 |
|
2025-ci il yanvarın 29-da keçirilmiş bələdiyyə seçkilərində səsvermənin nəticələri etibarsız hesab edilmiş seçki məntəqələrinin siyahısı açıqlanıb.
Bu barədə Azərbaycan Respublikası Mərkəzi Seçki Komissiyası qərar qəbul edib.
Siyahını təqdim edirik:
Bu il Ramazan ayının ilk gününün martın 1-nə təsadüf edəcəyi gözlənilir. Fevralın 28-də Azərbaycan səmasında yeni Ayın görünəcəyi proqnozlaşdırılır.
Ramazan ayı martın 1-də başlayacaq.
Müqəddəs ayda Qədr gecələri 18, 20, 22 və 26 mart tarixlərinə təsadüf edəcək.
Təqvimə görə, martın 30-u və 31-i Azərbaycanda Ramazan bayramı qeyd ediləcək. (baku.ws)
Valideynlərini itirən uşaqlara birdəfəlik pul vəsaitinin konkret məbləğdə ödənilməsi I oxunuşda təsdiqlənib.
Bununla bağlı “Valideynlərini itirmiş və valideyn himayəsindən məhrum olmuş uşaqların sosial müdafiəsi haqqında” qanuna dəyişiklik layihəsi Milli Məclisin bugünkü plenar iclasında müzakirəyə çıxarılıb.
Qeyd edilib ki, valideynlərini itirmiş və valideyn himayəsindən məhrum olmuş uşaqlar, habelə onların arasından olan şəxslər ümumi təhsil, peşə təhsili, orta ixtisas təhsili, ali təhsil müəssisələrini bitirdikdə onlara birdəfəlik pul vəsaiti müvafiq icra hakimiyyəti orqanının müəyyən etdiyi orqanın müəyyən etdiyi konkret məbləğdə ödəniləcək.
Layihəyə əsasən, ödənişi təhsil müəssisəsi həyata keçirəcək.
Hazırda qüvvədə olan qanuna görə valideynlərini itirmiş, valideyn himayəsindən məhrum olmuş uşaqlar, habelə onların arasından olan şəxslər ümumi təhsil, peşə və orta ixtisas təhsili, ali təhsil müəssisələrini bitirdikdə müvafiq icra hakimiyyəti orqanının təsdiq etdiyi qaydada mövsümi paltar və ayaqqabı, habelə respublika üzrə orta əməkhaqqının 2 mislindən az olmamaqla birdəfəlik pul vəsaiti ilə təmin olunurlar.
Yəni qanunda birdəfəlik pul vəsaitinin ödənilməsi zamanı orta əməkhaqqının hansı dövr üçün hesablanması qeyd edilməyib. Təcrübədən məlum olduğu kimi orta əməkhaqqı isə aylar və illər üzrə dəyişir.
Eyni zamanda mövcud vəziyyətdə nəzərdə tutulmuş normativlər üzrə paltar və ayaqqabıların sözügedən kateqoriyadan olan şəxslərin tələbatına, bunların əvəzinə verilən pul kompensasiyasının isə qeyd olunan mövsümi geyim məhsullarının orta bazar qiymətinə adekvat olmaması bu təminat növlərinin praktiki cəhətdən aktual olmamasını şərtləndirir.
Məqsəd daha effektiv sosial təminat prinsipinin tətbiq edilməsi, qanunvericilikdə olan qeyri müəyyənliyin aradan qaldırılması, birdəfəlik pul vəsaitinin konkret məbləğdə ödənilməsi, bununla da vətəndaş məmnunluğunun artırılmasıdır.
Qanun layihəsi müzakirələrdən sonra səsverməyə çıxarılaraq birinci oxunuşda qəbul olunub.
Bu günlərdə Pensilvaniya Dövlət Üniversitetində keçirilmiş bir konfransın gedişində ABŞ-nın bu nüfuzlu ali təhsil müəssisəsinin tələbəsi, gənc həmyerlimiz Nihat Elşən oğlu Həsən özünün son dərəcə məzmunlu çıxışı ilə hər kəsin diqqətini cəlb edib. Nihatın çıxış üçün seçdiyi mövzu isə, düşünürəm ki, bütün dünyada yaşayan soydaşlarımız üçün çox önəmlidir. Əlbəttə, Nihatın çıxışına dair mən də müəyyən fikirlərimi qısa da olsa bölüşmək istərdim və bunu mütləq edəcəyəm. Amma öncə bu gənc və çox istedalı həmvətinimizin çıxışını olduğu kimi sizlərə təqdim edirəm.
“Təsəvvür edin ki, ölkənizin müharibə ilə parçalandığını görürsünüz və ətrafınızdakı insanların əziyyət çəkdiyinə şahid olursunuz. İndi isə, bu münaqişənin sona çatdığını və rahatlıq, ümid hissini təsəvvür edin. İlham Əliyevin 2020-ci il qələbə çıxışı Azərbaycan üçün məhz bunu ifadə edirdi. Bu gün mən sizə bu çıxışın niyə mühüm bir vətəndaş iştirak aktı olduğunu, onun təkcə bir millətə deyil, həm də şəxsən tanıdığım insanlara necə təsir etdiyini paylaşmaq istəyirəm.
İlk olaraq, çıxışın özündən danışaq.
İlham Əliyev bu çıxışı 10 noyabr 2020-ci ildə, Azərbaycan 44 günlük müharibə nəticəsində Qarabağ bölgəsindəki torpaqlarını geri aldıqdan sonra etdi. Çıxışında Əliyev hərbi qələbəni qeyd etdi və bunun uğrunda canından keçən şəhidlərimizi andı. Amma bu sadəcə bir qələbə elanı deyildi – bu, xalqı səbrli, qürurlu olmağa və gələcəyə ümidlə baxmağa çağırış idi. Əliyevin çıxışı bütün ölkə üzrə yayımlandı və milyonlarla insana çatdı. Siz də bu çıxışı “AzerFreedom TV” adlı YouTube kanalında izləyə bilərsiniz.
İkincisi, bu çıxış niyə vacib idi?
Bildiyiniz kimi, vətəndaş iştirakçılığı təkcə səsvermə və ya könüllü olmaqdan ibarət deyil, bu həm də liderlərin öz səslərindən istifadə edərək cəmiyyəti ilhamlandırması və çətin anlarda bir araya gətirməsidir. Əliyev də məhz bunu etdi. O, sadəcə qələbəni elan etmədi, eyni zamanda insanların fədakarlığını və yaşadıqları ağrını qəbul etdi. Bu çıxış zamanı bütün ölkə sanki dayandı, qulaq asdı və bir-birinə daha da bağlandı.
Bunu daha da şəxsi bir hekayə ilə izah etmək istəyirəm. Mənim riyaziyyat müəllimim İkinci Qarabağ müharibəsində oğlunu itirmişdi. O, hər zaman gülərüz və hörmətə layiq bir insan idi, amma bu hadisədən sonra tamamilə dəyişdi. Onun saçlarının ağardığını, gözlərinin altındakı qara kölgələri və əvvəlki gülərüz halının yox olduğunu görürdük. Lakin bu qələbə elan edildikdən sonra onda açıq-aydın bir dəyişiklik hiss etdik. Doğrudur, bu onun kədərini tamamilə silmədi, amma ona bir məqsəd hissi verdi – oğlunun qurbanının boşa getmədiyini bilmək ona güc verdi. Bax, bu çıxışın təsiri belə idi. Bu cıxış bir milləti bir araya gətirdi və insanlara ümid verdi.
Nəhayət, bu çıxış Azərbaycan üçün nə demək idi?
Bu çıxış təkcə ərazi qazanclarından ibarət deyildi. Bu, milli qürurun bərpası və illərlə davam edən yaraların sağalması idi. Eyni zamanda, bu, bütün dünyaya Azərbaycanın irəli getməyə və ölkəni yenidən qurmağa hazır olduğunu göstərdi.
Nəticə olaraq, İlham Əliyevin 2020-ci il Qələbə Çıxışı mənim üçün bir vətəndaş kimi böyük məna daşıyır, çünki onun necə insanlara təsir etdiyini öz gözümlə görmüşəm. Və son olaraq demək istəyirəm ki, “güclü sözlər bir icmanı birləşdirir və insanlara ümid verir.” Çox sağ olun.”
Heç bir şübhəm yoxdur ki, Nihatın çıxışı hər bir kəsi çox təsirləndirdi. Etiraf edək ki, Ölkə Prezidenti cənab İlham Əliyevin 2020-ci ildə etdiyi tarixi Qələbə çıxışının Azərbaycan xalqı üçün, bütün dünya azərbaycanlıları üçün daşıdığı önəmin mahiyyəti barədə öz fikirlərini sadə, hamının qavraya biləcəyi ifadələrlə səsləndirən Nihat bu yönümdə bəlkə də bir çox peşəkar şərhçilərdən daha təsirli nəticə əldə edə bildi. Digər tərəfdən isə, bu çıxışı ABŞ-nın ən nüfuzlu Universitetlərinin birində, çoxsaylı və çoxkonfessiyalı, gənc və kifayət qədər tələbkar bir auditoriyanın qarşısında etməklə Nihat əsil Azərbaycan həqiqətlərinin dünyada təbliğ olunması işinə öz böyük şəxsi töhfəsini vermiş oldu. Cənab Prezident İlham Əliyevin xalqı birliyə gətirə bilmiş güclü və etimad göstərilən Lider, Azərbaycanın isə xalq-iqtidar birliyindən güc alaraq getdikcə öz qüdrətini artıran bir ölkə olaraq təqdimatı, Milli həmrəyliyimizin təbliği bu çıxışın ana xəttini təşkil edən əsas ideyalar kimi müəyyən olunub və dinləyiciyə ən effektiv formada, aydın şəkildə çatdırılıb. Elə bilirəm ki, Nihat kimi vətənpərvər və savadlı gənclərimizlə xalqımızın qürur duyduğunu desəm, bu sətirləri oxuyan hər kəsin rəyini ifadə etmiş olaram.
Sonda isə əlbəttə ki, Nihatın özü barədə qısa məlumatı oxucularımıza təqdim edirəm: Nihat Elşən oğlu Həsən 2006-cı ildə Bakı şəhərində anadan olub. Orta təhsilini 132-134 saylı Tehsil Kompleksində alıb. Məktəbdən məzun olmasına hələ bir il qalmış, yəni 10-cu sinifdə oxuyarkən Nihat artıq ABŞ-nın ali təhsil müəssisələrinə qəbul üçün xüsusi olaraq tərtib olunmuş SAT proqramı üzrə test imtahanlarını uğurla verərək, Pensilvaniya Dövlət Üniversitetinin tələbəsi adını qazanmışdır. Qeyd edək ki, Nihat SAT proqramı ilə nəzərdə tutulmuş maksimal 1600 baldan 1480 bal toplaya bilmişdir. Hazırda gənc həmvətənimiz Pensilvaniya Dövlət Üniversitetinin İnformatika (Computer Science) fakültəsində, 2-ci kursda təhsilini davam etdirir.
Azərbaycanda 21 yaşına çatan şəxslərin mülki odlu silah əldə etmək hüququ olacaq.
Bu məsələ Milli Məclisin bu gün keçirilən plenar iclasında müzakirə olunan "Xidməti və mülki silah haqqında" Qanuna təklif edilən dəyişiklikdə öz əksini tapıb.
Qüvvədə olan qanunvericiliyə əsasən, bu qanunun tələblərinə müvafiq olaraq Azərbaycanda on səkkiz yaşına çatmış Azərbaycan vətəndaşlarının mülki silah əldə etmək hüququ var.
Təklif edilən dəyişikliklə, Azərbaycanda on səkkiz yaşına çatmış Azərbaycan vətəndaşlarının odlu silah istisna olmaqla mülki silah əldə etmək hüququ olacaq.
Həmçinin, Azərbaycanda iyirmi bir yaşına çatmış vətəndaşlara mülki odlu silah əldə etmək hüququ veriləcək.
Qanun layihəsi səsə qoyularaq birinci oxunuşda qəbul olunub.
Azərbaycanda ilkin hərbi qeydiyyata alınmaqdan boyun qaçıranlar 100 manat məbləğində cərimə olunacaq.
Bununla bağlı İnzibati Xətalar Məcəlləsində, “Azərbaycan Respublikasında səfərbərlik hazırlığı və səfərbərlik haqqında” və “Hərbi vəzifə və hərbi xidmət haqqında” qanunlarda dəyişiklik layihəsi Milli Məclisin plenar iclasında müzakirə edilib.
İnzibati Xətalar Məcəlləsinə edilən dəyişikliklə ilkin hərbi qeydiyyata alınmalı olan vətəndaşların qeydiyyata alınmaq üçün fərdi çağırış vərəqəsində göstərilmiş müddətdə üzrlü səbəblər olmadan müvafiq icra hakimiyyəti orqanına gəlməməsinə görə cərimənin məbləğinin 30 manatdan 100 manata artırılması təklif edilir.
Daha bir dəyişikliklə, çağırışçıların və hərbi vəzifəlilərin hərbi uçotunu aparan orqan və təşkilatlar tərəfindən çağırışçılara və hərbi vəzifəlilərə onların müvafiq icra hakimiyyəti orqanına çağırılması barədə məlumatın verilməməsi, yaxud onların çağırış məntəqələrinə və ya toplanış yerinə vaxtında gəlməsinə maneçilik törədilməsinə görə vəzifəli şəxslər 200 manatdan 300 manatadək (hazırda 80-150) məbləğdə, hüquqi şəxslər 600 manatdan 800 manatadək (hazırda 200-400) məbləğdə cərimə ediləcək.
Bundan başqa, vətəndaşların hərbi qeydiyyat üzrə “Hərbi vəzifə və hərbi xidmət haqqında” qanunda nəzərdə tutulmuş vəzifələrini icra etməməsinə, yəni, vətəndaşlar ehtiyata keçirildikdən sonra 7 gün müddətində yaşayış yeri üzrə hərbi qeydiyyata alınmaq üçün müvafiq icra hakimiyyəti orqanına gəlməməsinə, hərbi vəzifəlilər və çağırışçılar yaşayış yerini 3 aydan çox müddətə dəyişdirdikdə, yaşayış yeri üzrə hərbi qeydiyyatdan çıxmamasına və olduğu yer üzrə hərbi qeydiyyata durmamasına, hərbi vəzifəlilər və çağırışçılar yaşayış yerini dəyişərkən, 10 gün müddətində hərbi qeydiyyatda olduqları müvafiq icra hakimiyyəti orqanına məlumat verməməsinə görə cərimənin məbləğinin 30 manatdan 100 manata artırılması təklif edilir.
Eyni zamanda çağırışçılar və hərbi vəzifəlilər həqiqi hərbi xidmətə çağırış, tibbi müayinə (tibbi şəhadətləndirilmə), hərbi hissələrə təhkim edilmə, müvafiq toplanışlarla əlaqədar çağırış üzrə müvafiq icra hakimiyyəti orqanına üzrlü səbəblər olmadan gəlməməsinə görə 300 manatdan 500 manatadək məbləğdə cərimə ediləcək, yaxud işin hallarına görə, xətanı törədənin şəxsiyyəti nəzərə alınmaqla 160 saatdan 240 saatadək ictimai işlər tətbiq olunacaq.
Həmçinin hərbi qeydiyyat sənədlərinin qəsdən korlanması və ya itirilməsinə görə cərimə məbləği 50 manatdan 200 manata artırılır.
İXM-yə təklif olunan daha bir dəyişikliklə müvafiq icra hakimiyyəti orqanının və yerli özünüidarəetmə orqanlarının, mülkiyyət formasından asılı olmayaraq müəssisələrin, idarələrin, təşkilatların vəzifəli şəxsləri tərəfindən səfərbərlik elan edilərkən hərbi vəzifəlilərə vaxtında məlumat verilməməsinə və onların çağırış-toplanış məntəqələrinə və ya hərbi hissələrə gətirilməsinin təmin edilməməsinə görə cərimə məbləği 400 manatdan 600 manatadək (hazırda 200-300) artırılması nəzərdə tutulur.
Həmçinin dövlət hakimiyyəti orqanlarının və yerli özünüidarəetmə orqanlarının, mülkiyyət formasından asılı olmayaraq müəssisə, idarə və təşkilatların vəzifəli şəxsləri tərəfindən “Azərbaycan Respublikasında səfərbərlik hazırlığı və səfərbərlik haqqında” qanuna uyğun olaraq səfərbərlik hazırlığı və səfərbərlik sahəsində onlara həvalə edilmiş vəzifələrin yerinə yetirilməməsinə görə isə 500 manatdan 700 manatadək (hazırda 250-350) cərimə olacaq.
Layihə müzakirələrdən sonra bir oxunuşda qəbul edilib.
Milli Məclis ehtiyatda olan hərbçilərin yaşayış yerini dəyişərkən aidiyyəti üzrə məlumat vermədikdə cərimə olunmamaqlarını təsdiqləyib.
Bununla bağlı İnzibati Xətalar Məcəlləsində, “Azərbaycan Respublikasında səfərbərlik hazırlığı və səfərbərlik haqqında” və “Hərbi vəzifə və hərbi xidmət haqqında” qanunlara dəyişiklik layihəsi parlamentin bugünkü plenar iclasında müzakirə olunub.
Dəyişikliyə əsasən, müvafiq icra hakimiyyəti orqanının ehtiyatına keçirilmiş hərbi vəzifəlilər yaşayış yerini dəyişərkən, 10 gün müddətində hərbi qeydiyyatda olduqları müvafiq icra hakimiyyəti orqanına məlumat verməməsinə görə müəyyən edilən 30 manat məbləğində cərimədən azad ediləcək.
Layihə müzakirədən sonra qəbul edilib.
Dövlət Gömrük Komitəsinin rəisi Şahin Bağırova yeni müavin təyin edilib.
Bakupost.az xəbər verir ki, bu vəzifəyə general-mayor Güloğlan Muradlı gətirilib.
General Muradlı bu təyinata qədər DGK-nın Əməliyyat-İstintaq Baş İdarəsinin rəisi vəzifəsində çalışıb.
Tanınmış hüquqşünas Adəm Məmmədovla bağlı yeni xəbər var.
Globalinfo.az xəbər verir ki, o, artıq müəllim kimi də fəaliyyət göstərə bilməyəcək.
Belə ki, A.Məmmədov Bakı Dövlət Universitetindəki vəzifəsindən də uzaqlaşdırılıb.
Xatırladaq ki, yanvar ayında Adəm Məmmədovun vəkillik fəaliyyəti 3 ay müddətinə dayandırılmışdı.
Polşada Tələbə Xanımlar Birliyinin təşəbbüsü və Polşa Azərbaycanlıları Şurasının dəstəyi ilə Milli Qəhrəman Hökumə Əliyeva adına təqaüd proqramı təsis edilib. Bu təşəbbüs Polşada ali təhsil alan azərbaycanlı qadınların akademik və sosial inkişafını dəstəkləməyi hədəfləyir.
AZƏRTAC- bildirir ki, Milli Qəhrəman Hökumə Əliyevanın adını daşıyan bu təqaüd proqramı bir neçə əsas məqsədə xidmət edir:
- Azərbaycanın Milli Qəhrəmanı Hökumə Əliyevanın xatirəsini əbədiləşdirmək və onun qəhrəmanlıq nümunəsini gənc nəsillərə tanıtmaq;
- Polşada təhsil alan azərbaycanlı xanım tələbələri akademik və şəxsi inkişaf baxımından təşviq etmək;
- Gənc nəslin milli dəyərlərə bağlılığını artırmaq və onların cəmiyyətə aktiv töhfə verməsini dəstəkləmək.
Bildirilib ki, Polşada ali təhsil alan, minimum bir semestri uğurla başa vurmuş və yüksək akademik göstəricilərə malik tələbələr, eləcə də cəmiyyətə aktiv töhfə verən və müxtəlif ictimai layihələrdə iştirak etmiş şəxslər müraciət edə bilərlər.
Təqaüdə müraciət etmək istəyən tələbələr onlayn müraciət formasını dolduraraq təqdim etməlidirlər. Müraciətlər akademik nailiyyətlər, şəxsi motivasiya və ictimai fəallıq kimi meyarlar əsasında qiymətləndiriləcək.
Bu təqaüd proqramı Polşada yaşayan azərbaycanlı tələbə qızların fərdi inkişafına və onların cəmiyyətə daha böyük töhfə verməsinə dəstək olmaq məqsədini daşıyır.