsələləri müzakirə olunacaq.
Eyni zamanda iki ölkə arasında bir neçə sənədin imzalanması da gözlənilir.
Azərbaycan Hökuməti ilə Özbəkistan Hökuməti arasında qanunsuz miqrasiyaya qarşı mübarizə sahəsində, sənaye sahəsində, hərbi sahədə və regionlararası əməkdaşlıq haqqında Saziş təsdiqlənib.
"Bu barədə Prezident İlham Əliyev müvafiq fərmanlar imzalayıb.
Qeyd edək ki, həmin sənədlər 2022-ci il iyunun 21-də Daşkənd şəhərində imzalanıb.
Bundan əlavə, dövlət başçısının daha bir fərmanı ilə 2022-ci il iyunun 20-də Daşkənd şəhərində imzalanmış “Azərbaycan Respublikasının Milli Arxiv İdarəsi ilə Özbəkistan Respublikasının “Özarxiv” Agentliyi arasında arxiv işi sahəsində əməkdaşlıq haqqında Saziş” təsdiq edilib.
Prezident İlham Əliyev Bakı şəhərinin Nəsimi rayonu ərazisində avtomobil yollarının yenidən qurulması işlərinin davam etdirilməsi ilə bağlı bəzi tədbirlər haqqında Sərəncam imzalayıb.
Sərəncamla Bakı şəhərinin Nəsimi rayonu ərazisində avtomobil yollarının yenidən qurulması işlərinin davam etdirilməsi məqsədilə “Azərbaycan Respublikasının 2022-ci il dövlət büdcəsində dövlət əsaslı vəsait qoyuluşu (investisiya xərcləri) üçün nəzərdə tutulan vəsaitin bölgüsü”nün 1.26.18-ci yarımbəndində göstərilmiş məbləğin 2,2 milyon manatı Azərbaycan Avtomobil Yolları Dövlət Agentliyinə ayrılıb.
Azərbaycan Prezidenti İlham Əliyev, Rusiya Prezidenti Vladimir Putin və Ermənistan Baş naziri Nikol Paşinyanın növbəti üçtərəfli görüşü avqustun 31-də Moskvada baş tuta bilər.
Bu barədə Ermənistanın “Hraparak” nəşri yazıb.
“Rusiya dairələrindən alınan məlumata görə, İlham Əliyev bu görüşdə Zəngəzur dəhlizi haqda məsələni qaldıracaq. Rusiyalılar hesab edir ki, Əliyev qətiyyətlidir və Paşinyanın vədlərinə inanmaq və ona vaxtı uzatmağa imkan vermək niyyətində deyil”, - nəşr qeyd edib.
Qeyd edək ki, avqustun 19-da Azərbaycan Prezidentinin köməkçisi Hikmət Hacıyev və Ermənistan Təhlükəsizlik Şurasının katibi Armen Qriqoryanla görüşüb.
Müzakirələr Avropa İttifaqının Cənubi Qafqaz və Gürcüstan böhranı üzrə xüsusi nümayəndəsi Toyvo Klaarın vasitəçiliyi ilə baş tutub. Hikmət Hacıyevlə Armen Qriqoryanın Azərbaycan Prezidenti və Ermənistanın Baş naziri arasında keçiriləcək görüşün detalları ilə bağlı bir sıra məsələləri razılaşdırdığına dair məlumat yayılıb. Bu isə Moskva danışıqlarında hər hansı sənədin imzalanacağı barədə proqnozları meydana çıxarıb. Xüsusilə də Nikol Paşinyanın yaxın günlərdə Zəngəzur dəhlizinin açılmasını elan edəcəyi xəbər verilir. Digər anlaşma Ermənistan silahlı birləşmələrinin Azərbaycan ərazisindən çıxarılması barədə ola bilər.
Əslində, bu öhdəlik 2020-ci il 10 noyabr Bəyanatının 4-cü bəndində nəzərdə tutulduğuna görə, yeni bir sənədin imzalanmasına ehtiyac yoxdur. Sadəcə, Azərbaycan sülh prosesinə mane olan səbəblərdən biri kimi bu problemin icrasını danışıqların əsas şərti kimi növbəti dəfə qaldıra bilər. Ona görə də Moskva görüşündə bu və ya digər razılaşmanın əldə olunacağına dair gözləntilər var. Dia.az-ın məlumatına görə, politoloq Teymur Qasımlı Cebhe.info-ya açıqlamasında bildirib ki, mövcud situasiyada Ermənistanın danışıqlar yolu ilə üzərinə düşən öhdəlikləri yerinə yetirəcəyi inandırıcı görünmür. Ona görə də Azərbaycan tərəfi Ermənistanı sülhə məcbur etməlidir:
“Azərbaycan Prezidentinin köməkçisi ilə Ermənistan Təhlükəsizlik Şurasının Brüsseldəki görüşü Avropa İtifaqının nümayəndəsi Toyvo Klaarın vasitəçiliyi ilə baş tutub.
Bunun Rusiyaya aidiyyatı yoxdur. Müzakirələrdə müsbət nəticələrin əldə olunduğu deyilsə də, mətbuata açıqlanmayıb. Prezident İlham Əliyev və Baş nazir Nikol Paşinyanın avqustun 31-də Moskvada görüşəcəyi haqda məlumatı isə Ermənistan mətbuatı yayıb. Yəni bu məlumat Azərbaycan tərəfindən rəsmən təsdiqlənməyib. Avqustun 31-ə hələ vaxt var. Ona görə də bu barədə dəqiq fikir söyləmək çətindir. Ermənistan mediası onu yazır ki, Zəngəzur dəhlizi məsələsi ilə bağlı İlham Əliyev masada çox qəti mövqe nümayiş etdirəcək və Ermənistandan bunu yerinə yetirməyi tələb edəcək. Moskva görüşündə Zəngəzur dəhlizi məsələsi gündəmə gəlsə belə, mən bunun yaxın müddətdə həll olunacağına inanmıram. Çünki İran buna kəskin etiraz edir. İran Zəngəzur dəhlizini özünün milli təhlükəsizlik və dövlət maraqlarına zidd hesab edir. Ona görə də yaxın müddətdə Zəngəzur dəhlizinin açılacağını düşünmürəm. Azərbaycan Prezidenti qeyd etdiyi kimi Ermənistan Zəngəzur dəhlizini istəmirsə, Azərbaycan da Laçın dəhlizini ləğv etməlidir.
Qeyri-qanuni silahlı birləşmələrin Azərbaycan ərazisindən çıxarılmasına gəlincə, bunu reallıqdan uzaq sayıram. Ermənistan son iki ildə silahlı birləşmələrin çıxarılacağına dair çox vədlər verib, amma əməl etməyib. Həmin bölgəyə səfər edən jurnalist Eynulla Fətullayevin açıqlamasına görə, sülhməramlıların polkovniki rəsmən ona deyib ki, hamının evində silah var. Ona görə də oradakı qanunsuz silahlı birləşmələrin çıxarılacağına inanmıram. Erməni silahlılarının mövcudluğuna son qoyulması yalnız “Qisas” əməliyyatında olduğu kimi Azərbaycan ordusunun güc tətbiq etməsi yolu ilə təmin edilə bilər. Bu səbəbdən, Moskva görüşü olsa belə, bunu Avropa İttifaqının danışılardakı moderatorluğuna qarşı Moskvanın alternativ addımı kimi dəyərləndirirəm. Biz özümüzü aldatmamalıyıq. Rusiya Azərbaycanla Ermənistan arasında münaqişənin bitməsini istəmir. Azərbaycan yalnız antiterror əməliyyatı aparmaqla Ermənistandan öz istədiyini ala bilər”.
Ötən həftənin diqqət çəkən siyasi olaylarından biri də Azərbaycan Prezidentinin köməkçisi Hikmət Hacıyevlə Ermənistan Milli Təhlükəsizlik Şurasının katibi Armen Qriqoryan arasında Brüssel görüşü oldu. Sayca ikinci olan bu təmas barədə Avropa Birliyinin Cənubi Qafqaz üzrə xüsusi nümayəndəsi Toivo Klaar xəbər versə də, nə rəsmi Bakı, nə də rəsmi İrəvan təfərrüatı açıqlamadı. Klaar yalnız “yaxşı və əsaslı müzakirələrimiz oldu”, - deyə öz twitter hesabında yazdı.
İstisna deyil ki, müzakirələr Prezident İlham Əliyevlə baş nazir Nikol Paşinyan arasında növbəti Brüssel görüşü ilə bağlı olub. Hər halda, Avropa İttifaqı Şurasının Prezidenti Şarl Mişel az öncə növbəti belə bir görüşün anonsunu vermişdi. Maraqlıdır ki, bu ərəfədə Rusiya tərəfinin də Azərbaycan və Ermənistan liderlərinin Moskva görüşünü təşkil edə biləcəyi barədə məlumat yayılıb. Hətta konkret tarix də deyilir - 31 avqust.
Lakin iki ölkə rəsmiləri arasında yüksək səviyyəli təmasların harada keçirilməsindən asılı olmayaraq, fakt budur ki, Ermənistan rəhbərliyi gündəmi öz xeyrinə dəyişməyə çalışır, cığallıq edir, sülh danışıqlarına hələ də ciddi yanaşmır, danışıqları imitasiya edir. Buna sırf vaxt uzatmaq, revanş üçün fürsət qazanmaq vasitəsi kimi baxır. Bu isə ən əvvəl elə erməni tərəfinə böyük risk vəd edir. Çünki Bakı rəsmi İrəvanın siyasi hoqqabazlığının hara apardığının yaxşı fərqindədir və İrəvana “revanş lüksü” tanımaq niyyətində deyil.
Tam əksinə, Paşinyan hökumətinin sülh oyunlarından təngə gələn Azərbaycan və onun Prezidenti Moskvada və ya Brüsseldə baş tutmasından asılı olmayaraq, növbəti yüksək səviyyəli görüşdə bu dəfə məsələni mütləq sərt qoymağa hazırlaşır. Söhbət İrəvanın hər şeydən öncə 10 noyabr sənədinin yerinə yetirmədiyi bəndlərindən - erməni silahlı qüvvələrinin ərazimizdən çıxarılması və Zəngəzur dəhlizi ilə bağlı öhdəlikdən gedir.
Söz düşmüşkən, “hazırda Rusiya və Türkiyə arasında Zəngəzur dəhlizi ilə bağlı intensiv müzakirələr gedir”. Bunu Türkiyənin ticarət nazirinin müavini, Gömrük Departamentinin rəisi Reza Tunu Turağay deyib. Onun sözlərinə görə, Türkiyə Azərbaycanla ticarət dövriyyəsinin həcmini 5 milyard dollardan 15 milyard dollara çatdırmağı planlaşdırır ki, bu da Zəngəzur dəhlizinin vaxtında açılmasını vacib edir. “Zəngəzur dəhlizinin açılması Türkiyəyə ”Azərbaycana, oradan da Orta Asiya ölkələrinə çıxış əldə etmək, ticarət həcmini artırmaq baxımından üstünlük verəcək. Biz dəhlizin çox yaxın vaxtlarda açılacağını gözləyirik", - deyə nazir müavini bildirib.
“Hraparak” erməni nəşri isə bu xüsusda belə yazır: “Azərbaycan Prezidenti İlham Əliyev, Rusiya Prezidenti Vladimir Putin və Ermənistan Baş naziri Nikol Paşinyanın növbəti üçtərəfli görüşü avqustun 31-də Moskvada baş tuta bilər. Rusiya dairələrindən alınan məlumata görə, İlham Əliyev bu görüşdə Zəngəzur dəhlizi məsələni sərt şəkildə qaldıracaq. Rusiyalılar hesab edir ki, Əliyev qətiyyətlidir və Paşinyanın vədlərinə inanmaq və ona vaxtı uzatmağa imkan vermək niyyətində deyil”.
“Ermənistanın hərbi revanş imkanı yoxdur. Və heç kim də ona bu imkanı verməyəcək. Di gəl, erməni xadimlər erməni cəmiyyətinin bir hissəsinə bu ümidləri sırımağa davam edir”.
“Yeni Müsavat”ın məlumatına görə, bunu da rusiyalı politoloq Aleksandr Perendciyev deyib.
Onun sözlərinə görə, Cənubi Qafqazdakı situasiya hər hansı revanşı istisna edir. “Gələcəkdə artıq Çin sayəsində inkişaf edən yeni qlobal iqtisadi modelə qoşulmaq məsələsi ortaya çıxacaq. Çinin ”Bir kəmər, bir yol" layihəsini və “Şimal-Cənub” beynəlxalq nəqliyyat dəhlizini xatırlayın. Cənubi Qafqazdakı kommunikasiyalar bütün bu planın tərkib hissəsidir. Rusiya-Azərbaycan-Ermənistan üçtərəfli hökumət komissiyası boşuna yaradılmayıb", - deyə ekspert İrəvanı ağlını başına yığmağa və reallıqla barışmağa çağırıb.
Digər rusiyalı politoloq, daha çox ermənipərəst mövqeyi ilə tanınan Stanislav Tarasov isə erməni mətbuatına müsahibəsində gözlənilmədən “Qarabağ Azərbaycandır” deyib (Axar.az).
“Bakı Qarabağ ermənilərinin taleyini yalnız özü həll edir. Bunun üçün Bakıya nə Minsk Qrupu, nə də İrəvan lazımdır. Çünki Qarabağ Azərbaycan ərazisidir! Bütün Dağlıq Qarabağ Azərbaycandır! Rus sülhməramlılar da Azərbaycan ərazisində müvəqqəti yerləşdirilib. Bir də deyirəm ki, Qarabağ ermənilərinin taleyi yalnız Bakının əlindədir”, - Tarasov qeyd edib.
Öz növbəsində erməni rejissor və ictimai xadim Ohanes Qalstyan hesab edir ki, sentyabr ayı Ermənistan dövləti və ümumilikdə erməni xalqı üçün kulminasiya ayı olacaq.
Fikrini o, belə izah edib: “Ən ciddi proseslər məhz bu ay baş verəcək. Bu proseslərdən dərhal sonra Azərbaycan, türk maşınları İrəvan küçələrində şütüyəcək, Xankəndiyə nəzarət Bakıya keçəcək və bundan nəinki Azərbaycan xalqı, hətta Qarabağda yaşayan ermənilər də sevinəcək. Onlar aclıq, səfalət, işsizlikdən çıxıb işıqlı, gözəl həyata qədəm qoyacaq. Ermənistan hakimiyyətinin onlara verə bilmədiyini Bakı verəcək”.
Qalstyana görə, İrəvanın ticarət mərkəzindəki partlayış ümumilikdə Ermənistanda sentyabrda olacaq böyük “partlayışın” kiçik modelidir. “Biz hazırda bomba üzərində oturmuşuq. Ermənistanın qorxulu yuxusu çox davam edə bilməz, yaxın vaxtlarda biz yeni fazaya qədəm qoyacağıq. Orada necə olacağı isə özümüzdən asılıdır”, - deyə o fikrini tamamlayıb.
***
Demək, hər şey yenə məhz ermənilərin özündən, onların seçimindən asılı olacaq. Yəqin ki, tarix onlara bir də belə şans tanımayacaq...
“Yeni Müsavat”
“Azərbaycan Laçın dəhlizinə paralel yeni bir yol inşa etdi. Artıq Laçın şəhəri və ətraf ərazilər boşaldılmalıdır. Amma biz nə müşahidə edirik?.. Təəssüf ki, orada olan ermənilər, əvvəl olduğu kimi, ətrafı dağıdaraq geri çəkilirlər”.
Bunu Türkiyənin xarici işlər naziri Mövlud Çavuşoğlu “Haber Global” telekanalına müsahibəsində deyib.
Azərbaycan Prezidentinin köməkçisi Hikmət Hacıyevin Ermənistan Milli Təhlükəsizlik Şurasının katibi Armen Qriqoryanla ötən həftəsonu Brüsseldə bir araya gəldiyi haqda məlumat verilib. Bu barədə Avropa Birliyinin Cənubi Qafqaz üzrə xüsusi nümayəndəsi Toivo Klaar tvitterdə yazıb.
“Brüsseldə Azərbaycan-Ermənistan münasibətləri və Aİ-nin prosesdə iştirakı ilə bağlı Hikmət Hacıyev və Armen Qriqoryan ilə yaxşı və əsaslı müzakirələrimiz oldu”, - paylaşımda deyilir. Lakin görüşün təfərrüatı açıqlanmır. Hacıyev və Qriqoryan belə bir formatda Brüsseldə ikinci dəfədir görüşürlər. Bu, Prezident İlham Əliyevlə baş nazir Nikol Paşinyan arasında Brüsseldə növbəti yüksək səviyyəli görüşün gündəliyi ilə bağlı ola bilərmi? Erməni ekspertlərdən biri iddia edib ki, belə görüşlər Rusiyanı Güney Qafqazdan sıxışdırıb çıxarmaq niyyəti güdür. Yəni region uğrunda rəqabət məsələsi...
Maraqlıdır ki, bu ərəfədə Rusiya tərəfinin də Azərbaycan və Ermənistan liderlərinin Moskva görüşünü təşkil edə biləcəyi barədə məlumat yayılıb. Hətta konkret tarix də deyilir - 31 avqust. Başqa ehtimallara görə, Brüsseldə əsas diqqət mərkəzində Laçın şəhəri və ətraf kəndlərinin boşaldılması və Zəngəzur dəhlizi ilə bağlı Ermənistanın götürdüyü öhdəliyin yerinə yetirməsini sürətləndirmək məsələləri olub.
Belə bir informasiya da var ki, hazırda Rusiya və Türkiyə Zəngəzur dəhlizi ilə bağlı intensiv müzakirələri davam etdirir. Türkiyənin ticarət nazirinin müavini, Gömrük Departamentinin rəisi Reza Tunu Turağay belə deyib. Onun sözlərinə görə, Türkiyə Azərbaycanla ticarət dövriyyəsini indiki 5 milyard dollardan gələcəkdə 15 milyard dollara çatdırmağı planlaşdırır və bu baxımdan Zəngəzur dəhlizinin vaxtında açılması vacibdir.
“Zəngəzur dəhlizinin açılması Türkiyəyə Azərbaycana, oradan da Orta Asiya ölkələrinə çıxış əldə etmək, ticarət həcmini artırmaq baxımından üstünlük verəcək. Biz dəhlizin çox yaxın vaxtlarda açılacağını gözləyirik”, - deyə nazir müavini bildirib.
Lakin bu kimi pozitiv gəlişmələrə, sülh təşəbbüslərinə rəğmən, Bakı-İrəvan danışıqlarında hələ də ciddi irəliləyiş gözə dəymir. Erməni tərəfi hansı sahə olur-olsun, orada cığallıq edir, anlaşmalara riayət eləmir, vaxtı uzatmağa çalışır. O sırada delimitasiya ilə bağlı heç bir irəliləyiş yoxdur. Üstəlik, düşmən sərhəddə daima gərginlik yaradır. Hətta sülhməramlıların olduğu ərazidən əsgərlərimizə atəş açırlar.
Digər tərəfdən, Ermənistan hər cür fitnə-fəsada əl atır ki, sülh prosesini uzatsın. Rəsmi Bakının israrlı tələblərinə baxmayaraq, mina xəritələrinin Azərbaycana təhvil verilməsi istiqamətində də hər hansı addım atılmır. Təkcə son azad edilmiş yüksəkliklərdə mindən artıq Ermənistan istehsalı olan minanın aşkarlanması da rəsmi İrəvanın sülhə qarşı olduğunu təsdiqləyir. Özü də bu minalar 2021-ci il istehsalıdır və deməli, son ildə basdırılıb. Hansı ki, İrəvan 2020-ci ildən sonra bir neçə dəfə rəsmi və qeyri-rəsmi səviyyədə öhdəliklər götürüb. Azərbaycan Respublikasının Minatəmizləmə Agentliyi (ANAMA) işğaldan azad edilmiş ərazilərdə minatəmizləmə əməliyyatları barədə həftəlik olan məlumatı açıqlayıb. ANAMA-dan “Yeni Müsavat”a bildirilib ki, avqustun 15-dən 20-nə qədər Tərtər, Ağdam, Füzuli, Şuşa, Qubadlı, Cəbrayıl və Zəngilanda 239 piyada əleyhinə mina, 140 tank əleyhinə mina və 125 Partlamamış Hərbi Sursat (PHS) aşkarlanıb. Bildirilib ki, 562 hektar ərazi mina və PHS-lərdən təmizlənib.
Bu arada Laçında 2 hərbçimiz minaya düşüb. Qubadlı Hərbi Prokurorluğundan verilən məlumatda qeyd olunub ki, 2 hərbçimizin Laçında minaya düşərək müxtəlif dərəcəli bədən xəsarətləri alması faktı ilə bağlı Qubadlı Hərbi Prokurorluğunda araşdırma aparılır. Müdafiə Nazirliyinin hərbi qulluqçuları Vüqar Süleymanovun avqustun 20-də, Heydər Gülmalıyevin isə avqustun 21-də işğaldan azad olunmuş Laçın rayonunun ərazisində minaya düşmələri nəticəsində müxtəlif dərəcəli bədən xəsarətləri almaları ilə bağlı Qubadlı hərbi prokurorluğunda araşdırma aparılır. Mina xəritələrini verməkdən imtina siyasəti Ermənistanın düşmənçilik xəttini seçdiyinə növbəti sübutdur. Ancaq bunlar da son deyil. Belə ki, Ermənistan aparılan sülh danışıqları fonunda belə öz çirkin niyyətlərini davam etdirir. Məlumatlara görə, İrəvanda “Ermənistan” partiyasının nümayəndələri səkidəki ağaclara Qarabağla bağlı şüarlar olan vərəqələr yapışdırıblar. Vərəqələrdə “Tiraspol Rusiyadır, Mariupol Rusiyadır, Krım Rusiyadır, Donetsk Rusiyadır, Luqansk Rusiyadır, Sxinvali Rusiyadır, ”Artsax" (Qarabağ) da qoy Rusiyanın olsun" şüarı yazılıb. Şüarın məzmunundan aydın olur ki, onları yazanların məqsədi Azərbaycanla Rusiya arasında münasibətlərə xələl gətirmək olub. “Qaynarinfo” xatırladır ki, Rusiya sülhməramlılarının Qarabağın ermənilər yaşayan hissəsində sülhməramlı missiyası 5 il müddətinə nəzərdə tutulub. Ermənilər isə indiki şəraitdə Rusiya sülhməramlılarının orada uzun müddət qalmasında maraqlıdır. İrəvanda gündəmə gətirilən bu şüarlar ermənilərin yeni koridorun işə salınması fonunda Laçın şəhərini, Zabux və Sus kəndlərini tərk etmələri ərəfəsində baş verir. Belə ki, ermənilər həmin ərazilərlə bağlı Azərbaycan hökumətinin atdığı doğru və qəti addımlara Rusiya sülhməramlılarının cavab verəcəyini və onun qarşısını alacağını düşünürdü. Lakin göründüyü kimi, bu baş vermədi və sözügedən ərazidən ermənilər çıxmalı oldular. Bu olaydan təşvişə düşən bəzi erməni siyasiləri də yuxarıda qeyd olunan şüarı yaymaqla, onların təbirincə rus sülhməramlılarının hadisəyə susqun münasibətinə cavab olaraq, Bakı ilə Moskva arasında münasibətlərdə soyuqluq yaratmağı qarşılarına məqsəd qoyublar. Belə hərəkətlərilə Azərbaycanda Rusiyaya qarşı narazılıq toxumu səpib, sonda onlar arasındakı münasibətləri gərginləşdirəcəklərini düşünürlər. Gələcəkdə baş verəcək analoji hadisələr fonunda Rusiya sülhməramlılarının prosesə indiki kimi sakit tərzdə yanaşması deyil, müdaxilə etmələrinə nail olmaq istəyirlər. Belə olan surətdə nə etmək lazımdır? Ermənistan iqtidarını sülh prosesini sürətləndirməyə, sülh müqaviləsi imzalamağa necə vadar eləməli? Dia.az-ın məlumatına görə, siyasi şərhçi Elçin Mirzəbəyli mövzumuzla bağlı “Yeni Müsavat”a bildirdi ki, Avropa İttifaqı (Aİ) Şurası Prezidentinin vasitəçiliyi ilə Brüsseldə keçirilən görüşlər Rusiyanın zəmanətçi kimi iştirak etdiyi prosesə alternativ deyil: “Son nəticədə Brüsseldə keçirilən bütün görüşlərdə 10 noyabr 2020-ci il bəyanatına istinad edilir və istər sözügedən bəyanat, istərsə də bu bəyanatın ayrı-ayrı müddəalarının həyata keçirilməsi ilə bağlı imzalanan digər sənədlər Azərbaycan və Ermənistan arasında Rusiyanın vasitəçiliyi və zəmanətçi statusu ilə imzalanan yegenə sənədlərdir və məlum olduğu kimi, Aİ-nin iştirakı ilə Azərbaycan və Ermənistan arasında hər hansı bir sənəd imzalanmayıb. Məhz bu baxımdan, Aİ-nin prosesdəki roluna vasitəçi, yaxud zəmanətçi kimi yanaşmaq doğru olmazdı. Avropa İttifaqının bu günə qədər sərgilədiyi davranışlar onu deməyə əsas verir ki, rəsmi Brüssel prosesdən kənarda qalmaq istəmir, lakin Rusiyanın zəmanətçi kimi iştirak etdiyi prosesdə eyni missiya ilə iştirak edə bilməyəcəyini, həmçinin 44 günlük müharibədən sonra regionda yaranan reallıqları da yaxşı başa düşür. Digər tərəfdən, Avropa İttifaqının prosesə töhfə vermək istəyi Azərbaycanın maraqlarına zidd olmadığı, həmçinin özünü ”Minsk qrupu"nun yenidən dirilməsi cəhdlərindən kənarda büruzə verdiyi üçün rəsmi Bakını da qane edir. Avropa İttifaqı Şurası Prezidentinin iştirakı ilə aparılan danışıqların nəticəsi də sübuta yetirir ki, müzakirələr mövcud reallıqlar və rəsmi Bakının üstün, ədalətli və prinsipial mövqeyi nəzərə alınmaqla aparılır. Məhz bu baxımdan, hazırda prosesdə ölkəmizi narahat edə biləcək hansısa məqamların ortaya çıxa biləcəyini ehtimal etmirəm".
Ermənistanın öz öhdəliklərindən yayınma cəhdlərinə gəldikdə isə E.Mirzəbəyli qeyd etdi ki, məğlub tərəfin sülh müqaviləsi, delimitasiya və demarkasiya, Zəngəzur dəhlizi və digər məsələlərlə bağlı vaxtı uzatmağa cəhd göstərəcəyi, qıcıqlandırıcı addımlar atacağı öncədən də gözlənilən idi: “Ermənistanın indiki davranışları kürəyi yerə dəymiş güləşçinin gah sağ, gah da sol çiynini qaldıraraq, ”kürəyim yerə dəyməyib" görüntüsü yaratmaq cəhdinə bənzəyir. Amma hər kəs, o cümlədən Ermənistan da çox yaxşı başa düşür ki, məğlub olub və öhdəliklərini yerinə yetirməkdən başqa çarəsi yoxdur. Bu baxımdan da, indiki halda bu çarəsizliyin bütün detallarını təkrar-təkrar Ermənistan hakimiyyətinə və xalqına göstərmək lazımdır ki, müqavimətinin mənasız olduğunu sonunadək anlasın. Yəni həm diplomatik, həm də digər təzyiq elementləri daim qüvvədə olmalı, Ermənistanın seytnot vəziyyətindən çıxmasına imkan verilməməlidir. Müşahidələrimə görə, rəsmi Bakı elə bunu da edir".
Azərbaycan dövlətinin prinsipial mövqeyi isə dəyişməzdir. “Bu gün bayrağımız Qarabağda, Zəngəzurda dalğalanır, idman arenalarında da dalğalanır, əminəm ki, əbədi dalğalanacaq”. “Yeni Müsavat”ın məlumatına görə, bunu Prezident İlham Əliyev Türkiyənin Konya şəhərindəki V İslam Həmrəyliyi Oyunlarında nəticə əldə etmiş idmançılarla görüşü zamanı deyib. “Bir daha sizi ürəkdən təbrik edirəm - bütün komanda üzvlərini, medal qazanmış idmançıları, medal qazana bilməyən idmançıları. Mən onlara da deyirəm ki, peşman olmasınlar, hələ gələcəkdə bir çox yarışlar var. Sadəcə olaraq, Vətənə sevgi, öz peşəsinə sədaqət, yorulmaz fəaliyyət, hazırlıq lazımdır. Çünki hazırlıq olmadan heç bir nəticə olmur, nə siyasətdə, nə idmanda, nə həyatda. Siz artıq bir daha Azərbaycanın şöhrətini ucaltmısınız və necə ki, bu gün bayrağımız Qarabağda, Zəngəzurda dalğalanır, idman arenalarında da dalğalanır, əminəm ki, əbədi dalğalanacaq”, - dövlət başçısı əlavə edib.
Ermənistanın bu kimi mesaj və xəbərdarlıqlardan nəticə çıxartması həm də ermənilərin xilası, üstəlik, qondarma Ermənistan dövlətinin mövcudluğunu qoruyub-saxlamaq üçün vacibdir. Əks halda, “Dəmir Yumruq” növbəti cəhddə Ermənistanın varlığına son qoya bilər. Əslində biz bunu istəyirik, ermənilər də istəyirlərsə, buyursunlar...
Gürcüstanın Tbilisi şəhərində Azərbaycan, Türkiyə və Gürcüstanın nəqliyyat sektorunda məsul nazirlərinin üçtərəfli görüşü keçiriləcək.
Oxu.az xəbər verir ki, Azərbaycanın rəqəmsal inkişaf və nəqliyyat naziri Rəşad Nəbiyev gürcüstanlı və türkiyəli həmkarları ilə görüşdə iştirak etmək üçün avqustun 23-də Gürcüstana səfər edəcək.
Səfər çərçivəsində o, Gürcüstanın iqtisadiyyat və davamlı inkişaf naziri Levan Davitaşvili ilə də görüşəcək.