 |
|
Tarixdə böyük şəxsiyyətlərin rolu əvəzolunmazdır və onlar tarixi proseslərə ciddi şəkildə təsir göstərmək imkanına malik olublar. Və o xalq xoşbəxtdir ki, onun tarixi liderləri böhranlı vəziyyətlərdə böyük addımlar ataraq ox xalqını, öz millətini xilas edə biliblər. Xalqımızın Ümummilli Lideri, müasir Azərbaycan dövlətinin memarı Heydər Əliyev də adı belə liderlərlə bir cərgədə çəkilən tarixi şəxsiyyətdir. Vəfatının 21-ci ildönümündə Ulu Öndərin xatirəsini bir daha dərin ehtiramla yad edirik.
Siyasi fəaliyyətinin bütün dönəmlərində Heydər Əliyev xalqa bağlı olduğunu, ümummilli maraqları hər zaman uca tutduğunu dəfələrlə sübut etmişdir. Bu baxımdan Heydər Əliyevin həm sovet dövründə, həm müstəqillik illərində Azərbaycana rəhbərliyi zamanı həyata keçirdiyi fəaliyyət hər zaman istinad edəcəyəmiz, öyrənəcəyimiz bir siyasi irsdir. Məhz bu irsin nəticəsi olaraq bu gün Azərbaycan müstəqil və qüdrətli dövlətdir.
Biz respublikamızın müasir tarixini həm də Heydər Əliyev epoxası kimi səciyyələndiririk. 55 il əvvəl başlanan bu epoxa Azərbaycana bir dövlət olaraq lazım olan hər şeyi bəxş edib. 1969-cu ildə Heydər Əliyevin Azərbaycana birinci dəfə rəhbər seçilməsi tarixə respublikamızın yüksəlişinin əsasının qoyulması kimi daxil olub. Heydər Əliyevin o illərdə respublikamıza rəhbərliyinin nəticəsi olaraq Azərbaycan keçmiş ittifaqın geridə qalmış aqrar respublikasından inkişaf etmiş sənaye respublikasına çevrildi. Həmin illər ərzində respublikamızda xeyli sayda böyük sənaye müəssisələri yaradıldı, kənd təsərrüfatında yüksək inkişaf baş verdi, çoxlu sayda ali məktəblər açıldı. Eləcə də, yeni, savadlı, intellektual ziyalı nəsli formalaşdı, azərbaycanlı gənclərin oxumaq üçün keçmiş ittifaqın nüfuzlu ali məktəblərinə göndərilməsi milli kadrların sayını artırdı.
Ulu Öndər sovet ideoloji xəttinin hakim olduğu bir dövrdə milli-mənəvi dəyərlərimizin itməsinə, yadlaşmasına imkan vermədi, Azərbaycan dilinin Konstitusiyada təsbit edilməsinə nail oldu. O dövrdə ziyalılar, yaradıcı insanlar milli ruhda əsərlər yazmağa başladılar. Çünki Heydər Əliyev onları qoruyurdu. Bütün bunlar özünəqayıdışın nümunələri idi.
Bütövlükdə, Heydər Əliyev milli özünüdərkə xidmət edən elə bir fəaliyyət həyata keçirdi ki, bu, xalqımızın sovet dövr tarixinin mühüm hadisəsi kimi xalqımızın siyasi-ictimai baxışlarında böyük rol oynadı.
Heydər Əliyev heç bir vəzifədə çalışmadığı dövrdə, daha sonra Naxçıvanda fəaliyyət göstərdiyi illərdə də Azərbaycanın dövlətçilik tarixində mühüm yeri olan bir fəaliyyət nümunəsi ortaya qoydu. Ulu Öndərimizin müstəqilliyimiz uğrunda gedən mübarizədəki tarixi xidmətləri bu baxımdan xüsusi qeyd edilməlidir. Bu mübarizənin əsas hadisələrindən biri 1990-cı ildə Naxçıvanda üçrəngli bayrağımızın ucaldılması idi.
Ümumiyyətlə, Heydər Əliyevin Naxçıvana rəhbərlik etdiyi 1991-1993-cü illərdə Bakıda hakimiyyətdə olmuş siyasi dairələr - Mütəllibov iqtidarı və onu əvəz edən AXC-Müsavat hakimiyyəti həmişə çalışırdılar ki, Heydər Əliyevə mane olsunlar, müxtəlif vasitələrlə hakimiyyətdən uzaqlaşdırsınlar. Ancaq, nail ola bilmədilər. Çünki xalq Heydər Əliyevi inam və qətiyyətlə müdafiə edirdi. 1992-ci ilin oktyabr ayının 24-də Bakıdakı rəhbərlərindən tapşırıq almış Naxçıvan cəbhəçiləri Heydər Əliyevi Naxçıvan Ali Məclisinin sədri vəzifəsindən uzaqlaşdırmaq üçün çevrilişə cəhd etmişdilər. Həmin vaxt Bakıdakı AXC-Müsavat iqtidarı Naxçıvana təyyarə ilə hərbi qüvvə göndərməyə çalışmışdı. Lakin onların bu çevriliş cəhdi iflasa uğradı. Xalq Naxçıvandakı qanuni hakimiyyəti, Heydər Əliyevi müdafiə üçün ayağa qalxmış və heç bir silah işlətmədən çevrilişn qarşısı alınmışdı. Naxçıvan əhalisi Bakıdan təyyarə ilə Heydər Əliyevin üzərinə göndərilən hərbi qüvvələrin hava limanına enişinin qarşısını almaq üçün “canlı sədd” yaratmışdı. Bu, Heydər Əliyev siyasəti ilə xalqın vəhdəti, birliyi, liderin təntənəsi idi. Xalqın gücü qarşısında aciz qalan AXC-Müsavat iqtidarı Naxçıvanda geri çəkilməyə məcbur olmuşdu. Bu, xalqın öz liderinə dəstəyinin bariz nümunəsi idi.
1992-ci ilin noyabr ayında Naxçıvanda Yeni Azərbaycan Partiyasının təsis olunması Azərbaycan xalqının məhz Heydər Əliyevə olan inamının göstəricisi idi. Xalqımız əmin ki, Heydər Əliyev özünün siyasi təcrübəsi ilə Azərbaycanı düşdüyü problemlərdən xilas edə bilər. 1993-cü ilin iyun ayında xalqın təkidli istəyi ilə Naxçıvandan Bakıya gələn Ulu Öndər Heydər Əliyev respublikamızı düşdüyü ağır böhranlı vəziyyətdən xilas etməklə ona bəslənən bütün ümidləri və inamı lider qətiyyəti ilə doğrultdu.
Ümummilli Liderimizin xalqın istək və arzusu ilə siyasi hakimiyyətə qayıdışı milli müstəqil dövlətimizin həyatında dönüş nöqtəsi idi. Ona görə Heydər Əliyevin hakimiyyətə qayıtması böyük hadisə olmaqla Azərbaycan üçün ümummilli baxımdan ciddi nəticələr verdi, müstəqilliyimizin əbədi və dönməz olmasında çox mühüm və əhəmiyyətli rol oynadı. Bu qayıdış milli müstəqilliyimizin əbədiliyinin təminatına çevrildi.
Ulu Öndər Heydər Əliyev həm də müstəqil dövlətimizin təməl prinsiplərini yaratdı. Bu təməl prinsipləri müasir çağırışlara uyğun olaraq müəyyən yeniliklərə məruz qalsa da, onun nüvəsi dəyişməzdir. Çünki bu prinsiplər dövlətçiliyimizin təməl prinsipləridir və onu heç kim təftiş edə bilməz. Azərbaycançılıq ideologiyası, qanunçuluq, hakimiyyətin mənbəyinin xalq olması, vətəndaş həmrəyliyi dövlətimizin əbədi təməl prinsipləridir.
Bütövlükdə, bugünkü müstəqil və güclü Azərbaycan dövləti Heydər Əliyev siyasətinin təntənəsidir. Azərbaycan xalqı məhz Ulu Öndər Heydər Əliyevin sayəsində müstəqil dövlətə sahib oldu. Heydər Əliyev siyasəti, Ulu Öndərin siyasi yolu bu gün Prezident İlham Əliyev tərəfindən çox böyük uğurla davam etdirilir. Ötən 21 ildə Azərbaycanın qazandığı bütün uğurlar bunu təsdiq edir. Bu illər ərzində Azərbaycan regionun lider və aparıcı dövlətinə çevrilib, iqtisadiyyatımız inkişaf edib, insanların sosial rifahı əhəmiyyətli dərəcədə yüksəlib.
Prezident İlham Əliyevin qətiyyətli siyasətinin nəticəsi olaraq Azərbaycan həm də dünyada bu gün qalib dövlət kimi tanınır. Vətən müharibəsində torpaqlarımızın işğaldan azad edilməsi, ərazilərimizdə erməni separatçılığının məhv olunması tariximizin şərəfli səhifələridir. Bununla Prezident İlham Əliyev Ulu Öndərin vəsiyyətini layiqincə yerinə yetirdi.
Ölkəmizin qazandığı uğurlar, Azərbaycanın tarixinin ən qüdrətli dövlətinə çevrilməsi göstərir ki, Prezident İlham Əliyevin rəhbərliyi ilə Ulu Öndər Heydər Əliyevin ideyaları və arzuları həyata vəsiqə alır.
Heydər Əliyev Fondunun vitse-prezidenti Leyla Əliyeva instaqramdakı rəsmi səhifəsində Ulu Öndər Heydər Əliyevin anım günü ilə əlaqədar paylaşım edib
.
Mülki silahın əldə edilməsi proseduru elektronlaşdırılır.
Xezerxeber.az xəbər verir ki 18 yaşı tamam olmuş şəxslər artıq onlayn şəkildə müraciət edərək ov və idmanla məşğul olma üçün nəzərdə tutulmuş silahları əldə edə biləcək.
Yeni sistemin məqsədi ölkədə silah satışı və qeydiyyatında şəfaflığı təmin etməkdir. Yenilik vətəndaşlara daha sürətli xidmətin göstərilməsini hədəfləyir.
Ekspertlər isə deyir ki, silahın elektron qaydada satılması o anlama gəlmir ki cinayətkarlıq artacaq. Əksinə yeni üsulla silahı əldə edən şəxs ciddi araşdırılıacaq və mənfi halların yaranması mümkün olmayacaq. Bununla da təhlükəsizlik tədbirlərinin daha effektiv həyata keçirilməsinə imkan yaranacaq.
Vətəndaş qeydiyyatda olduğu ünvanı dəyişərsə onda silahın olması barədə həm köhnə, həm də yeni ərazi üzrə polis orqanına məlumat verməlidir.
Kirayədə qalanların qarşılaşdıqları əsas problemlərdən biri ev sahibinin onları yaşayış yerindən nə vaxtsa çıxarmaları olur. Aydın məsələdir ki, artıq uyğunlaşmağa başladığı evdən çıxmaq şəxsi yenidən eyni prosesi təkrarlamağa - yaşayış yeri axtarmağa, vaxt itkisinə vadar edir.
Bəs qanunla ev sahibi kirayəçi ilə bağladığı müqaviləni hansı hallarda poza bilər?
“Qafqazinfo”nun məlumatına görə, Mülki Məcəlləyə əsasən, yaşayış otağının kirayəsi üzrə hüquq münasibətlərində müqaviləni ləğv etmək hüququnu istisna edən və ya məhdudlaşdıran razılaşmanın qüvvəsi yoxdur. Yəni tərəflərin hər birinin müqaviləni ləğv etmək hüququ var. Həmçinin yaşayış otağının kirayəsi müqaviləsində kirayəçinin ziyanına olan kənaraçıxmalar barəsində razılaşmanın da qüvvəsi yoxdur.
.jpg)
Qanunvericiliyə görə, kirayə müqaviləsinə onun bağlandığı müddət bitdikdə xitam verilir. Əgər kirayə müqaviləsində müddət müəyyənləşdirilməyibsə, tərəflərdən biri müqavilənin ləğvinə dair bildiriş verə bilər. Bildiriş yazılı formada verilməlidir və müqavilənin ləğvi üçün əsaslar göstərilməlidir.
Həmçinin kirayəyə verənin müqaviləyə xitam vermək arzusu aşağıdakı hallarda əsaslı sayılır:
- Kirayəçi müqavilə öhdəliklərinin pozulmasında təqsirli olduqda;
- Kirayəyə verənin otaqlara özü və ya ailə üzvləri üçün mənzil kimi ehtiyacı olduqda və digər hallarda.
Kirayəyə verən özü yaşadığı və ən çoxu iki mənzildən ibarət olan yaşayış binasında mənzilin kirayə müqaviləsini özünün marağı olmadan da ləğv edə bilər. Bu halda müqavilənin ləğvinə dair xəbərdarlıq müddəti üç ay uzadılır. Bu, kirayəyə verənin özünün yaşadığı mənzil çərçivəsində yaşayış otağının kirayəsi haqqında müqaviləyə uyğun tətbiq edilir.
.jpg)
Kirayəyə verən xəbərdarlıq müddətini gözləmədən də aşağıdakı hallarda kirayə müqaviləsini ləğv edə bilər:
- Kirayəçi iki ardıcıl müddət üçün kirayə haqqının və ya onun xeyli hissəsinin ödənilməsini gecikdirdikdə;
- İkidən çox müddət üçün iki aylıq əmlak kirayəsi haqqının məbləğinə çatan məbləğdə əmlak kirayəsi haqqının ödənilməsini gecikdirdikdə.
Ümumilikdə isə tərəflərdən biri öhdəliklərini öz təqsiri üzündən ciddi şəkildə pozursa, müqavilə xəbərdarlıq müddəti gözlənilmədən ləğv edilə bilər.
Lakin bütün bu hallar kirayə verənlə kirayəçi arasında müqavilə bağlandığı halda qüvvədədir. Təcrübədə isə sözügedən tərəflər daha çox öz aralarında olan şifahi razılaşmaya üstünlük verirlər. Bu isə yaranan mübahisələrin hüquqi çərçivədə həllinə imkan yaratmır.
Xəbər verdiyimiz kimi, Baş nazir Əli Əsədov gələn ilin bayram günləri ilə bağlı Qərar imzalayıb.
Qərara əsasən məlumatına görə, 2025-ci il martın 20, 21, 22, 23, 24-ü Novruz bayramı günləri müəyyən edilib.
Gələn il 22 və 23 mart tarixləri şənbə və bazar günlərinə təsadüf etdiyi üçün Əmək Məcəlləsinə uyğun olaraq, 25 və 26 mart tarixləri qeyri-iş günü olacaq.
Beləliklə, 2025-ci ilin Novruz bayramında ardıcıl 7 gün - 20, 21, 22, 23, 24, 25 və 26 mart tarixlərində iş olmayacaq.
Martın 27-si isə bayramdan sonra ilk iş günüdür.
2025-ci il martın 20, 21, 22, 23, 24-ü Novruz bayramı, martın 30, 31-i Ramazan bayramı, iyunun 6, 7-si Qurban bayramı günləri müəyyən edilib.
Nazirlər Kabineti bu barədə qərar verib.
Nəzərdə tutulan günlər iş günü hesab edilmir.
Ümummilli Lider Heydər Əliyevin anım günü ilə əlaqədar bəzi küçə və prospektlərdə nəqliyyatın hərəkətinə məhdudiyyət qoyulmaqla istiqamətlər dəyişdiriləcək.
Bu barədə Bakı Şəhər Dövlət Yol Polisi İdarəsindən məlumat verilib.
Bildirilib ki, dekabrın 12-də səhər saat 08:00-dan mərasim qurtaranadək Parlament prospekti ilə kəsişən, birləşən küçələrdə avtomobillərin hərəkəti tam məhdudlaşdırılacaq. Məlumata görə, hərəkətin məhdudlaşdırılması Ulu Öndər H.Əliyevin xatirəsini yad edənlərin rahat, fasiləsiz və təhlükəsiz hərəkətinin təmin olunması məqsədilə həyata keçirilir.
"Bununla əlaqədar olaraq, Mikayıl Müşfiq küçəsi və Hüseyn Cavid prospektinin kəsişməsindən, Mikayıl Müşfiq dairəsi ilə Mətbuat prospektinin kəsişməsindən, Mehdi Hüseyn küçəsi, Teleteatr binasının qarşısından, İzzət Nəbiyev, Abbasqulu Abbaszadə küçələrinin kəsişməsindən, yəni Milli Məclisin inzibati binasının arxa hissəsindən Parlament prospekti – Fəxri Xiyaban istiqamətinə bütün nəqliyyat vasitələrinin hərəkəti məhdudlaşdırılaraq istiqamət dəyişdiriləcək. Bu istiqamətdə şəxsi avtomobillərdən mümkün qədər az istifadə edilməsi, ictimai nəqliyyata üstünlük verilməsi tövsiyə olunur", - məlumatda qeyd olunub.
Son günlərdə quş əti məhsullarının qiymətində artım müşahidə olunur.
Əsas ərzaq kateqoriyalarından olan bu məhsulun bahalaşması həm istehlakçıların gündəlik xərclərini artırır, həm də restoran və ictimai iaşə sektoruna təsir edir.
Marketlərdə toyuq ətinin qiymətlərində 0.50-1 AZN arasında bahalaşma müşahidə olunur. Əvvəllər 17-18 manata alınan hind toyuğu ətinin qiyməti isə 19-20 manata yüksəlib.
Bahalaşma ilə bağlı BAKU.WS-ə danışan iqtisadçı Rəşad Həsənov bildirib ki, burada səbəblərdən biri tələbin qısamüddətli dövr üçün kəskin artmasıdır:
"Digər səbəb isə təklif aspektindən müəyyən gecikmələrin ortaya çıxması və həmçinin bu istiqamətdə yerli istehsalçıların bazarın tələbinə uyğun olaraq məhsulu bazara təklif edə bilməməsi amilidir. Eyni zamanda burada digər faktorlar da təbii ki, öz rolunu oynayır.
Məhsullar bu bazarda, xüsusilə də çox dinamikdir, qismən liberal bazar hesab olunur. Çünki xüsusilə yerli təchizatçıların sayı çoxdur və bu istiqamətdə idxal meyilləri də vardır. Buna görə də bolluq yaranan kimi qiymətlər ucuzlaşır. Əksinə təchizat zəncirində müəyyən problemlər ortaya çıxanda, xüsusilə də broyerlərin hər hansı birində məhsul istehsalı ilə bağlı çatışmamazlıq ortaya çıxanda və broyler bazara məhsul təklif etməyəndə qısa müddətdə qiymətlərdə öz əksini tapır. Yəni bildirdiyimiz kimi, bu bazarda, xüsusilə də qiymət elastikliyi çox yüksəkdir".
Azərbaycanda özəl pensiya sisteminin 2026-cı ilin əvvəlindən fəaliyyətə başlayacağı gözlənilir.
APA xəbər verir ki, “Qeyri-dövlət pensiya fondları haqqında” qanun layihəsi Dövlət Sosial Müdafiə Fondu tərəfindən aidiyyatı qurumlarla, o cümlədən Mərkəzi Bankla müzakirə edilir.
Bildirilib ki, vətəndaşların pensiya kapitalının bir hissəsi özəl pensiya fondlarına yönəltmə imkanı əldə edəcək. Vətəndaş 50-55 yaşında toplanan pensiya kapitalını birbaşa götürərək biznes və ya hansısa təsərrüfat yarada, ev ala və digər məqsədlər üçün istifadə edə biləcək. Pensiya kapitalının DSMF-də qalan hissəsindən isə təqaüd almaqda davam edəcək. Birbaşa götürüləcək pensiya ödənişinin 50-70% civarında ola biləcəyi bildirilir. Bununla belə, vətəndaşın bu sistemə qoşula biləcəyi və birbaşa pensiya məbləğindən istifadə edə biləcəyi yaş, o cümlədən ödəniləcək birbaşa pensiya məbləği və bəzi digər məqamlar hələlik müzakirə predmetidir.
Qeyd edilib ki, burada açıq qalan məsələlərdən biri əhalinin böyük qisminin minimum əmək haqqı müqabilində pensiya kapitalının daha aşağı olmasıdır. Bu isə ancaq onların minimal pensiya məbləğini formalaşdırmağa kifayət edir.
Müzakirə predmeti olan məsələlərdən biri isə özəl pensiya sisteminin özəl pensiya fondu və ya həyat sığorta şirkətləri vəsitəsilə həyata keçiriləcəyidir. Bildirilib ki, özəl pensiya sisteminin həyat sığorta şirkətləri vəsitəsilə həyata keçirilməsi sığorta bazarının inkişafı üçün yeni təkan ola bilər. Sığorta bazarı hər il minimum 400 milyon manat civarında arta bilər. Bu isə sığorta bazarının Mərkəzi Bankın 2028-ci ilə qədər ümumdaxili məhsulun 3%-i civarına çatırılması ilə bağlı hədəfinə uyğundur.
Xidməti uyğunsuzluğa görə buraxılmaya təqdim olunanlar hərbi-həkim komissiyasının müayinəsinə göndərilməyəcəklər.
Bu məsələ Milli Məclisin bu gün keçirilən iplenar iclasında müzakirəyə çıxarılan “Hərbi xidmətkeçmə haqqında” Əsasnaməyə təklif edilən dəyişiklikdə əksini tapıb.
Layihəyə əsasən, xidməti uyğunsuzluğa görə (müddətli həqiqi hərbi xidmət hərbi qulluqçularından başqa) buraxılmaya təqdim olunanların da hərbi-həkim komissiyasının müayinəsinə göndərilməyəcək.
Müzakirələrdən sonra sənəd səsverməyə qoyularaq üçüncü oxunuşda qəbul edilib.