 |
|
Bakıda və Abşeron yarımadasında yanvarın 22-si axşamdan 23-ü səhərədək arabir yağış yağacağı gözlənilir.
Bu barədə Milli Hidrometeorologiya Xidməti xəbərdarlıq yayıb.
Qeyd olunub ki, yarımadanın ayrı-ayrı yerlərində yağışın qısamüddətli intensivləşəcəyi ehtimal olunur.
Azərbaycanın bəzi rayonlarında yanvarın 23-də hava şəraitinin arabir yağıntılı olacağı gözlənilir. Əsasən şərq rayonlarında isə yağıntının qısamüddətli intensivləşəcəyi, dağlıq rayonlarda qar yağacağı ehtimalı var.
Yasamal Rayon Polis İdarəsinin Dövlət Yol Polisi (DYP) şöbəsinə yeni rəis təyin edilib.
Unikal xəbər verir ki, bununla bağlı müvafiq əmr imzalanıb.
Əmrə əsasən, polis mayoru Rəşad Nağıyev Yasamal DYP-nin rəisi vəzifəsinə təyinat alıb.
Azərbaycanda əmək pensiyasının minimum məbləği fevralın 1-dən 320 manat məbləğində müəyyən olunub.
Bununla bağlı “Əmək pensiyaları haqqında” qanuna dəyişiklik edilməsi təklif olunub.
Dəyişiklik layihəsi Milli Məclisin Əmək və sosial siyasət komitəsinin bugünkü iclasında müzakirəyə çıxarılacaq.
Azərbaycan Prezidentinin qanunvericilik təşəbbüsü qaydasında təqdim etdiyi “Əmək pensiyaları haqqında” qanunda edilməsi nəzərdə tutulan dəyişiklik də qeyd olunan müsbət proseslər çərçivəsində hazırlanıb.
Belə ki, layihədə təklif edilən dəyişikliyə əsasən əmək pensiyasının minimum məbləği fevralın 1-dən 320 manat məbləğində müəyyən olunur.
Qeyd edək ki, bundan əvvəlki əmək pensiyasının minimum məbləği 280 manat məbləğində müəyyən edilmişdi.
Bakı metrosunda istifadə qaydalarının pozulmasına görə bəzi cərimələrin məbləği artırılıb.
Yol-xeber.az xəbər verir ki, İnzibati Xətalar Məcəlləsinin 306-cı maddəsinə əsasən, stansiyaların vestibülləri, keçidləri, platformaları, eskalatorlar və vaqonların salonlarının zibillənməsi və ya üzərlərində yazılar yazılması, məhdudiyyət çəpərləri və qadağanedici nişanlarla qorunan yerlərdən stansiyaya daxil olunması, eləcə də zərurət olmadan “sərnişin-maşinist” rabitəsindən istifadə edilməsi üçün cərimələr 15 manatdan 200 manata qədər artırılıb. Bu, cərimələrin 13,3 dəfə çoxalması deməkdir.
Bundan əlavə, dəmir yoluna əşya atılmasına görə tətbiq edilən cərimə 30 manatdan 200 manata qədər yüksəldilib ki, bu da 6,7 dəfə artım deməkdir.
Bəzi digər qayda pozuntuları üzrə cərimələr dəyişməz qalıb. Məsələn, eskalatordan istifadə zamanı sürahinin üzərinə əşya qoymağa görə cərimə 20 manatdır.
Eskalatorun sürahisini çıxarmaq, “Stop” düyməsindən zərurət olmadan istifadə etmək, siqaret çəkmək, qatar hərəkətdə olarkən vaqonun qapılarını açmaq, qatarın hərəkətini gecikdirmək, özbaşına dəmir yoluna düşmək və ya tunellərə, xidmət otaqlarına daxil olmaq kimi hallara görə isə cərimə 50 manat təşkil edir.
Həmçinin, Bakı metrosunda icazəsiz olaraq metropolitenin elektrik şəbəkəsinə elektrik cihazlarının qoşulması üçün 70 manat, ventilyasiya şaxtası köşklərinə 25 metrdən yaxın məsafədə əşya yandırılmasına görə isə 100 manat cərimə nəzərdə tutulub.
“Bakı Metropoliteni” QSC-nin sədri Vüsal Aslanov dünən jurnalistlərə açıqlamasında bildirib ki, ötən il qayda pozuntuları ilə bağlı ümumilikdə 374 nəfər inzibati məsuliyyətə cəlb edilib. Onun sözlərinə görə, təhlükəsizlik tələblərinə əməl olunmaması sərnişinlərin həyatını təhlükəyə ata bilər.
“Keçən il qatar stansiyaya daxil olarkən üç dəfə sərnişinlərin relslərə düşməsi halları qeydə alınıb. Təəssüf ki, bu hadisələrdən ikisi ölümlə nəticələnib. Digər iki halda isə sərnişinlərin ehtiyatsızlığı ciddi təhlükə yaradıb”, - deyə V. Aslanov vurğulayıb.
Məlum olduğu kimi, ötən ilin yayında Şuşada regional “ASAN xidmət” mərkəzi fəaliyyətə başlayıb.
Mərkəz Şuşa, Xankəndi və Xocalıda qeydiyyatda olan vətəndaşlarla yanaşı ölkə üzrə ərazi məhdudiyyəti olmadan xidmət göstərir.
“Qafqazinfo” mərkəzin fəaliyyətini əks etdirən fotoları təqdim edir:
ƏVVƏLİ BURADA
Bugünkü buraxılışımızda Azərbaycanın 2024-cü ili başa vurduğu iqtisadi göstəricilər, keçən il beynəlxalq müstəvidə ölkəmizin əldə etdiyi uğurlar, eləcə də ölkə ictimaiyyətini maraqlandıran bir sıra digər mövzular barədə aia.az-ın suallarını Milli Məclisin deputatı, Azərbaycan Ağsaqqallar Şurasının sədri, iqtisad elmləri doktoru, professor Eldar Quliyev cavablandırır.
- Eldar müəllim, elə mövzunun davamı olaraq cənab Prezident İlham Əliyevin yeni dünya nizamının formalaşması prosesində yaranan boşluqlar və boşluqların Türk və müsəlman ölkələri tərəfindən doldurula bilmə ehtimalı barədə səsləndirdiyi fikirlərə münasibətinizi bilmək istərdim...
- Siz də bilirsiniz ki, möhtərəm dövlət başçımızın istisnasız olaraq bütün müsahibə və çıxışlarında səsləndirdiyi fikirlər, təqdim etdiyi açıqlamalar hər zaman dərin və hərtərəfli təhlilə, danılmaz faktlara əsaslanır. Həqiqətən də bu gün qlobal siyasi arenda yeni dünya nizamı formalaşdırılır. Lakin bu proses bir çox ciddi təzadlarla, qarşıdurmalarla, silahlı münaqişələrlə müşayiət olunur. Həmçinin son illərə qədər dünya miqyasında aparıcı güc statusunu daşıyan bir çox Qərb ölkələri ilk növbədə öz daxillərində gedən ictimai-siyasi proseslər, həmçinin düşünülmədən aparılan xarici və daxili siyasət nəticəsində öz mövqelərini sürətlə itirməkdədirlər. Bu isə yeni yaradılan dünya nizamında açıq-aşkar boşluqların yaranmasına səbəb olur. Cənab Prezident İlham Əliyevin son dərəcə düzgün qeyd etdiyi kimi, İkinci Dünya müharibəsindən sonra yaranmış sistem artıq öz potensialını itirib. Bunu bir çox yerlərdə gedən proseslər, münaqişələr, müharibələr və digər dağıdıcı hadisələr aşkar şəkildə göstərir və bu proseslər aparıcı Qərb ölkələrində yaşanan siyasi və mənəvi böhranlar fonunda davam edir. Uzun illərdən bəri dünyaya mütərəqqi Qərb modeli kimi təqdim olunan bu sistem artıq tükənib. Məhz buna görə yaranan və getdikcə daha da genişlənən boşluqların doldurulması üçün qlobal arenaya yeni ciddi oyunçunun ciddi gündəliklə daxil olması zərurətdir. Möhtərəm dövlət başçımız açıq və aydın mətnlə öz fikrini bəyan edərək bildirdi ki, Türk Dövlətləri Təşkilatı dünya miqyasında ciddi güc mərkəzinə çevrilə bilər. Çünki burada geniş coğrafiya, insan resursları, təbii sərvətlər, nəqliyyat-kommunikasiya xətləri və birlik vardır. Həmçinin cənab Prezident D-8 təşkilatının da bu boşluğu doldura biləcək bir potensiala sahib olduğunu vurğuladı və Azərbaycanın məhz bu gündəliklə təşkilata üzv olduğunu vurğuladı. Bu yanaşma bir daha göstərir ki, Azərbaycan bütün müsəlman ölkələrinin və Türk dövlətlərinin maraqlarını dailm öz maraqları kimi qəbul edir.
- Zənnimcə məhz yeni dünya nizamının qurulması baxımından dünyada və Cənubi Qafqaz regionunda gedən prosesləri müqayisə etsək, burada maraqlı bir anaogiya müşahidə edə bilərik. Bu gün, dediyiniz kimi, qlobal arenada öz mövqelərini itirməkdə olan müəyyən Qərb dövlətləri dünyada Türk və müsəlman ölkələrinin getdikcə daha çox həmin mövqelərə sahib olmaq şansı əldə etdiklərindən narahat olduqları kimi, Azərbaycanın da Cənubi Qafqazda ən böyük və nüfuzlu regional güc olmasını həzm edə bilmirlər. Necə bilirsiniz, bu gün Ermənistanın sürətlə silahlandırılmasını da məhz Azərbaycana qarşı yeni bir təsir vasitəsi əldə etmək cəhdi kimi qiymətləndirə bilərikmi?
- Əslində bu kursun, yəni Ermənistanın silahlandırılması siyasətinin ikinci bir məqsədi heç yoxdur da. Azərbaycan bildiyiniz kimi, Türkiyə və Mərkəzi Asiyanın digər Türk dövlətləri arasında Xəzər dənizi vasitəsilə bir bağlantı missiyasını daşımaqla çox əhəmiyyətli rola malikdir. Ümumiyyətlə Qərb və Şərq arasında körpü rolunu oynayan ölkəmizin mövqeyi hər zaman böyük dünya gücləri üçün önəmli olub. Buna görə də həmin güclər daim Cənubi Qafqazda öz maraqlarını və mövcudiyyətlərini təmin etməyə çalışıblar. Təəssüflər olsun ki, bu gün də Ermənistan hökuməti hələ də qlobal güclərin əlində adi bir marionet olduğunu anlamaq istəmir. Qərb dairələri isə bu ölkədə şovinizmi və revanşizmi alovlandırmaqla yalnız və yalnız regional destabilliyə nail olmağa çalışırlar. Təsadüfi deyil ki, cənab Prezident İlham Əliyev öz müsahibəsində keçən ilin aprelində tarixdə ilk dəfə olaraq yaradılmış Amerika, Avropa İttifaqı və Ermənistan əməkdaşlıq platformasının qəribəliyini xüsusi qeyd etdi. Təbii ki, Azərbaycanın iştirakı olmadan Cənubi Qafqazda hansısa regional əhəmiyyətli məsələnin həllinə nail olmaq mümkün deyil. Bu dəfə də yeni destruktiv təşəbbüs nəticə etibarı ilə həm Avropa Komissiyasını, həm də Amerika Birləşmiş Ştatlarını Azərbaycan-Ermənistan normallaşma prosesindən kənarlaşdırılmasına səbəb oldu. Bu da təbiidir çünki, vasitəçilik missiyasına sahib olmaq istəyən ölkə və ya beynəlxalq təşkilat tərəf tuta bilməz. Məhz buna görə keçən ilin dekabr ayında Azərbaycan Amerika Dövlət katibinin üçtərəfli görüş keçirmək barədə xahişini rədd etdi. Ermənistanın silahlanmasına gəlincə isə, əlbəttə ki, bu proses təcili olaraq dayandırılmasa, böyük ehtimalla yeni gərginliyə gətirib çıxaracaq. Möhtərəm Prezidentimizin dediyi kimi, biz bunu istəmirik. Biz sülh istəyirik. Amma təəssüflər olsun ki, nə Ermənistanın özü, nə də onun yeni havadarları barədə bunu demək olmur. Onlar revanşist fikirlərlə yaşayırlar və Ermənistan faktiki olaraq regional təhlükə mənbəyi olaraq qalmaqda davam edir. Bu təhlükəni aradan qaldırmağın yeganə yolu da bu gün Ermənistanda hakim mövqelərə sahiblənə bilmiş faşist ideologiyasını məhv etməkdən ibarətdir. Bunu kimin edəcəyi isə, artıq Ermənistanın öz seçimi olacaq.
- Eldar müəllim, məlumdur ki, bu gün Ermənistanın silahlandırılması prosesində daha çox fəallığı ilə seçilən ölkələr Fransa və Hindistandır. Bu iki ölkənin Azərbaycana qarşı belə mövqe tutmalarını şərtləndirən hansısa ümumi məqamları qeyd edə bilərsinizmi?
- Hindistanın bu destruktiv mövqeyini mən deyərdim ki, bu ölkənin Azərbaycan-Pakistan əməkdaşlıq əlaqələrinin yüksək səviyyədə inkişaf etməsinə bir etiraz reaksiyası kimi qiymətləndirə bilərik. Fransaya gəldikdə isə, burada tamam başqa amillər əsas rol oynamaqdadır. Mən yenə də cənab Prezident İlham Əliyevin işlətdiyi bir ifadəni sitat kimi gətirmək istərdim: “Fransız siyasi səhnəsində konsensus varsa, həmin konsensus yalnız azərbaycanofobiya zəminində olur.” Həqiqətən də bu gün həm Fransa hökuməti, həm də hakimiyyətə gəlməyə iddialı olan qüvvələr məhz Azərbaycana münasibətdə nümayiş etdirdikləri yanaşma tərzinə görə bir-birilərindən qətiyyən fərqlənmirlər. Hələ Rusiya sülhməramlılarının Qarabağa mövcud olduğu dövrdə bizim ərazilərimizə qanunsuz səfərlər edənlər də Fransanın indiki prezidentinin rəqibləri idi. Onların arasında Paris meri də, Parisin daxil olduğu regionun qubernatoru da və bu yaxınlarda qısa müddətdə Baş nazir vəzifəsini tutmuş cənab Barnye də var idi. Dövlət başçımız tamamilə dəqiq qeyd etdi ki, islamofobiya və prinsipcə ksenofobiya fransız siyasi sinfinin fərqli cəhətləridir.
- Amma düşünürəm ki, Cənubi Qafqaz regionunda geosiyasi vəziyyəti formalaşdıran əsas məqamlardan danışarkən Gürcüstan amilini də diqqətdən kənarda qoymaq olmaz. Bu baxımdan qonşu ölkənin Baş nazirinin bu günlərdə Azərbaycana etdiyi səfərini necə şərh edə bilərsiz ?
- Sözsüz ki, bu gün Azərbaycan və Gürcüstan iki qonşu dövlət və strateji tərəfdaş ölkələr olaraq bir-biriləri üçün xüsusi əhəmiyyət kəsb edirlər. Lakin bu əlaqələr heç də son bir neçə il ərzində formalaşmayıb. Mövcud əlaqələr ölkələrimiz və xalqlarımız arasında tarixən mövcud olmuş səmimi dostluq və qonşuluq münasibətləri əsasında qurulub. Eyni zamanda da etiraf olunmalıdır ki, bu gün ölkələrimiz arasında münasibətlərin yüksək səviyyədə olmasında Azərbaycan və Gürcastanın ölkə rəhbərlərinin səyləri misilsiz töhfələr verir. Bu fakt öz əksini Gürcüstanın Baş naziri İrakli Kobaxidzenin cari ilin 17 yanvar tarixində Azərbaycana rəsmi səfəri zamanı cənab Prezident İlham Əliyevin və Gürcüstanın Baş nazirinin mətbuata bəyanatla çıxışlarında da öz təsdiqini tapıb. Cənab Prezident son 10 ay ərzində cənab Kobaxidzenin Azərbaycana artıq üçüncü dəfə səfər etdiyini vurğulayaraq bildirdi ki, bu fakt özlüyündə Gürcüstan-Azərbaycan əlaqələrinin nə qədər dərin və mənalı olduğunu göstərir. Bu səfərin xüsusi əhəmiyyətini önə çəkən daha bir məqam da budur ki, Gürcüstanda keçirilmiş parlament seçkilərindən sonra bu, Baş nazirin ilk xarici səfəridir. İlk səfərin məhz Azərbaycana həyata keçirilməsi təbii ki, Gürcüstan-Azərbaycan əlaqələrinin nə qədər yüksək səviyyədə olmasından xəbər verir. Önəmli məqamlardan biri də budur ki, ölkələrimiz arasında energetika sahəsindəki əməkdaşlıq təkcə Azərbaycan və Gürcüstan üçün deyil, həm də çox sayda başqa ölkələr üçün xüsusi əhəmiyyət kəsb edir. O cümlədən birgə neft-qaz layihələri bu gün bir çox Avropa ölkələrinin enerji təhlükəsizliyinin əsasını təşkil edir. Birmənalı olaraq deyə bilərik ki, Azərbaycan-Gürcüstan dostluq və əməkdaşlıq əlaqələri Cənubi Qafqazda sülhün, sabitliyin və inkişafın davam etməsi üçün ən vacib amillərdən biri kimi çıxış edir.
- Eldar müəllim, son olaraq mən 2024-cü ilin Azərbaycan üçün ən önəmli hadisələrdən biri, Qazax rayonunun dörd kəndinin Ermənistan tərəfindən ölkəmizə təhvil verilməsi barədə fikirlərinizi eşitmək istərdim...
- İlk növbədə deməliyəm ki, Qazax rayonunun dörd kəndinin bir güllə belə atılmadan erməni işğalından azad edilməsi bir başa cənab Prezident İlham Əliyevin rəhbərliyi ilə həyata keçirilən möhtəşəm diplomatiyanın növbəti böyük uğurudur. Möhtərəm dövlət başçımız hələ 2020-ci ildə Üçtərəfli Bəyanatın bağlanması şərtlərinin razılaşdırılması zamanı Qazax rayonunun işğal olunmuş kəndləri mövzusunu da qaldırmışdı. Əlbəttə ki, Ermənistanı bu gün həmin kəndləri hərbi əməliyyat aparılmadan qaytarmağa vadar edən bir neçə amil var. Birincisi, Vətən müharibəsi və onun nəticələridir. İkincisi, antiterror əməliyyatı. Cənab Prezident Qazaxın dörd kəndi ilə bağlı son tələbini Ermənistanın baş naziri qarşısında ötən ilin fevralında qoyumuşdu. Bu mövzu İkinci Qarabağ müharibəsinin başa çatmasından sonra daim gündəlikdə olub. Aartıq həmin kəndlərə cənab Prezident İlham Əliyev tərəfindən mütəxəssislərdən ibarət qrup ezam olunub. Orada erməni yaşayış məntəqələrinə yaxınlıq məsələsi və eskalasiya olacağı təqdirdə müəyyən təhdidlər olduğundan cənab Prezident tapşırıq verib ki, bu kəndlərin sakinləri üçün mənzil fondunun tikintisi məqsədilə daha çox müdafiə olunan yer seçilsin, onların təhlükəsizliyi təmin edilsin. Bu çox önəmli bir məsələdir və düşünürəm ki, Azərbaycanın 2024-cü ildə əldə etdiyi ən önəmli nailiyyətlərdən biridir.
- Eldar müəllim, hər zaman olduğu kimi, səmimi və ətraflı müsahibənizə görə Sizə həm oxucularımız adından, həm də bütün redaksiya heyətimiz adından səmimi minnətdarlığımızı bildirirəm. Sağ olun, sağlıqla qalın.
- Mən də sizə dolğun və məzmunlu suallarınıza görə təşəkkür edirəm. Sağ olun.
Söhbətləşdi: Azər Məmmədov
Azərbaycanlı zəvvarlar üçün 2025-ci ildə Həcc ziyarətinin qiymətləri məlum olub.
Bununla bağlı Qafqaz Müsəlmanları İdarəsi (QMİ) məlumat yayıb.
Qeyd edilib ki, QMİ 2025-ci ildə Həcc ziyarətinə getmək istəyən vətəndaşlar üçün qiymətləri müəyyən edib. Bir nəfər üçün ziyarət paketinin qiyməti 5 950 ABŞ dolları təşkil edir. Ziyarət vahid formada təşkil olunacaq və hava nəqliyyatı ilə ilə həyata keçiriləcək.
Tələb olunan sənədlər:
1. Ümumvətəndaş pasportu (ən azı 1 il vaxtı olmalıdır);
2. Şəxsiyyət vəsiqəsinin surəti;
3. 5 sm × 5 sm ölçüdə 2 ədəd ağ fonda çəkilmiş rəngli fotoşəkil (qadınlar tünd hicabda);
4. Sağlamlıq haqqında arayış.
Sənədlərin qəbulu 21 yanvar 2025-ci ildən etibarən iş günləri ərzində saat 10:00-dan 16:00-a kimi Qafqaz Müsəlmanları İdarəsinin Bakı şəhəri, Mirzə Fətəli küçəsi 7 ünvanında yerləşən inzibati binasında aparılacaq.
Azərbaycan 2024-cü ili sözün əsil mənasında yüksək nəticələrlə başa vurdu. Ötən il ölkəmiz üçün qazanılan uğur və nailiyyətlər baxımından zəngin, eymni zamanda da istər qlobal, istərsə də regional miqyasda baş vermiş bir çox mütərəqqi hadisələrlə əlamətdar oldu. Azərbaycan iqtisadiyyatının müsbət dinamika ilə inkişafı, idman sahəsində əldə edilmiş növbəti uğurlar, keçən ilin sonlarınadək hələ də işğal altında qalan dörd kəndimizin məhz diplomatik yolla azad edilməsi, ölkəmizin nüfuzlu beynəlxalq təşkilata üzv olması – bütün bunlar 2024-cü ilin müsbət fonunu yaradan hadisələrin bir hissəsidir. Həmçinin Azərbaycan keçən il ən nüfuzlu və mötəbər beynəlxalq tədbirlərə ev sahibliyi etmək ənənəsini davam etdirdi, planetin müxtəlif guşələrində yerləşən kiçik ölkələrin səsini dünyaya çatdırmaq üçün effektiv platforma təqdim etmək iqtidarında olduğunu göstərdi, qlobal problemlərin həllinə önəmli töhfələr vermək gücündə olduğunu bir daha təsdiq etdi. Bir sözlə, 2024-cü il Azərbaycanın öz gücünü, qüdrətini artırdığı, beynəlxalq mövqelərini möhkəmlətdiyi daha bir il kimi tarixdə qaldı.
Bugünkü buraxılışımızda Azərbaycanın 2024-cü ili başa vurduğu iqtisadi göstəricilər, keçən il beynəlxalq müstəvidə ölkəmizin əldə etdiyi uğurlar, eləcə də ölkə ictimaiyyətini maraqlandıran bir sıra digər mövzular barədə aia.az-ın suallarını Milli Məclisin deputatı, Azərbaycan Ağsaqqallar Şurasının sədri, iqtisad elmləri doktoru, professor Eldar Quliyev cavablandırır.
- Xoş gördük Sizi, Eldar müəllim. Yenidən Sizinlə görüşmək bizə çox xoşdur və ilk sualımız əlbəttə ki, Ölkə Prezidenti cənab İlham Əliyevin cari ilin 7 yanvar tarixində yerli televiziya kanallarına verdiyi müsahibəsi ilə bağlı olacaq...
- Mən də sizi ürəkdən salamlayıram və yenidən görüşməyimizdən məmnun olduğumu bildirmək istəyirəm. İcazənizlə suallara keçməzdən öncə mən bir neçə kəlmə ilə ümumilikdə Möhtərəm Prezidentimizin qeyd etdiyiniz müsahibəsi ilə bağlı bəzi fikirlərimi paylaşmaq istərdim. İlk növbədə qeyd etməliyəm ki, cənab Prezident İlham Əliyev bu müsahibə ilə dünyanın bir çox aparıcı siyasi liderlərinə növbəti dəfə “xalqın lideri necə olmalıdır” mövzusunda əsil master-klass nümayiş etdirdi. Mən özüm bu müsahibəni bir neçə dəfə dinlədim və inanın ki, hər dəfə dövlət başçımızın bu və ya digər məsələ ilə bağlı sarsılmaz məntiqə, inkarolunmaz faktlara və dərin təhlilə əsaslanan açıqlamalarını eşitdikcə belə bir liderimizin olduğuna görə sonsuz qürur hissi məni bürüyürdü. Əlbəttə ki, cənab Prezidentin qalib ölkənin rəhbəri kimi öz ölkəsi və öz xalqı ilə necə fəxr etməsi ilə bağlı səsləndirdiyi ifadələr əminəm ki, təkcə bizim üçün yox, həm də bütün dünyada yaşayan azərbaycanlılar üçün sonsuz bir qürur mənbəyidir. İkinci bir tərəfdən də bu gün dünyada gedən proseslərin incə və eyni zamanda dəqiq təhlili, bir çox ölkə rəhbərlərinin icazəsiz adlarını belə dillərinə gətirməkdən çəkindikləri müəyyən Qərb liderlərinin qlobal miqyasda rəvac verdikləri haqsızlıqların qətiyyətli ifşası və ciddi tənqidə məruz qoyulması, anti-Azərbaycan mövqelərdə duran və bu mövqelərdən ölkəmizə qarşı hər cür təxribatlar hazırlayan bəzi qlobal güclərə açıq mətnlə göndərilən sərt xəbərdarlıq mesajları – bütün bu məqamlar əlbəttə ki, hər bir Azərbaycan vətəndaşının qürurunu artıran, ləyaqətini yüksəldən amillərdir. Bundan başqa əminəm ki, cənab Prezident İlham Əliyevin bu müsahibəsi illərdir ki, dünyanın müxtəlif guşələrində öz azadlıqları uğrunda mübarizə aparan, lakin səsləri eşidilməyən, haqları tapdanan bir çox ölkələrin xalqları üçün də sönməkdə olan ümid çırağını yenidən alovlandıraraq onu parlaq məşələ çevirə biləcək bir nəfəs effektini verdi. Artıq həmin millətlər də onların problemlərini dünyaya çatdıra biləcək, dünyanı onları dinləməyə məcbur edə biləcək bir dost tapdıqlarına əmindirlər. Məhz bütün bu məqamlar cənab Prezident İlham Əliyevin müsahibəsinin tamamilə yeni formatda siyasi dialoqun necə qurulmasına dair unikal bir nümunə konsepsiyasında mahiyyətini ortaya qoyur.
- Tamamilə Sizinlə razıyam, Eldar müəllim. Hətta mən düşünürəm ki, elə ümumilikdə də Azərbaycanın 2024-cü ildə əldə etdiyi uğur və nailiyyətlər bir çox dünya ölkələri üçün xarici və daxili siyasətin necə yönləndirilməsi xüsusunda yaxşı bir örnək ola bilər. Bu barədə nə deyə bilərsiniz?
- Burada da əlbəttə ki, ikinci bir rəy ola da bilməz. Bu gün bütün dünyada müşahidə olunan qlobal iqtisadi böhranın fonunda Azərbaycanda keçən il üzrə ümumi daxili məhsulun 4 faizdən çox artması birmənalı olaraq çox yüksək nəticədir. Cənab Prezident İlham Əliyevin qeyd etdiyi kimi, bizim üçün əsas göstərici qeyri-neft sektorunun inkişafıdır. Artıq uzun illərdir iqtisadi inkişafla bağlı ölkəmizin əsas hədəflərindən biri məhz sənaye istehsalının artırılmasıdır ki, ötən il üzrə bu göstərici də 7 faizdən çox olub. Bu gün hətta bir çox inkişaf etmiş ölkələrin iqtisadiyyatında belə müşahidə olunan tənəzzülü nəzərə alsaq, görərik ki, Azərbaycan iqtisadiyyatı uğurla inkişaf edib. Xüsusilə bir məsələni də nəzərə almaq lazımdır ki, keçən il Azərbaycanın büdcəsi rekord səviyyədə idi. İl ərzində bir çox sosial proqramlar uğurla icra edildi, o cümlədən Qarabağın bərpası ilə bağlı böyük vəsait səfərbər olundu. Lakin bütün bunlara baxmayaraq, ölkənin valyuta ehtiyatları daha da artdı. Dövlət başçımızn qeyd etdiyi kimi, 2024-cü il ərzində valyuta ehtiyatları təqribən 5 milyard dollardan çox artıb və bu gün bu rəqəm 72 milyard dollara bərabərdir. Əlbəttə ki, əhalisi 10 milyon olan ölkə üçün bu, çox böyük göstəricidir. Qeyd etməliyəm ki, bu nəticələr heç də sadəcə ötən il görülən tədbirlər sayəsində əldə olunmayıb. Bu uğurlar uzun illər aparılan islahatların nəticələridir və bunun da təməlində cənab Prezident İlham Əliyev tərəfindən bütün bu illər ərzində həyata keçirilən düşünülmüş siyasət dayanır. Bütün bunlar onu deməyə əsas verir ki, Azərbaycan iqtisadi sahədə dayanıqlı inkişafa nail ola bilib və növbəti illərdə də bu dinamika saxlanılacaq.
- Yəqin ki, ötən ilin müsbət iqtisadi nəticələri 2025-ci ildə respublikamızda əhalinin rifah səviyyəsinin yüksəlişinə də öz təsirini göstərəcək ...
- Mən möhtərəm dövlət başçımızın öz müsahibəsində səsləndirdiyi bir ifadəni sizə xatırlatmaq istərdim: “Azərbaycan vətəndaşları ildən-ilə daha yaxşı yaşamalıdırlar.” Əminəm, siz də mənimlə razılaşarsınız ki, məhz cənab Prezident İlham Əliyevin bu sözləri hər bir Azərbaycan vətəndaşının rifah yüksəlişinin ən etibarlı təminatıdır. Bu gün artıq təkcə bizim xalqımız yox, bütün dünya bilir ki, Azərbaycan Prezidenti özünün hər kəlməsini imzası qədər dəyərləndirir, verdiyi bütün vədlərə də sonadək əməl edir. Elə cari ilin ilk ayından həyata keçirilmiş minimum əməkhaqqı və minimum pensiyaların artımlarına nəzər salsaq, dövlətin sosial sahəyə nə qədər böyük diqqət yetirdiyini aydın görə bilərik. Bildiyiniz kimi, artıq yanvar ayının birindən etibarən minimum əməkhaqqı 55 manat artaraq 400, minimum pensiyalar isə 40 manat artaraq 320 manata çatdırılıb. Bu, orta hesabla 14-15 faiz artım deməkdir. Əlbəttə ki, Qarabağın və Şərqi Zəngəzurun bərpasına milyardlarla manat investisiya ayıran bir ölkədə bu sahəyə bu qədər diqqətin yetirilməsi bir daha cənab Prezident İlham Əliyevin siyasətinin mahiyyətini açır və bu siyasətin əsasında ilk növbədə məhz insan amilinin durduğunu göstərir. Bu artımı düzgün qiymətləndirmək üçün ilk növbədə onu inflyasiya dərəcəsi ilə müqayisə etmək lazımdır. Bu göstərici isə keçən il 2 faizdən bir qədər çox idi. Bu o deməkdir ki, həyata keçirilmiş artım məhz daha az müdafiə olunan təbəqə üçün dövlət tərəfindən növbəti yardımdır. Bu bir daha nümayiş etdirir ki, sosial ədalət prinsipləri Azərbaycan dövləti üçün həmişə həlledici amil olub.
- Eldar müəllim, yəqin mənimlə razılaşarsınız ki, 2024-cü ildə əldə olunmuş nailiyyətlərdən danışarkən idman sahəsində əldə olunmuş uğurlar da xüsusi qeyd olunmalıdır. Keçən ilin olimpiya ili olduğunu nəzərə alsaq, bu mövzunun aktuallığı daha qabarıq formada nəzərə çarpır...
- Tamamilə sizinlə razıyam. Bu baxımdan biz birmənalı olaraq deyə bilərik ki, 2024-cü il Azərbaycan idmanı üçün də çox uğurlu olmuşdur. Cənab Prezident İlham Əliyevin ötən ilin idman yekunlarına həsr olunan mərasimdə etdiyi çıxışında qeyd olunduğu kimi, Azərbaycan idmançıları 2024-cü ildə beynəlxalq yarışlarda ölkəmizi ləyaqətlə təmsil edərək ümumilikdə 1700-ə yaxın medal qazanmışlar. Bu o deməkdir ki, Azərbaycan idman dövləti kimi öz gücünü müxtəlif beynəlxalq yarışlarda təsdiqləməkdə davam edir. Əlbəttə ki, Azərbaycan idmançılarının keçən il Parisdə keçirilmiş Yay Olimpiya Oyunlarındakı uğurları da xüsusi qeyd olunmalıdır. Möhtərəm dövlət başçımızın dediyi kimi, bu oyunlarda ölkəmiz tarixi nəticə əldə etmişdir. Belə ki, komanda hesabında Azərbaycan ilk dəfə 30-cu yerə yüksəlmişdir. Bütövlükdə iki yüzdən çox milli komandanın iştirak etdiyi Olimpiya Oyunlarında 30-cu yeri tutmaq həqiqətən də çox böyük nailiyyətdir. Müsəlman ölkələri arasında isə Azərbaycan üçüncü yerdə qərarlaşdı ki, bu da daha bir tarixi nailiyyətdir. Komandamız ikisi qızıl, ikisi gümüş, üçü bürünc olmaqla yeddi medal qazanaraq ölkəmizin idman şöhrətini bir daha yüksəklərə qaldırdı. Əlbəttə ki, biz növbəti illərdə də idmançılarımızdan yeni qələbələr, yüksək nəticələr gözləyirik. Çünki Azərbaycan dövlətinin siyasəti artıq uzun illərdir ki, idman sahəsinin inkişafını stimullaşdırır və bu sahə daim cənab Prezident İlham Əliyevin bilavasitə diqqətindədir. Gənc nəslin fiziki və mənəvi baxımdan sağlam, milli-vətənpərvərlik ruhunda formlaşmasında sözsüz ki, idmanın rolu çox böyükdür. Nəzərə almaq lazımdır ki, bu Yay Olimpiya Oyunlarında Azərbaycan qalib ölkə, idmançılarımız isə müzəffər xalqın nümayəndələri kimi iştirak edirdilər. Əlbəttə ki, bu vətənpərvərlik amili daim diqqətdə saxlanılmalıdır və saxlnılacaq da.
-Eldar müəllim, Azərbaycanın 2024-cü ildə əldə etdiyi uğurlar qlobal siyasi arenada da öz əksini aydın şəkildə tapıb. O cümlədən ölkəmizin müsəlman ölkələrini birləşdirən D-8 təşkilatına qəbul olunması da böyük nailiyyət kimi qiymətləndirilir. Bu barədə nə deyə bilərsiz?
- Heç şübhəsiz Azərbaycanın D-8 təşkilatına üzv qəbul edilməsi ölkəmizin beynəlxalq aləmdə nüfuzunun getdikcə artmasını bir daha nümayiş etdirdi. Bildiyiniz kimi, bu təşkilat təxminən 30 il bundan əvvəl qardaş Türkiyənin təşəbbüsü ilə yaradılıb və Azərbaycanın üzvlüyünə qədər səkkiz ölkədən ibarət idi. Maraqlıdır ki, ötən illər ərzində təşkilata əlavə üzv qəbul edilməmişdi. Birinci genişlənmə qərarından sonra isə D-8-ə üzv qəbul edilən ilk ölkə məhz Azərbaycan oldu. Cənab Prezident İlham Əliyevin dediyi kimi, bu, ölkəmizin nüfuzunu, eyni zamanda, beynəlxalq aləmdə önəmli rolunu göstərir. D-8 ümumilikdə bir milyarddan çox əhalisi olan və özündə ümumi iqtisadiyyatın 60 faizini cəmləşdirən müsəlman ölkələrinin təmsil olunduqları ən böyük təşkilatdır. Diqqət edin, dünyada 60-a yaxın müsəlman ölkəsi var və onların arasından məhz Azərbaycan yeni üzv seçilmişdir. Heç bir şübhə yoxdur ki, Azərbaycan bu təşkilatda da hər zamankı kimi fəal olacaq və D-8-in inkişafına mühüm töhfələr verəcək. Çünki Azərbaycan hər zaman müsəlman aləminin dəyərli üzvü olmuşdur. Təsadüfi deyil ki, İslam Əməkdaşlıq Təşkilatı Azərbaycanla bağlı həmişə çox müsbət fikirdə olub. İslam həmrəyliyi ilə bağlı cənab Prezident İlham Əliyevin mütəmadi olaraq irəli sürdüyü təşəbbüslər və atdığı addımlar, Azərbaycanda İslam dininə olan hörmət, dinlərarası münasibətlər, müsəlman ölkələrinin xətti ilə bir çox tədbirlərin keçirilməsi, bütün beynəlxalq təşkilatlarda, o cümlədən BMT-də Azərbaycan tərəfindən daim müsəlman ölkələrinin maraqlarının müdafiə olunması ölkəmiz barədə islam dünyasında ən yüksək səviyyədə müsbət rəyin formalaşmasını təmin edən əsas amillərdir. Azərbaycan mütəmadi olaraq bir çox müsəlman ölkələrinə yardımlar edir. O cümlədən ölkəmiz Fələstin xalqının üzləşdiyi fəlakətlə bağlı yenə də ön sıralarda oldu. Suriyada artıq Əsəd rejiminin çökməsindən, yeni hökumətin formalaşmasından sonra Türkiyənin ardınca ikinci ölkə Azərbaycan oldu ki, oraya humanitar yardım göstərdi. Bir daha deyirəm, məhz cənab Prezident İlham Əliyevin rəhbərliyi ilə həyata keçirilən bu siyasi xətt Azərbaycanı müsəlman dünyasının önəmli və nüfuzlu üzvünə çevirmişdir.
Söhbətləşdi: Azər Məmmədov
aia.az
(ardı var...)
Pensiyaçılara 200 manat əlavə yardımın ödənilməsi 2022-ci ildə tətbiq olundu. O zaman istehlak bazarında qiymətlərin kəskin artması səbəbindən cənab Prezident pensiyaçılara maddi yardım verilməsi ilə bağlı sənəd imzaladı. Həmin yardım da pensiya məbləğinə əlavə olundu və indeksləşdirildi.
Bu sözləri axar.az-a millət vəkili Vüqar Bayramov pensiyaçılara bu il də əlavə olaraq 200 manat maddi yardımın verilib-verilməyəcəyi məsələsinə münasibət bildirərkən deyib.
Onun sözlərinə görə, bununla bağlı Milli Məclisdə təklif səsləndirilib:
"Bu istiqamətdə təkliflər Milli Məclisdə müzakirələr zamanı təqdim olunub. O cümlədən Əmək və Sosial Siyasət Komissiyasının iclasında təqdim olunan təkliflərin biri məhz pensiyaçılara əvvəlki illərdə olduğu kimi yardımın verilməsi imkanının araşdırılması ilə bağlıdır. Sözsüz, bu istiqamətdə fiksal qiymətləndirmənin aparılması və buna uyğun olaraq qərarın verilməsi vacibdir".
Qeyd edək ki, ötən ilin noyabrına olan son statistik rəqəmlərə görə, Azərbaycanda təxminən 1 milyon 100 min pensiyaçı var.
AAYDA-nın 7 saylı Xüsusi Təyinatlı MMC-nin direktoru Məhəmməd Musayev - 1990-cı ilin yanvar ayı Azərbaycanın tarixində dönüş nöqtəsi oldu. Yanvarın 19-dan 20-nə keçən gecə, Bakıda baş verənlər yalnız bir xalqın ağrısını deyil, həm də onun dönməz iradəsini bütün dünyaya nümayiş etdirdi. O gecə Sovet ordusunun dinc əhaliyə qarşı törətdiyi qətliam, Azərbaycanın azadlıq mübarizəsində qanlı bir iz qoydu.
1988-ci ildən başlayan milli azadlıq hərəkatı Azərbaycanın hər yerində böyük coşqu ilə qarşılanırdı. İnsanlar azadlıq və müstəqillik arzusu ilə küçələrə çıxır, milli kimliklərini müdafiə edirdilər. Lakin bu mübarizəni boğmaq istəyən Sovet rejimi, böyük hərbi qüvvələr göndərərək xalqın səsini zorla susdurmağa çalışdı.
20 yanvar gecəsi Bakı küçələri qan gölünə çevrildi. Sovet tankları heç bir xəbərdarlıq etmədən insanları əzdi, küçələrdə açılan atəş yüzlərlə insanın həyatına son qoydu. Həyatını itirənlər arasında qadınlar, uşaqlar və yaşlılar da var idi. Bu amansız hücum, xalqımızın müstəqillik arzularını qırmaq məqsədi daşısa da, əksinə, azadlıq uğrunda mübarizə ruhunu daha da alovlandırdı.
Bu qanlı hadisələr yalnız faciə deyil, həm də xalqımızın əyilməzliyini, azadlıq sevgisini və Vətənə bağlılığını bütün dünyaya nümayiş etdirdi. 20 Yanvar şəhidləri, Azərbaycanın müstəqilliyi yolunda əbədi olaraq adlarını tarixə yazdılar. Onların qurbanı ilə xalqımız daha güclü bir milli birlik sərgilədi və 1991-ci ildə müstəqilliyini bərpa etdi.
Hər il 20 Yanvar günü, xalqımız şəhidlərin əziz xatirəsini yad edir, müstəqilliyin nə qədər dəyərli olduğunu bir daha anlayır. Bu gün yalnız bir faciə günü deyil, həm də milli qürur və qəhrəmanlıq dastanıdır. 20 Yanvar, qan yaddaşımızda əbədi yaşayan bir tarixdir. Şəhidlərimizin ruhu qarşısında baş əyirik və onların mübarizəsini unutmuruq.