 |
|
Ukrayna ordusu ölkənin şərqində, Rusiyanın nəzarətində olan Luqanskın Popasna qəsəbəsində Rusiyanın özəl döyüş təşkilatı “Vaqner”in qərargahına zərbələr endirib.
Ukrayna mətbuatı xəbər verir ki, Luqansk qubernatoru Serhiy Hayday və bir neçə rusiyayönlü müharibə müxbiri hücum barədə məlumat veriblər.
“Hayday” Teleqram kanalı bazar günü Ukrayna qüvvələrinin yeri Rus jurnalistlərdən biri sayəsində təsbit edilən düşmən bazasını - Popasnadakı Vaqner qərargahını vurduğunu yazıb.
Ukraynanın gündəlik qəzeti “Pravda” rusiyalı jurnalist Sergey Sredanın avqustun 8-də Teleqramda paylaşdığı mesajda Vaqner bazasının yerini müəyyənləşdirdiyini yazıb.
Rusiyalı jurnalist bazaya gəlişinin fotolarını paylaşıb və onlardan birinin üzərindəki işarədə bunun Popasnadakı 12 nömrəli Mironovskaya olduğu bildirilir. Jurnalist postu sonradan silsə də, skrinşot internetdə yayılıb.
Yayılan məlumatlar arasında hərbi bazanın ABŞ istehsalı olan təkmil raket atıcı top sistemi HİMARS tərəfindən vurulması da var.
Ukrayna mərkəzli iddialara görə, hücumda 100-ə yaxın əsgər həlak olub. Lakin bu iddialar hələ də rəsmi orqanlar tərəfindən qəbul edilməyib.
Qeyd edək ki, Rusiyanın muzdlu hərbçi şirkəti “Vaqner” daha əvvəl hərbi cinayətlər törətməkdə ittiham olunub. Qrupa bağlı muzdlular 2014-cü ildə Krımda və Ukraynanın Donbas bölgəsində yerləşdirilib. Rusiya muzdlu təşkilatın mövcudluğunu heç vaxt etiraf etməyib, lakin Qərb ölkələrinin kəşfiyyat xidmətləri qrupun “Putinin aşpazı” ləqəbli Yevgeni Priqojin tərəfindən maliyyələşdirildiyini bildirib. "Vaqner" özəl hərbi şirkət kimi tanınır, lakin Qərb ekspertləri bu şirkətə bağlı qüvvələrin Moskvanın maraqları üçün dövlət tərəfindən dəstəklənən milislər kimi istifadə edildiyini deyirlər.
“Surmalu” ticarət mərkəzində ölənlərin sayı 16 nəfərə çatıb. Ölənlər arasında uşaq və hamilə qadın da var.
Bu barədə Ermənistan Fövqəladə Hallar Nazirliyi məlumat yayıb.
Məlumata görə, ölən 16 nəfərdən 10-nun şəxsiyyəti hələ müəyyən edilməyib.
İrəvanın tibb məntəqələrinə 60 vətəndaş müraciət edib, onlardan 12-nin müalicəsi davam edir, qalan 48 nəfər isə müvafiq tibbi yardım göstərilərək evə buraxılıb.
Ermənistan hökuməti “Surmalu” ticarət mərkəzində baş vermiş faciəli partlayışla bağlı matəm günü elan edəcək. Matəm gününün vaxtı xilasetmə işləri başa çatdıqdan sonra dəqiqləşdiriləcək.
Ticarət mərkəzində partlayış nəticəsində 18 nəfər hələ də itkin düşmüş hesab olunur.
Ticarət mərkəzində partlayış və yanğın baş verən yerdə axtarış-xilasetmə işləri davam edir.
Rusiya Prezidenti Vladimir Putin Şimali Koreya lideri Kim Çen Ina məktub ünvanlayıb.
Bu barədə Şimali Koreyanın dövlət mediası KCNA məlumat yayıb. Agentliyin məlumatına görə, Putin Şimali Koreya lideri Kim Çen Ina Moskva ilə Pxenyan arasında münasibətləri genişləndirmək istədiyini bildirib.
Rusiya lideri məktubunda ikitərəfli münasibətlərin yaxşılaşdırılmasının Koreya və Şimal-Şərqi Asiyada təhlükəsizliyin və sabitliyin artırılmasına kömək edəcəyini yazıb.
Qeyd edilib ki, Kim Çen In da cavabında Rusiya ilə Şimali Koreya arasında əməkdaşlığın artmağa davam edəcəyini yazıb.
Məktubun avqustun 15-də qeyd olunan “Koreya Qurtuluş Günü” münasibətilə göndərildiyi bildirilib.
Kim Çenin Putinə cavab olaraq göndərdiyi məktubda Rusiya-Şimali Koreya əlaqələrinin İkinci Dünya Müharibəsinin sonunda Yaponiyanın məğlubiyyəti ilə qurulduğu vurğulanıb.
Məktubda deyilir:
“O vaxtdan bəri iki ölkə arasında bu strateji və taktiki əməkdaşlıq, dəstək və həmrəylik düşmən hərbi qüvvələrinin təhdid və təxribatlarının qarşısının alınması üçün yeni səviyyəyə yüksəlib".
Məktubda "düşmən qüvvələri" adlandırılan ölkənin adı çəkilməsə də, Şimali Koreyada bu termin çox vaxt ABŞ və onun müttəfiqlərinə istinad etmək üçün istifadə olunur.
Qeyd edək ki, Kim Çenin 2019-cu ildə Rusiyaya səfəri zamanı iki ölkə liderləri əməkdaşlıq sazişi imzalayıb.
Mütəxəssislər Rusiyanın Ukraynaya təcavüzü başlayan fevral ayından bu yana iki ölkənin getdikcə daha da yaxınlaşdığını vurğulayırlar.
Şimali Koreya iyul ayında Ukraynanın iki rusiyayönlü separatçı bölgəsində birtərəfli qaydada elan edilmiş xalq respublikalarını tanıdığını bəyan edib. Şimali Koreya rəsmiləri həmçinin Donetsk və Luqanskın bərpası və digər ərazilərə yardım etmək üçün işçi qüvvəsi göndərə biləcəklərinə işarə ediblər.
İrəvanın mərkəzində “Surmalu” ticarət mərkəzində baş verən partlayış nəticəsində ölənlərin sayı 6 nəfərə çatıb.“armenpres ” xəbər verir ki, bu barədə Ermənistan Fövqəladə Hallar Nazirliyinin mətbuat katibi Hayk Kostanyan məlumat verib.
“Xilasedicilər daha bir meyiti dağıntılar altından çıxarıblar. İndiyə qədər 6 ölü var. Axtarış-xilasetmə işləri davam edir”, - deyə o bildirib.
Dağıntılar altından çıxarılan şəxsin kimliyi hələ ki, məyyən edilməyib.
Ölənlərdən 4-nün şəxsiyyəti bəllidir. Bunlar Anahit Mxitaryan, Misak Marqaryan, Jemma Nazaryan, Qayane Avetisyandır.
Ticarət mərkəzindəki partlayışda itkin düşənlər:
1. Aram Hayrapetyan
2. Vardan Köçəryan
3. Marat Şahbazyan
4. Sirarpi Xaçatryan
5. Mariam Xaçatryan
6. Harut Qarakyan
7. Qaqik Karapetyan
8. Artavazd Ayrapetyan
9. Erna Qriqoryan
10. Hraçya Sarkisyan
11. Vaçaqan Eqoyan
12. Vanik Əmirxanyan
13. Anahit Xalatyan
14. Kseniya Badalyan, 1981-ci il təvəllüdlü
15. Aram Arutyunyan
16. David Mixitaryan
Pandemiya zamanı baş nazirin iqamətgahında verdiyi gizli şənliklərə görə istefa verməli olan İngiltərə Baş naziri Boris Consonun yenidən jurnalistikaya dönəcəyi iddia edilib.
Bu barədə “The Guardian”məlumat yayıb. Qəzetin həftə sonu dərc etdiyi xəbərə görə, İngiltərənin məşhur tabloid qəzetlərindən biri olan “Daily Mail”, Boris Consona köşə yazarı olmağı təklif edib.
“Daily Mail”in anonim mənbələri təklif olunan maaş və ya digər detallar barədə məlumat paylaşmayıb. Hələlik nə Baş nazirlik rəsmiləri, nə də “Daily Mail” bu iddialara cavab verməyib.
Qeyd edək ki, Conson 2016-cı ildə dövlət katibi vəzifəsinə başlamazdan əvvəl ölkənin məşhur “The Telegraph” qəzetinin köşə yazarı olub. O zaman Boris Conson ayda 10 saat işləyirdi və ildə 275 min funt sterlinq (təxminən 133 min manatdan çox) maaş alırdı.
Xəbər verdiyimiz kimi, Federal Təhqiqatlar Bürosu avqustun 8-də keçmiş ABŞ prezidenti Donald Trampın Florida ştatındakı "Mar-a Laqo" tətil zonasında yerləşən evinə basqın edib. Axtarış Trampın prezidentliyi dövründə Ağ Evdən Floridadakı evinə bəzi sənədləri gətirib-gətirməməsi ilə bağlı olub.
ABŞ-ın Ədliyyə Nazirliyinin rəhbəri və Baş prokuror Merrik Qarland keçmiş prezident Donald Trampın Florida ştatındakı mülklərində FTB-nin axtarışını şəxsən təsdiqlədiyini və bunun ictimaiyyətə faydalı olduğu üçün paylaşıldığını açıqlayıb.
Musavat.com xəbər verir ki, bu açıqlamanın yaratdığı şok effekti keçməmiş Donald Tramp M.Qarlanda özünün “Truth” sosial sosial şəbəkəsindəki hesabından cavab verib.
“Prezident Obamanın Çikaqoya apardığı 33 milyon səhifəlik sənədlər necə oldu? Saxta xəbər saytları bu barədə danışmaqdan imtina edir. Onlar buna məhəl qoymaq istəmirlər” - Tramp yazıb.
Trampın digər paylaşımlarında isə evində aparılan axtarışdan ciddi narahatlıq keçirdiyi hiss olunur: “Vəkillərim və nümayəndələrim əməkdaşlıq edirdilər. Hökumət bacardığı qədər istədiyini ala bildi. Müəyyən ərazini bağlamağımızı istədilər, bağladıq! Hər şey çox yaxşı gedirdi, bir çox əvvəlki prezidentlərdən daha yaxşı idi, lakin birdən-birə, heç bir xəbərdarlıq etmədən səhər saat 6:30-da Mar-A-Laqodakı mülkümə çoxsaylı agentlər tərəfindən basqın edildi. Hədlərini aşdılar. Bu, dəlilikdir!”
ŞOK EFFEKTİ YARADAN İDDİALAR
Qarşılıqlı söz savaşının davam etdiyi bir vaxtda “Washington Post”un irəli sürdüyü iddia daha da çaşqınlıq yaradıb.
Qəzet yazır ki, FTB Trampın evinə gizli nüvə silahı sənədlərini axtarmaq üçün basqın edib: "Təhqiqatla bağlı məlumatı olan şəxslərin sözlərinə görə, nüvə silahı sənədləri FTB-nin Trampın mülkündə ələ keçirdiyi "xəzinə"də ola bilər. Mənbələr bu sənədlərin ABŞ arsenalına, yoxsa başqa ölkəyə aid edildiyini dəqiqləşdirməyiblər".
TRAMP BU SƏNƏDLƏRLƏ ÖYÜNÜRDÜ
Məhkəmə hökumətə tapşırıq verib ki, vəsatəti Trampın vəkillərinə təqdim etsin və bu gün saat 15:00-a qədər Trampın həbs qərarının götürülməsinə etiraz edib-etmədiyini bildirsin.
Qeyd edək ki, bu cür sənədlərin şübhəli mövcudluğu ABŞ baş prokurorunun FTB agentlərinə verdiyi axtarış əmrinin səbəbini açıqlaya bilər. Belə ki, Mar-a-Laqodakı mülkdə, həqiqətən də, nüvə silahı sənədləri tapılarsa, Qarlandın niyə siyasi addım ataraq belə bir göstəriş verdiyi məlum olacaq. Çünki sənədlərin geri qaytarılması milli təhlükəsizlik prioriteti kimi qəbul ediləcək.
Xatırladaq ki, Tramp prezidentliyi dövründə ABŞ-ın nüvə arsenalına xüsusi diqqət yetirirdi və əlində olan məxfi nüvə silahı sənədləri ilə öyünürdü.
"Müharibə başlayandan bəri Ukrayna ordusuna məxsus 4293 tank və zirehli texnika məhv edilib".
Qafqazinfo"xəbər verir ki, bunu Rusiya Müdafiə Nazirliyinin sözçüsü İqor Konaşenkov deyib.
Ukrayna Silahlı Qüvvələrinin 14-cü Mexanikləşdirilmiş Briqadasının itkilərinin 2000-dən çox olduğunu deyən Konaşenkov 28-ci Mexanikləşdirilmiş Briqadanın müvəqqəti mövqelərinə yüksək dəqiqlikli silahlarla hücum zamanı 100-ə yaxın əsgər və 9 hərbi texnikanın məhv edildiyini vurğulayıb.
O, Donetsk vilayətində 58-ci motoatıcı briqadanın 40 əsgərinin və 5 avtomobilin məhv edildiyini, Rusiya qüvvələrinin Ukraynadakı hərbi ünsürlərə qarşı hücumlarını davam etdirdiyini bildirib.
Son 24 saat ərzində Ukrayna ordusuna aid 5 idarəetmə mərkəzi, 6 silah-sursat anbarı və anbarın məhv edildiyini qeyd edən Konaşenkov Donetsk bölgəsində ABŞ-ın Ukraynaya göndərdiyi "AN/MPQ-64" RLS-in də vurulduğunu deyib.
Mətbuat katibi Konaşenkov Ukraynada bu günə kimi 267 təyyarə, 146 helikopter, 1732 pilotsuz uçuş aparatı, 365 hava hücumundan müdafiə raket sistemi, 4293 tank və zirehli texnika, 797 çoxbarelli reaktiv yaylım atəşi sistemi, və 3290 haubitsa məhv edildiyini qeyd edib.
ABŞ və Qərb Cənubi Qafqazda Rusiyanı ən zəif yerindən – “Axilles dabanı”ndan vurur… Paşinyan hakimiyyəti Rusiyanın Ermənistanı “işğal altında saxladığı” və Kremlin “erməni dövlətçiliyini məhv etmə planı”nı artıq işə saldığı barədə propoqandaya start verib…
Musavat.com məlumatına görə, Cənubi Qafqazda ABŞ və Qərbin Rusiya ilə apardığı amansız rəqabətin ilkin nəticələri artıq ortaya çıxmağa başlayıb. Rusiyanın regiondan sıxışdırılıb, çıxarılması uğrunda olduqca ciddi addımlar atılır. Ukryana savaşı ucbatından beynəlxalq sanksiyalara məruz qalan Rusiya hələlik öz regional mövqelərini qoruyub, saxlamaq üçün əlindən gələn hər şeyi edir. Kreml bütün mümkün vasitə və mexanizmlərlə müqavimət göstərməyə çalışır.
Ancaq Rusiyanı hazırda ən zəif yerindən, “Axilles dabanı”ndan vurmağa çalışırlar. Belə ki, Ermənistan Rusiyanın hərbi müttəfiqidir. Bununla belə, indiyə qədər rəsmi İrəvan Kremlə lazım olan vaxtlarda Rusiyanı heç vaxt dəstəkləməyib. Rəsmi İrəvan Ermənistan adlı “formal dövlət”in mövcudluğuna görə borclu olduğu Rusiyaya xəyanət etməyə həmişə hazır vəziyyətdə gözləyib.
Ona görə də, əslində, Ermənistan Rusiyanın hərbi müttəfiqindən daha çox, bu superdövlətin ən zəif yeridir, yəni, “Axilles dabanı”dır. İndi ABŞ və Qərb məhz Rusiya ilə Ermənistan üzərindən hesablaşmağa çalışır. Və Cənubi Qafqazda Rusiyaya qarşı Ermənistan üzərindən geopolitik əməliyyatın aparıldığı artıq açıq-aşkar nəzərə çarpır.
Əslində, Ermənistan artıq bir neçə ildir ki, ABŞ və Qərbin Rusiyaya qarşı başlatdığı geopolitik əməliyyatın aləti rolunda çıxış edir. Bu proses hələ indiki baş nazir Nikol Paşinyanın “Soros” Fondunun dəstəyi ilə Rusiyaya bağlı Qarabağ klanını devirib, hakimiyyətə gəlməsindən sonra başlayıb. Çünki məhz Paşinyan hakimiyyəti Ermənistanda Rusiya əleyhinə təbliğata start vermişdi. Və Rusiyanın Ermənistana düşmən olması barədə ictimai rəyin yaradılmasına nail olunmuşdu.
Düzdür, 44 günlük savaşda Ermənistanın biabırçı məğlubiyyətindən sonra rəsmi İrəvan məcburiyyət qarşısında yenidən Rusiyanın orbitinə döndü. Ancaq son vaxtlar rəsmi İrəvan yenidən tədricən Rusiyadan uzaqlaşma xəttinə meyllənməyə başlayıb. Xüsusilə də, Paşinyan hakimiyyətinin Rusiyanın vasitəçiliyi imzalanmış üçtərəfli anlaşmaları qüvvədən salmağa çalışması Kremlin regional mövqelərinin sarsıdılmasına yönəlib.
Təbii ki, Kremldə Ermənistanın Rusiyaya qarşı xəyanət etməyə hazır olduğunu tam dəqiqliyi ilə bilirlər. Xüsusilə də, CİA şefi Uilyam Börnsün İrəvana səfərindən sonrakı mərhələdə Ermənistanın Rusiyaya qarşı münasibətləri ciddi şəkildə dəyişməyə başlayıb. Ona görə də, Rusiyanın ABŞ kəşfiyyat şefinin Ermənistana səfərindən ciddi şəkildə narahat olması tamamilə başadüşüləndir.
Məsələ ondadır ki, CİA şefinin İrəvana səfərindən sonra Paşinyan hakimiyyətinə yaxın siyasi dairələr Ermənistan cəmiyyətində “Rusiya kimi hərbi müttəfiqi olan dövlətə başqa düşmən lazım deyil” tezisini dövriyyəyə buraxmışdılar. Daha sonra baş nazir Nikol Paşinyan Rusiya sülhməramlı qüvvələrinin fəaliyyətini sərt şəkildə tənqid edərək, hətta Kremlə qarşı bəzi ittihamlar da irəli sürmüşdü. Və Rusiyanın xarici işlər naziri Sergey Lavrov erməni baş nazirin ittihamlarına cavab vermək məcburiyyətində də qalmışdı.
Bir müddət öncə isə Ermənistan cəmiyyətində Rusiyanın işğalçı olması barədə açıq təbliğat başlayıb. Belə ki, Rusiya hərbçilərinin Ermənistanda Zəngəzur dəhlizinin keçəcəyi ehtimal olunan ərazilərdə blok-postlar qurması erməni toplumunda qıcıq doğurub. Bəzi erməni politoloqlar açıq şəkildə bəyan edirlər ki, rus hərbçilərin bu davranışları Rusiyanın Ermənistanı işğal etməsi anlamı daşıyır.
Son günlərsə, bu məsələ ətrafında müzakirələr daha da dərinləşib. İndi Rusiyanın əleyhinə propoqanda prosesinə Ermənistanın rəsmi mətbuat orqanları da qoşulub. Paşinyan hakimiyyətinə yaxın KİV-lər israrla tələb edirlər ki, Rusiya hərbi bazaları artıq Ermənistandan çıxarılmalıdır. Əsas tezislər isə absurd xarakter daşıyan “əgər, Rusiya-Türkiyə “üçtərəfli anlaşması” qeyd-şərtsiz yerinə yetirilirsə, 102-ci rus hərbi bazası kimə lazımdır” sualı üzərində qurulub.
Paşinyan hakimiyyətinə yaxın mətbuat orqanları vurğulayırlar ki, ermənilər Rusiya hərbi bazasının Ermənistanı müdafiə etdiyinə daha inanmırlar. Çünki, hətta Rusiya müdafiə etmək istəsə belə, azsaylı rus bazası müasir hərbi texnika ilə silahlanmış Türkiyə ordusu qarşısında duruş gətirə bilməz. Ermənistan mətbuatına görə, Ukrayna savaşı göstərdi ki, Rusiya hərbi texnikası yaşayış evlərini dağıda bilən metal yığınından başqa bir şey deyil, rus əsgərləri isə yalnız dinc sakinlərə qarşı soyqınçuluq və qətliamlar törətməyi bacarırlar.
Ermənistanın Lraqir saytı birmənalı şəkildə vurğulayır ki, Rusiyanın yeni Cənubi Qafqaz siyasəti Ermənistan dövlətçiliyinin məhv edilməsini hədəfləyib: “Rusiyanın Cənubi Qafqazı tərk etməsi artıq qaçılmaz xarakter daşıyır. Kreml bunu bilir və o vaxta qədər Türkiyə ilə birlikdə Ermənistan dövlətçiliyini sıradan çıxartmağa çalışır”.
Əksər, erməni politoloqlar isə Rusiyanın Gümrüdəki hərbi bazasını Ermənistana birbaşa təhlükə kimi xarakterizə edirlər. Onların fikrincə, Kreml hazırda Rusiya xarici işlər naziri Sergey Lavrovun “Ermənistanı Türkiyəyə təhvil vermə” planını həyata keçirtməklə, məşğuldur. Ukraynda məğlub olmağa başlayan Rusiya Cənubi Qafqazı tərk etmək ərəfəsində bu planın icrasını sürətləndirib. Və Putin-Ərdoğan anlaşması da bunu təsdiqləyir: “Ona görə də, rəsmi İrəvan təcili surətdə Rusiya hərbi bazasının Ermənistandan çıxarılması barədə tələbini Kremlə çatdırmalıdır”.
Maraqlıdır ki, hazırda Paşinyan hakimiyyətinə yaxın mətbuat qurumları və siyasi şərhçilər məhz bu tezislər üzərindən Ermənistan cəmiyyətində Rusiya əleyhinə propoqandanı gücləndiriblər. Bu isə onu göztərir ki, Rusiya əleyhinə tezislər məhz Paşinyan hakimiyyəti tərəfindən hazırlanıb və mətbuat qurumlarına, politoloqlara ötürülüb.
Belə anlaşılır ki, bir müddət öncə CİA şefinin İrəvana səfər etməsi qətiyyən təsirsiz ötüşməyib. İndi Ermənistan cəmiyyətində Paşinyan hakimiyyətinin Rusiyadan uzaqlaşma kursu geniş şəkildə təblig olunur. Üstəlik, Rusiya hərbi bazasının Ermənistandan çıxarılması həqiqətən də rəsmən tələb edilərsə, Paşinyan hakimiyyəti ilə Kreml arasında ciddi ziddiyyətlərin olacağı şübhə doğurmur. Rəsmi İrəvanın buna cəsarət edib-etməyəcəyi böyük ehtimalla CİA şefinin Paşinyan hakimiyyətinə hansı təminatlar vermiş ola biləcəyindən asılıdır.
Türkiyə-Ermənistan münasibətlərinin normallaşması prosesi növbəti mərhələyə keçib.
"Report" xəbər verir ki, bunu “Hürriyyət”ə Türkiyə Xarici İşlər Nazirliyinin adını açıqlamayan səlahiyyətli diplomatı bildirib.
O deyib ki, iyul ayında münasibətlərin normallaşması üzrə xüsusi nümayəndələr Serdar Kılıç və Ruben Rubenyan arasında baş tutmuş görüşdə sərhədlərin üçüncü ölkə vətəndaşlarına açılmasına dair razılıq əldə olunub. Bu konteksdə texniki nümayəndələrin müəyyən addımlar atması və yol xəritəsi hazırlaması gözlənilir.
XİN əməkdaşı xatırladıb ki, xüsusi nümayəndələr 1 dəfə Rusiyanın paytaxtı Moskvada, 3 dəfə Avstriyanın paytaxtı Vyanada görüşüblər. Həmçinin S.Kılıç və R.Rubenyan arasında 500 dəfə telefon danışığı olub.
Diplomat deyib ki, xüsusi nümayəndələr arasında səmimi dialoq mühiti yaranıb: “Erməni siyasətçi Serdar Kılıça telefonla danışan zaman türkcə salam verib. İlk mərhələdə böyük gözləntilər ortaya qoyub, böyük məyusluğa uğramaqdansa, Ermənistanla addım-addım irəliləmək barədə razılığa gəldik. Etimad mühitini artıran addımlar üzərində işlənilir. Bunların arasında humanitaryönümlü addımlar da var. Sərhəd keçidləri mövzusunda məsələlərin həllini tapması üçün daha uzun müddətə ehtiyac ola bilər. Buna meydandakı şərtlər də icazə verməlidir”.
Materialda, həmçinin göstərilib ki, S.Kılıç 7 il Vaşinqtonda səfir kimi çalışıb. 64 yaşında olan diplomat ABŞ-da fəaliyyət göstərdiyi müddət ərzində Türkiyə, Azərbaycan və Şimali Kiprin hüquq və mənafeləri naminə ciddi addımlar atıb.
Erməni lobbisini ən yaxşı tanıyan və “erməni soyqırımı” iddialarına qarşı ciddi mübarizə aparan Kılıç İkinci Qarabağ müharibəsi vaxtında da Azərbaycanın mübarizəsinə töhfə verib. Səfir FETO, PKK kimi terror təşkilatlarının Türkiyəyə qarşı qarayaxma kampaniyalarına qarşı ABŞ-da ciddi mübarizə aparıb.
Məlumata görə, gənc siyasətçi R.Rubenyan isə hazırda Ermənistan parlamentinin vitse-spikeridir. 32 yaşlı Rubenyan bundan əvvəl Ermənistan xarici işlər nazirinin müavini kimi də fəaliyyət göstərib. O, həmçinin ölkəsindəki “Mülki müqavilə” partiyasının təsisçilərindəndir.
Abedin Varamin İranın Ermənistanın Qafan şəhərində Baş konsulu təyin edilib.
Bunu Ermənistan mətbuatına İran parlamentinin deputatı Robert Beqlaryan bildirib.
Deputat bildirib ki, Baş konsul artıq İrəvandadır, bir sıra görüşlər keçirib və vəzifəsinin icrasına başlayıb.
Bununla yanaşı, Beqlaryan əlavə edib ki, bürokratik maneələr diplomatın öz missiyasını tam şəkildə icra etməsinə mane olur: “Məndə olan məlumata görə, Baş konsulluğun yerləşəcəyi bina hələ hazır deyil”.