 |
|
Baş Dövlət Yol Polisi İdarəsi piyadalara müraciət edib.
Bu barədə İdarəsindən məlumat verilib.
Müraciətdə bildirilib ki, hazırda mövsümlə əlaqədar havanın tez qaralması, əsasən yağışlı, çiskinli olması digər hərəkət iştirakçıları kimi piyadalar üçün də bir sıra çətinliklər yaradır:
"Təhlillər göstərir ki, yağmurlu havada yolların sürüşkənliyi, məhdudiyyətli görünmə məsafəsinin artması piyadaların vurulması ilə nəticələnən yol qəzalarının sayına əhəmiyyətli dərəcədə təsir göstərir.
Bununla yanaşı, əksər hallarda piyadaların qeyri-sabit hava şəraitini düzgün qiymətləndirməməsi, daha çox sürücülərin məsuliyyətinə güvənərək yolu nəzərdə tutulmayan yerlərdən keçməsi, qəflətən yolun hərəkət hissəsinə çıxması, səki, eləcə də piyada keçidləri olduğu halda yolun hərəkət hissəsi ilə səyahətə üstünlük verməsi sonda xoşagəlməz hadisələrə gətirib çıxarır".
Baş Dövlət Yol Polisi İdarəsi bir daha piyadalara müraciət edərək onları hazırda ölkə ərazisində hökm sürən qeyri-sabit hava şəraitində yol hərəkəti qaydalarına sözsüz əməl etməyə, yuxarıda sadalanan xüsusatları nəzərə alaraq, öz həyat və sağlamlıqlarına qarşı daha diqqətli olmağa çağırır.
“BMT-nin İqlim Dəyişmələri haqqında Çərçivə Konvensiyası Tərəflər Konfransının 29-cu sessiyası öz möhtəşəm nəticələri ilə bütün dünyanı heyrətləndirdi. Təsadüfi deyil ki, Ölkə Prezidenti cənab İlham Əliyev noyabrın 24-də sosial şəbəkə hesablarında “COP29 iqlim diplomatiyasında dönüş nöqtəsidir!” sərlövhəsi ilə etdiyi paylaşımında Bakı COP tədbirinin ən möhtəşəm COP-lardan biri kimi tarixə düşəcəyini xüsusi vurğulayıb”.
Bu sözləri Milli Məclisin deputatı Kamaləddin Qafarov mətbuata açıqlamasında deyib.
Millət vəkili bildirib ki, 80 dövlət və hökumət başçısının, qeydiyyatdan keçmiş 76 mindən çox iştirakçının qatıldığı COP29-un çox yaxşı təşkil olunması ilə bağlı bütün qonaqlardan yüksək qiymət almaq qürurverici haldır. “Yaşıl dünya naminə həmrəylik” şüarını rəhbər tutan Azərbaycan bitərəf vasitəçi kimi çıxış edərək tərəflər arasında danışıqların qərəzsiz aparılması üçün bütün imkanları ən yüksək səviyyədə təqdim edə bildi. Dövlət başçımızın təşəbbüsü və səyləri ilə bütün proses boyunca Azərbaycan, ilk növbədə, inkişaf etməkdə olan ölkələrin, xüsusilə kiçik ada dövlətlərinin və ən az inkişaf etmiş dövlətlərin ehtiyaclarını nəzərə alan nəticə əldə etməyə çağırışlar etdi. Eyni zamanda da ölkəmiz müstəmləkə idarəçiliyi ilə daha da ağırlaşan ekoloji problemlərdən əziyyət çəkən xalqlar və regionlar ilə həmrəyliyini bir daha nümayiş etdirdi. Bütün bunların nəticəsi olaraq, dünya tarixi Bakı nailiyyətinə şahid oldu.”
K.Qafarov 1,3 trilyon ABŞ dolları yeni iqlim maliyyəsinin hədəf seçilməsinin möhtəşəm nailiyyət olduğunu vurğulayıb: “Cənab Prezident İlham Əliyevin dediyi kimi, Bakı əhəmiyyətli artım nümayiş etdirərək 2035-ci ilə qədər inkişaf etməkdə olan ölkələrə 1,3 trilyon ABŞ dolları həcmində iqlim maliyyəsinin təmin edilməsi üçün yeni qlobal hədəf qarşıya qoydu. Bununla da Bakı Maliyyə Məqsədi və BMT karbon bazarları üzrə əldə edilmiş irəliləyişlər gözləntiləri çox üstələmiş oldu. Bu isə bilavasitə Azərbaycanın COP29-un Sədri olaraq apardığı intensiv, çoxtərəfli diplomatiya nəticəsində əldə olunmuş nailiyyətdir. Bu qərar qlobal investisiyaların yeni dalğasına təkan verəcək. Əldə olunmuş daha bir görkəmli nailiyyət “İqlim Davamlılığı üçün İnsan İnkişafı üzrə Bakı Təşəbbüsü”dür. Bu təşəbbüsə əsasən 8 BMT agentliyi, 3 çoxtərəfli inkişaf bankı və 3 iqlim fondu arasında birgə bəyanat qəbul edilmişdir ki, həmin bəyanat çərçivəsində də İqlim Davamlılığı üçün İnsan İnkişafı üzrə Bakı Rəhbər Prinsipləri qəbul edildi və Bakı COP Sədrliklərinin İqlim və Səhiyyə üzrə Davamlılıq Koalisiyası yaradıldı” .
ƏVVƏLİ BURADA
Bugünkü buraxılışımızda Azərbaycanın ev sahibliyi etdiyi COP29-ungedişi və əldə olunan nəticələr, eləcə də ölkə ictimaiyyətini maraqlandıran bir sıra digər mövzular barədə aia.az-ın suallarını Milli Məclisin deputatı, Azərbaycan Ağsaqqallar Şurasının sədri, iqtisad elmləri doktoru, professor Eldar Quliyev cavablandırır.
- Eldar müəllim, elə mövzunun davamı olaraq cari ilin 24 oktyabr tarixində Kazan şəhərində keçirilmiş XVI BRICS Sammitinin “Outreach”/“BRICS+” formatının ilk plenar iclasında dövlət başçımızın iştirakı və Sammitdə müzakirə olunan mövzular barədə də fikirlərinizi almaq istərdim...
- Azərbaycan bir çox beynəlxalq təşkilatlar kimi BRİCS-lə də qarşılıqlı faydalı əsaslar üzərində qurulmuş əməkdaşlıq əlaqələrini uğurla inkişaf etdirir. Ölkəmizin eyni zamanda həm mühüm geostrateji mövqedə yerləşməsi, həm də güclü dövlət olaraq tam müstəqil xarici siyasət yürütməsi BRICS üzvləri ilə çoxşaxəli və zəngin iqtisadi münasibətlərin formalaşmasını şərtləndirib. Xüsusi olaraq diqqəti cəlb edən məqamlardan biri budur ki, son illər ərzində yeni yaradılmış nəqliyyat infrastrukturunun vəziyyəti Azərbaycana həm Avropa, həm də Asiya ölkələri üçün etibarlı tərəfdaş statusunu qazandırıb. Xüsusilə BRICS-in Asiyadan olan üzvlərinin Avropa ilə iqtisadi əlaqələrinin intensivləşdirilməsində Azərbaycanın rolu daha böyük önəm kəsb edir. Cənab Prezident İlham Əliyev qeyd etdiyiniz BRİCS Sammitinin plenar iclasında etdiyi çıxışında da vurğuladı ki, öz coğrafi mövqeyindən istifadə edən və müasir infrastruktur yaradan Azərbaycan Avrasiyanın mühüm nəqliyyat və logistika mərkəzlərindən birinə çevrilib. Bu gün “Şərq-Qərb” və “Şimal-Cənub” nəqliyyat yollarının Azərbaycan ərazisində olan bütün seqmentləri uğurla fəaliyyət göstərir. Digər bir tərəfdən isə, qlobal güclər arasında mübarizənin intensivləşdiyi və genişləndiyi bir dövrdə Azərbaycanın BRICS-lə əməkdaşlıq əlaqələrinin əlbəttə ki, siyasi tərəfləri də yox deyil. Azərbaycan özünün xarici siyasət kursunda beynəlxalq münasibətlərdə çoxtərəflilik prinsipinihər zaman fəal şəkildə təşviq edib. Belə olan halda qərbmərkəzli qlobal dünya nizamına alternativ bir koalisiya olaraq təqdim edilən BRICS ilə əlaqələrin siyasi konteksti də Azərbaycan üçün kifayət qədər önəmlidir.
- Eldar müəllim, istərdim ki, Azərbaycanın Türk Dövlətləri Birliyi çərçivəsində fəaliyyəti barədə də məhz elə bu kontekstdə söhbətimizi davam etdirək. Təşkilata üzv ölkələrin Dövlət Başçılarının cari ilin noyabr ayının 6-da Qırğızıstanın paytaxtı Bişkekdə keçirilən 11-ci Zirvə görüşündə müzakirə olunan məsələlərdən daha çox hansıları diqqətinizi çəkdi ?
- Türkdilli dövlətlərlə əlaqələrin genişləndirilməsi və inkişaf etdirilməsi Azərbaycanın xarici siyasətində mühüm prioritet istiqamətlərdən biridir. Bu baxımdan ölkəmizin Türk Dövlətləri Birliyi çərçivəsində fəaliyyəti xüsusi önəm kəsb edir. Cənab Prezident İlham Əliyev Bişkek Sammitində etdiyi çıxışında Təşkilatın əsasını qoymuş Naxçıvan Sazişinin imzalanmasından 15 il keçdiyini diqqət mərkəzinə çəkərək bildirdi ki, bu müddət ərzində quruma üzv ölkələr birlikdə son dərəcə uğurlu inkişaf yolu keçiblər. Əlbəttə ki, bu ilin iyul ayında Təşkilatın Şuşa şəhərində keçirilmiş Dövlət başçılarının qeyri-rəsmi Zirvə görüşündə imzalanmış Qarabağ Bəyannaməsi əməkdaşlığın daha da dərinləşməsinə mühüm töhfələr verməkdədir. Müasir dünyada güc amilinin getdikcə daha çox həlledici faktor kimi çıxış etməsi Türk dövlətləri arasında olan dostluq və qardaşlıq əlaqələrinin gücləndirilməsinin vacibliyini vacib şərt kimi önə çəkir. Azərbaycanın xarici siyasəti də məhz bu məqsədə xidmət edir. Cənab Prezident öz çıxışında bir daha vurğuladı ki, Azərbaycan Türk Dövlətləri Təşkilatının möhkəmlənməsi istiqamətində səylərini bundan sonra da davam etdirəcək. Bu baxımdan əlbəttə ki, Azərbaycanın Türk Dövlətləri Təşkilatının Katibliyinə 2 milyon və Ağsaqqallar Şurasına 100 min ABŞ dolları məbləğində maliyyə dəstəyi təşkilatın potensialının daha da güclənməsinə töhfə verəcək. Bu gün bütün dünyada ən müxtəlif xarakterli təhlükələrin artdığını hamımız görürük. Bu təhlükələrdən effektiv şəkildə müdafiə oluna bilmək üçün Türk dövlətlərinin də müdafiə, təhlükəsizlik və müdafiə sənayesi sahələrində əməkdaşlığı böyük əhəmiyyət kəsb edir. Dövlətimizin başçısı öz çıxışında məhz bu məqamı diqqət mərkəzinə çəkərək qeyd etdi ki, son dövrlər məhz bu sahələrdə əməkdaşlığın daha da genişlənməsi çox müsbət haldır. Bütün bunlar Türk dünyasının öz qüdrətini artırmasına və yeni dünya düzənində önəmli güc mərkəzlərindən biri kimi yer almasına xidmət edir.
- Eldar müəllim, istərdim bir qədər də bu yaxınlarda, yəni son bir ay ərzində ölkəmizdə baş verən mühüm hadisələrdən danışaq. Bildiyiniz kimi, dövlətimizin başçısı noyabr ayının 8-də Bakıda Zəfər Parkının açılışını etdi. Bu barədə hansı fikirlərinizlə bölüşmək istərdiniz?
- Artıq dördüncü ildir ki, Azərbaycan xalqı Zəfər Gününü qalib ölkənin qalib vətəndaşları olaraq qeyd edir. Bu il isə, cənab Prezident İlham Əliyev bayram münasibətilə öz xalqına möhtəşəm bir hədiyyə etdi ki, bu da məhz Zəfər Parkının açılışı oldu. Açılış mərasimində etdiyi çıxışında cənab Prezident 44 günlük Vətən müharibəsinin mahiyyətini açaqraq bir daha vurğuladı ki, bu, bizim şanlı tariximiz və parlaq Qələbəmizdir. İkinci Qarabağ müharibəsi ordumuzun gücünü, hərbçilərimizin peşəkarlığını, fədakarlığını, xalqımızın əzmini bütün dünyaya nümayiş etdirdi. Xüsusi olaraq qeyd etmək lazımdır ki, möhtərəm dövlət başçımızın çıxışında yer almış və Qərbin anti-azərbaycan qüvvələrinə ünvanlanan ismarıclar, səsləndirilən fikirlər Cənubi Qafqazı destabillik zonası kimi görmək istəyənlərin əsil simalarını bir daha ifşa edir və onları ölkəmizə qarşı yönəlmiş məkrli niyyətlərindən birdəfəlik əl çəkməyə çağırır. Bu gün Azərbaycanın qarşısında duran hədəf və məqsədlər yalnız sülh şəraiti, iqtisadi inkişaf, beynəlxalq səviyyədə qarşılıqlı faydalı əməkdaşlıq və quruculuq işlərini nəzərdə tutur. Cənab Prezident İlham Əliyevin çıxışında da bu məqamlar açıq-aydın öz əksini tapıb. Azərbaycan öz torpaqlarının işğalına son qoymaqla, ərazi bütövlüyünü və suverenliyini tam bərpa etməklə bütün hədəflərinə çatıb. Biz indi quruculuq işləri ilə məşğuluq və qətiyyən müharibə istəmirik. Lakin Vətən müharibəsindən sonra regionumuzda yaranmış vəziyyət Qərbin heç də bütün təmsilçilərini təmin etmir. Ermənistanın arxasında duran, Azərbaycana düşmən gözü ilə baxan məlum qüvvələr Ermənistanı silahlandırır və Cənubi Qafqazı yenidən qeyri-sabitlik, münaqişə ocağına çevirməyə çalışırlar. Qərbdə Azərbaycana qarşı davamlı olaraq çirkin kampaniyalar aparılır. Buna görə də ölkəmiz və xalqımız, Azərbaycan Silahlı Qüvvələri hər zaman istənilən aqressiyanı dəf etmək iqtidarında olmalıdır.
- Qayıdaq COP29 mövzusuna. Bu tədbir çərçivəsində noyabrın 13-də inkişaf etməkdə olan kiçik ada dövlətlərinin Sammiti keçirildi. Sammitdə iştirak edən cənab Prezident İlham Əliyev iqlim dəyişikliyinin bu ölkələrə yaratdığı təhdidlər və yaranan təhlükələrin minimuma endirilməsi üçün görülməyi zəruri olan tədbirlər barədə maraqlı fikirlər səsləndirib. Bu barədə nə deyə bilərsiz?
- Azərbaycan artıq uzun müddətdir ki, kiçik ada dövlətlərinə dəstək verir, onlara müxtəlif təbii fəlakətlərin təsirini azaltmaq üçün yardım göstərir. Həmçinin Azərbaycan su təchizatı, qida təhlükəsizliyi və mədəni irsin bərpası layihələrinə dəstək verir. Qeyd edim ki, həmin ölkələrin Azərbaycana böyük hörmət və səmimi minnətdarlıqla yanaşmalarının COP29-un gedişində mən özüm şahidi oldum. Sammitdə çıxış edən cənab Prezident İlham Əliyev Azərbaycanın Qoşulmama Hərəkatında dördillik sədrliyi dövründə 80-dən artıq ölkəyə, o cümlədən 20 kiçik ada dövlətinə maliyyə və humanitar yardım göstərdiyini qeyd etməklə, bütün inkişaf etmiş ölkələri bu işdə səfərbər olmağa çağırdı. Qeyd olundu ki, həmin ölkələrin üzləşdiyi təhdidlərin aradan qaldırılması COP29-da Azərbaycanın göstərdiyi səylərin əsasını təşkil edir. Əlbəttə ki, bütün bu konstruktiv çağırışlar həm kiçik ada dövlətlərinin, həm də inkişaf etməkdə olan ölkələrin təbii fəlakətlər qarşısında aciz durumda qalmamaları məqsədinə xidmət edir.
- Yəqin mənimlə razılaşarsınız ki, dövlət başçımızın neokolonializm və iqlim dəyişmələri mövzusunda səsləndirdiyi fikirlər xüsusilə diqqətləri cəlb etmiş oldu?
- Tamamilə sizinlə razıyam və hətta deyərdim ki, məhz bu fikirlər hazırda Fransa və Niderland kimi dövlətlərin hələ də müstəmləkəsində qalan ölkələr üçün daha böyük önəm kəsb edir. Məsələ bundadır ki, bu ölkələr hazırda iqlim dəyişikliyindən ən çox əziyyət çəkənlər sırasındadır. Həm də bu fəsadlar təkcə təbii proseslər nəticəsində deyil, eləcə də neokolonializmi təşviq edən dövlətlərin müstəmləkə ərazilərində dağıdıcı fəaliyyətləri ilə bağlı yaranır. Öz çıxışında cənab Prezident İlham Əliyev bu fəlakətlərə səbəb olan dövlətlərin həyata keçirdikləri siyasəti qətiyyətlə ifşa etdi və pislədi. Fransa və Niderlandın öz müstəmləkə ərazilərində uzun illər boyunca apardıqları yüzlərlə nüvə sınaqları səbəbindən ətraf mühitin ciddi şəkildə ziyan görməsini vurğulayan cənab Prezident həmin ərazilərdə torpaq və suyun kəskin dərəcədə zəhərlənməsinə, radiasiya fonunun yüksəlməsinə görə bu ölkələrin məsuliyyət daşıdıqlarını birmənlı şəkildə diqqətə çatdırdı. Bundan başqa cənab Prezident İlham Əliyev Fransanın dırnaqarası dəniz ərazilərində törətdiyi cinayətlər, insan hüquqlarının kütləvi surətdə və kobud şəkildə pozulması hallarını diqqət mərkəzinə çəkərək Avropa Parlamenti və Avropa Şurası Parlament Assambleyasının da günahsız insanların qətlinə görə Prezident Makronun hökuməti ilə məsuliyyəti bölüşdüyünü bəyan etdi.
- Eldar müəllim, hər zaman olduğu kimi, səmimi və ətraflı müsahibənizə görə Sizə həm oxucularımız adından, həm də bütün redaksiya heyətimiz adından səmimi minnətdarlığımızı bildirirəm. Sağ olun, sağlıqla qalın.
- Mən də sizə dolğun və məzmunlu suallarınıza görə təşəkkür edirəm. Sağ olun.
Söhbətləşdi: Azər Məmmədov
aia.az
23 noyabr tarixində Azərbaycan Dəmiryol Muzeyində BMT-nin İqlim Dəyişmələri üzrə Çərçivə Konvensiyasının Tərəflər Konfransının 29-cu sessiyası (COP29) günlərində fəaliyyət göstərmiş COP29 və ADY könüllüləri ilə görüş keçirilib.
Yol-xeber.az" xəbər verir ki, ADY rəhbərliyinin iştirak etdiyi görüşdə ölkəmizin dünya əhəmiyyətli daha bir tədbirə uğurla ev sahibliyi etdiyi və bu prosesdə könüllülərin böyük əməyi olduğu diqqətə çatdırılıb.
Könüllülərin planetimizin gələcəyi naminə qlobal dialoqu dəstəkləmək məqsədilə fədakarcasına çalışaraq hər kəsi ruhlandırdığı, COP29-u hər kəs üçün əlçatan etdiyi vurğulanıb.
Qeyd olunub ki, COP29 və ADY könüllüləri 11-23 noyabr tarixlərində Abşeron dairəvi marşrutu üzrə stansiya və dayanacaqlarda akkreditasiyalı şəxslərin rahat keçidinə kömək etməklə, onları qatarların hərəkət cədvəli ilə tanış etmək və istiqamətləndirməklə tədbirin uğurla keçməsinə töhfə veriblər.
Bildirilib ki, COP29 günlərində qatarlarla ümumilikdə 10 mindən çox akkreditasiyalı sərnişin daşınıb. “Koroğlu” sərnişinlərin ən çox istifadə etdiyi dayanacaq olub. Tədbirin keçirildiyi Azərbaycan Dəmiryol Muzeyi də bu dövrdə fəaliyyətini gücləndirib. COP29 tədbirlərində iştirak etmək üçün Bakıya gələn Çin, Almaniya, İsveçrə, Böyük Britaniya, Braziliya, İrlandiya kimi ölkələrin vətəndaşları muzeyi ziyarət ediblər.
Sonda ADY adından könüllülərə xatirə hədiyyələri və təşəkkürnamə təqdim edilib.
Bu günlərdə Azərbaycan bütün dünyanın diqqət mərkəzində idi. Daha doğrusu, cənab Prezident İlham Əliyevin sözləri ilə desək, bütün dünya Azərbaycanda idi. Noyabr ayında Azərbaycan 2023-cü ilin sonlarında 200 ölkənin həmrəy qərarı ilə əldə etdiyi BMT-nin İqlim Dəyişikliyi üzrə Çərçivə Konvensiyasının Tərəflər Konfransının 29-cu sessiyasına (COP29) ev sahibliyi etmək hüququnu reallaşdırdı. Əlbəttə ki, son illər ölkəmizdə keçirilən mühüm beynəlxalq tədbirlərin həm miqyasının, həm də əhəmiyyətlilik dərəcəsinin getdikcə artması Azərbaycanın dünya birliyində durmadan yüksələn nüfuzunun daha bir göstəricisi kimi qiymətləndirilməlidir. O cümlədən noyabrın 12-də Bakıda öz işinə başlamış COP29-un da ən yüksək səviyyədə təşkili əlbəttə ki, dünya ictimaiyyətinin diqqətindən kənarda qalmayacaq.Azərbaycan üçün isə COP29 iqlim dəyişikliyinin yaratdığı fəsadlarla mübarizədə ön sıralarda olduğunu göstərmək imkanı olmaqla yanaşı, eyni zamanda da qlobal səhnədə cərəyan edən proseslərə getdikcə artan iqtisadi və siyasi təsirini nümayiş etdirmək üçün unikal fürsət oldu.
Bugünkü buraxılışımızda Azərbaycanın ev sahibliyi etdiyi COP29-ungedişi və əldə olunan nəticələr, eləcə də ölkə ictimaiyyətini maraqlandıran bir sıra digər mövzular barədə aia.az-ın suallarını Milli Məclisin deputatı, Azərbaycan Ağsaqqallar Şurasının sədri, iqtisad elmləri doktoru, professor Eldar Quliyev cavablandırır.
- Xoş gördük Sizi, Eldar müəllim. Yenidən Sizinlə görüşmək bizə çox xoşdur və ilk sualımız əlbəttə ki, noyabrın 12-dən 22-nə qədər Bakıda keçirilmiş ÇOP29-la bağlı olacaq. Əminəm ki, Sizin COP29-un bilavasitə iştirakçısı kimi fikirləriniz, müşahidə etdiyiniz xüsusi məqamlar və gəldiyiniz nəticələr oxucularımız üçün son dərəcə maraqlı olacaq. Bu tədbirin dünya miqyasında ən önəmli və ən böyük beynəlxalq tədbirlərdən biri olduğu bu gün heç kimdə şübhə doğurmur. Məhz bu baxımdan COP29-a ev sahibliyi etmək Azərbaycana nə qazandırır?
- Mən də sizi ürəkdən salamlayıram və yenidən görüşməyimizdən məmnun olduğumu bildirmək istəyirəm. İlk növbədə deməliyəm ki, BMT-nin İqlim Dəyişikliyi üzrə Çərçivə Konvensiyasının Tərəflər Konfransının sessiyaları, hansılar ki, bütün dünyada COP kimi tanınır, həqiqətən də planetimizin ən böyük və ən mötəbər tədbirləri sırasında durur. Çox şadam ki, Bakıda keçirilən COP29-da ölkəmizi təmsil etmək üçün Milli Məclisin sədri və sədr müavinləri, Parlament komitələrinin sədrləri və sədr müavinləri ilə yanaşı mən də iştirak edirdim. Bu gün Azərbaycan möhtərəm Prezidentimiz cənab İlham Əliyevin rəhbərliyi ilə həyata keçirilən unikal xarici siyasət və incə diplomatiya sayəsində artıq sadəcə regional gücdən qlobal oyunçuya çevrilməkdədir. COP29 eyni zamanda məhz bu transformasiyanı da həm təsdiq edən, həm də bütün dünyaya nümayiş etdirən bir tədbir oldu. Əlbəttə ki, keçən ilin dekabr ayında Azərbaycan bu mötəbər tədbirə ev sahibliyi etmək hüququnu qazanmaqla, özünün növbəti böyük uğuruna imza atdı. Məhz buna görə cənab Prezident İlham Əliyev Konfransın Liderlər Sammitinin açılış mərasimindəki çıxışında bu məqamı xüsusi vurğulayaraq bildirdi ki, Azərbaycanın bu tədbirə 200 ölkənin yekdil qərarı ilə ev sahibliyi etməsi ölkəmizin qlobal proseslərdə fəal rolunun beynəlxalq arenada yüksək qiymətləndirilməsi deməkdir. COP29-a ev sahibliyi hüququnu ölkəmizə verməklə beynəlxalq ictimaiyyət, diqqət edin, qlobal miqyasda beynəlxalq ictimaiyyət Azərbaycana növbəti dəfə böyük etimad göstərilmiş oldu və bu da birmənalıdır ki, ölkəmiz bu hörməti və nüfuzu ilk növbədə məhz cənab Prezident İlham Əliyevin gördüyü mühüm işlər, həyata keçirdiyi son dərəcə uğurlu müstəqil xarici siyasət sayəsində qazanmışdır.
- Eldar müəllim, Azərbaycanın hər zaman öz üzərinə götürdüyü öhdəliklərə böyük məsuliyyətlə yanaşmasını bu gün bizimlə əməkdaşlıq edən bütün dünya ölkələri təsdiq edirlər. Bu baxımdan ölkəmizin COP29-a ev sahibliyi etməklə İqlim Dəyişikliyi üzrə Çərçivə Konvensiyasının ümumi fəaliyyətinə necə yeniliklər gətirə biləcəyini, hansı töhfələri verəcəyini düşünürsüz?
- Tamamilə doğru qeyd etdiniz ki, Azərbaycan istənilən platformada hər zaman öz öhdəliklərinin icrasına böyük məsuliyyətlə yanaşan bir ölkədir. Cənab Prezident İlham Əliyevin “bizim sözümüz imzamızdır” ifadəsi də bu tendensiyanı bir daha təsdiqləyir. COP 29-da sədrlik edən bir ölkə kimi Azərbaycan ilk növbədə beynəlxalq iqlim danışıqlarının gələcəyi ilə bağlı mövqeyini ortaya qoyur. Əlbəttə ki, bu mövqe ölkəmizin getdikcə artan iqtisadi gücü və siyasi nüfuzu vasitəsilə möhkəmləndirilir. Az öncə də qeyd etdiyim ki, Bakıda COP 29-un keçirilməsi artıq ölkəmizin beynəlxalq iqtisadi və siyasi arenalarda artan təsir imkanlarının əyani göstəricilərindən biridir. Bu isə eyni zamanda beynəlxalq ictimaiyyətin Azərbaycandan böyük gözləntiləri olduğunu da deməyə əsas verir. Bu gözləntilərin xüsusilə inkişaf etməkdə olan ölkələr üçün nə qədər vacib olduğunu iştirakçıların əhatəsində olduqca aydın müşahidə etmək olurdu. Əlbəttə ki, Azərbaycanın coğrafi mövqeyi, Asiya ilə Avropanın qovşağında yerləşməsi ölkəmizə böyük üstünlüklər verir. Lakin cənab Prezident İlham Əliyevin COP29-un Liderlər Sammitinin açılış mərasimindəki çıxışında qeyd olunduğu kimi, Azərbaycan təkcə coğrafi baxımdan deyil, eyni zamanda həm də mənəvi-mədəni baxımdan fərqli sivilizasiyaları bir araya gətirən məkandır. Buna bir tərəfdən Azərbaycan xalqının hələ qədim vaxtlardan mədəniyyətinin bir parçası olmuş tolerantlıq prinsipləri, digər tərəfdən də multikulturalizmin Azərbaycanda dövlət siyasətinin prioritetlərindən biri olması güclü zəmin yaradıb. Məhz bütün bu göstəricilərin toplumu da Azərbaycana COP29-un iştirakçıları arasında siyasi, mədəni, enerji, ticari və nəqliyyat körpülərini sala bilmək imkanı verir. Əminəm ki, COP29 Tərəflər Konfransının indiyədək keçirilmiş bütün Sessiyalarından daha mühüm nəticələrlə tarixə düşəcək.
- Biz əlbəttə ki, İqlim Dəyişikliyi ilə bağlı mövzuya yenidən dönəcəyik. Lakin indi mən istərdim ki, COP29 ərəfəsindəbaş vermiş müəyyən hadisələrə müraciət edək və bu proseslərin qarşılıqlı bağlantılarını təhlil etməyə çalışaq. Bu baxımdan düşünürəm ki, cənab Prezident İlham Əliyevin bu ilin oktyabr-noyabr aylarında iştirak etdiyi MDB, BRİCS və TDT sammitlərində müzakirə olunan mövzular da xüsusi maraq kəsb edir...
- Bu zaman yəqin ki, xronoloji ardıcıllığa uyğun olaraq ilk öncə möhtərəm Prezidentimizin cari ilin 8 oktyabr tarixində Moskvada keçirilmiş Müstəqil Dövlətlər Birliyi Dövlət Başçıları Şurasının iclasında iştirakı barədə danışmaq daha məqsədəuyğun olar. Məlumdur ki, Azərbaycanın istər Qoşulmama Hərəkatında, istər Türk Dövlətləri Təşkilatında, istərsə də İslam Əməkdaşlıq Təşkilatında fəaliyyətini müşahidə edərkən biz aydın şəkildə görürük ki, ölkəmiz bu qurumlara üzv dövlətlərin böyük əksəriyyətilə əlaqələrini həm ikitərəfli formatda, həm də çoxtərəfli formatda uğurla inkişaf etdirir. Əlbəttə ki, bu baxımdan Müstəqil Dövlətlər Birliyi də istisna deyil. İlk növbədə Azərbaycanın bu quruma üzv olan digər dövlətlərlə münasibətlərinin formalaşmasına belə bir amil təsir göstərir ki, bu ölkələrin hamısı 70 il ərzində SSRİ tərkibində müttəfiq respublikalar kimi mövcud olublar. Digər tərəfdən də MDB üzvləri arasında Azərbaycanla digər beynəlxalq təsisatlarda birgə üzvlüyü olan ölkələr də çoxluq təşkil edir. Bütün bunlar əlbəttə ki, xüsusi münasibətlərin formalaşmasına zəmin yaradıb.
-Eldar müəllim, amma bunu da etiraf edək ki, MDB-yə üzv ölkələr arasında Azərbaycanın məhz Rusiya ilə münasibətləri hər zaman daha çox beynəlxalq ictimaiyyətin diqqət mərkəzində olur. Bu barədə nə deyə bilərsiz?
- Bu təbii haldır. Düzgün xarici siyasət strategiyası olan hər bir ölkə kimi, Azərbaycan üçün də qonşu dövlətlərə münasibətlərin inkişafı olduqca vacib amildir. Çünki öz sərhədlərində təhlükəsiz, mehriban münasibətlər yarada bilən ölkələr beynəlxalq aləmdə mövqelərini daha yaxşı qoruya bilirlər. Bu baxımdan Azərbaycanın BMT Təhlükəsizlik Şurasının üzvü kimi dünyanın ən güclü ölkələrindən olan Rusiya ilə humanitar, mədəni sektordan tutmuş siyasi-hərbi sahəyə qədər çoxşaxəli əməkdaşlıq əlaqələri əldə olunmuş yüksək nəticə kimi qiymətləndirilməlidir. Eyni zamanda da Rusiya ilə imzalanmış müttəfiqlik fəaliyyəti haqqında Bəyannamə xüsusilə Vətən müharibəsindən sonra bölgədə yaranmış reallıqlar baxımından Azərbaycan üçün çox əhəmiyyətlidir. Həm Türkiyə, həm də Rusiya ilə müttəfiqlik bəyannaməsi imzalayan Azərbaycan bununla bölgədəki yeni konfiqurasiyanı möhkəmləndirmiş oldu. Bu, cənab Prezident İlham Əliyevin daha bir möhtəşəm diplomatik gedişi idi.
- Yeri gəlmişkən, dövlət başçımızın sözügedən Moskva səfəri çərçivəsində “Rossiya-1” televiziya kanalına verdiyi müsahibəsində verdiyi bəzi açıqlamalar, xüsusilə də ABŞ və Fransa hökumətlərinin yürütdükləri ikili standartlar siyasətinə qarşı səsləndirdiyi fikirlər də böyük maraq doğurmuş oldu...
- Əslində bu fikirləri cənab Prezident İlham Əliyev əvvəlki çıxışlarında da bir neçə dəfə beynəlxalq ictimaiyyətin diqqətinə birmənalı şəkildə çatdırıb. Bu fikirlərin mahiyyətində isə belə bir fakt durur ki, bu gün bəzi Qərb dövlətləri, ilk növbədə də ABŞ və Fransa Azərbaycanın müstəqil xarici siyasət yürütməsini, öz ərazi bütövlüyünü və tam suverenliyini heç kimdən soruşmadan, heç kimdən qorxmadan və heç kimi saymadan, öz gücünə bərpa etməsini heç cür həzm edə bilmirlər. Buna görə ölkəmizə qarşı tamamilə haqsız olaraq hansısa sanksiyalar tətbiq edilir. Dövlət başçımız tamamilə doğru olaraq vurğuladı ki, həmin sanksiyalarla bağlı ABŞ hökumətinin ikiüzlülüyünü, riyakarlığını açıq-aşkar ifşa edə məqamlardan biri də Azərbaycan-NATO tərəfdaşlıq münasibətləri çərçivəsində gedən proseslərdə özünün aşkar təsdiqini tapıb. Məlum olduğu kimi, Azərbaycan-NATO tərəfdaşlığının 30 ildən artıq davam edən uzun tarixi var və bu tərəfdaşlıq hər zaman müsbət qiymətləndirilib. O cümlədən Azərbaycan Kosovoda və Əfqanıstanda sülhməramlı əməliyyatlarda yüksək effektivliklə iştirak edib. 2021-ci ilin axırında Əfqanıstanı tərk edən sonuncu müttəfiq qüvvələr də məhz Azərbaycan hərbçiləri olublar. O zaman bizim hərbçilərimiz hava limanının mühafizəsinə görə cavabdeh idilər və bu, NATO qüvvələrinin Əfqanıstandan təxliyəsində əsas məsələ idi. Lakin bu gün ölkəmizin bu xidmətləri ermənipərəst qüvvələrin təzyiqi nəticəsində unudulur. Məhz bütün bunlara cənab Prezident İlham Əliyev “Rossiya-1” televiziya kanalına verdiyi müsahibəsində hər zaman olduğu kimi, növbəti dəfə prinsipial möveyini nümayiş etdirərək birmənalı münasibətini açıq mətnlə ifadə etmişdir.
Söhbətləşdi: Azər Məmmədov
aia.az
(ardı var...)
Sosial şəbəkələrdə parkinqlə bağlı aparılan müzakirə maraq doğurub.
Sosial şəbəkə istifadəçiləri “azparkinq” ərazisində avtomobili saxladıqdan sonra nömrəni çıxararsa, onu hər hansı cərimənin gözləyib-gözləmədiyini sual edib:
“Avtomobili “azparking” ərazisində saxlayıb nömrəsini çıxarsaq, iş bitəndə nömrəni yenidən üzərinə qoyub hərəkətə davam etsək, sırf nömrəsiz park ərazisində saxlamağa görə hər hansısa məsuliyyət daşıyırıq?” - o yazıb.
Suala sosial şəbəkə istifadəçiləri fərqli cavablar veriblər.
Qeyd edilib ki, qanunda nömrəsiz dayanmağa görə cərimə yoxdur, amma nömrənin üzərinin bağlanmasının cəriməsi var.
Emil İsayev adlı sosial şəbəkə istifadəçisi bu üsulu bir neçə dəfə yoxladığını, heç bir problemlə rastlaşmadığını söyləyib. Bununla belə, o, qeyd edib ki, bu yola əl atmağı məsləhət görmür.
Həmçinin digər sosial şəbəkə istifadəçiləri bildirib ki, “Yol Hərəkəti Haqqında” Qanuna əsasən, dövlət qeydiyyat nişanları və ya onlardan birinin olmamasına, saxta və ya mövcud standartlara uyğun olmayan və ya başqa nəqliyyat vasitələrinə verilmiş dövlət qeydiyyat nişanları ilə nəqliyyat vasitələrini idarə etməyə görə cərimənin məbləği 100 manatdır.
Əksər sosial şəbəkə istifadəçiləri bu məsələnin qanundakı boşluqdan irəli gəldiyini yazıb.
Qeyd olunub ki, avtomobilin nömrəsiz olmasına görə, qanunvericilikdə yalnız hərəkət halında olarsa, cərimələnəcəyi qeyd edilib. Yəni avtomobil park vəziyyətində olarkən dövlət qeydiyyat nişanının olmamasına görə hər hansı bir cərimə nəzərdə tutulmayıb.
Sürücülərin dediyinə görə, heç bir cəriməsi olmasa da, müşahidə kamerasının görüntülərinə əsasən, avtomobilin nömrəsini açıb götürən şəxslər cərimələnə bilər.
Bəzi sürücülər bildirib ki, dövlət qeydiyyat nişanı olmadan sürmək və ya nişanın oxunmasına maneə törədənlər 500-800 AZN cərimələnir.
Sosial şəbəkə istifadəçilərindən biri isə qeyd edib ki, bənzər üsula əl atan sürücüyə 800 manat cərimə yazılıb.
Hərəkət sxemləri dəyişdirilən və müvəqqəti ləğv edilən marşrutların fəaliyyəti mərhələli qaydada bərpa olunub.
Bu gündən Azərbaycan Yerüstü Nəqliyyat Agentliyi (AYNA) daha 46 sayda avtobus marşrutunun fəaliyyətini bərpa edir.
Bununla da müntəzəm avtobus marşrutları vətəndaşlara tədbirdən öncəki qrafik və sxemlə xidmət göstərəcək.
Hərəkət sxemləri bərpa ediləcək marşrutlar:
1, 7B, 13, 15, 31, 37, 38, 40, 54, 55, 60, 62, 70, 71, 93, 96, 105, 107, 118A, 118B, 131, 139, 141, 148, 162, 163, 166, 168, 169, 172, 173A, 173B, 184, 185, 189, 197, 198, 204, 205, 214, 216, 217, 120E, M8, 140E və E1 nömrəli avtobuslar.
Bu gündən bayram günləri və şənbə-bazar günləri nəzərə alınmaqla payız tətilindən sonra ümumi təhsil müəssisələrində ilk dərs günü başlayıb.
Altıgünlük iş həftəsi ilə işləyən məktəblərdə dərslər noyabrın 23-dən, beşgünlük iş həftəsi ilə işləyən məktəblərdə tədris isə noyabrın 25-dən başlayıb.
Xatırladaq ki, Nazirlər Kabinetinin COP29-un keçiriləcəyi dövrdə ölkə ərazisində təhsil müəssisələrinin fəaliyyətinin təşkilinə dair qərarına əsasən ümumi təhsil müəssisələrində payız tətili noyabrın 12-dən 22-dək olub.
Məlumat üçün bildirək ki, Nazirlər Kabinetinin qərarı ilə Azərbaycanda fəaliyyət göstərən orta məktəblərdə (xüsusi təhsil müəssisələri istisna olmaqla) payız tətilinin vaxtı dəyişib. Sözügedən qərarla ümumi təhsil pilləsi üzrə 2024-cü il noyabrın 12-dən 22-dək payız tətili olub. Orta məktəblərdə tətil ümumilikdə 8 noyabrda başlayıb və tam 17 gün - 25 noyabra qədər davam edəcək.
Azərbaycanda noyabrın 24-də hava şəraitinin hava şəraitinin dəyişkən buludlu olacağı, əsasən yağmursuz keçəcəyi gözlənilir.
Milli Hidrometrologiya Xidmətindən bildirilib ki, sabah Bakıda və Abşeron yarımadasında hava şəraitinin dəyişkən buludlu olacağı, arabir tutulacağı, əsasən yağmursuz keçəcəyi gözlənilir.
Lakin gecə və səhər bəzi yerlərdə duman, çiskin olacağı, gündüz isə qısamüddətli yağış yağacağı ehtimalı var. Mülayim cənub-şərq küləyi axşam şimal-qərb küləyi İlə əvəz olunacaq. Havanın temperaturu gecə 10-13° isti, gündüz 14-17° isti olacaq. Atmosfer təzyiqi 769 mm civə sütunu olacaq. Nisbi rütubət 70-80 % olacaq.
Azərbaycanın rayonlarında hava şəraiti əsasən yağmursuz olacaq. Gecə və səhər bəzi şərq rayonlarında çiskin. Arabir duman. Qərb küləyi gündüz bəzi yerlərdə arabir güclənəcək.
Havanın temperaturu gecə 5-10° isti, gündüz 13-18° isti, dağlarda gecə 0-4° isti, gündüz 4-8° isti olacaq.
Bakıda keçirilən BMT-nin İqlim Dəyişikliyi üzrə Çərçivə Konvensiyasının Tərəfləri Konfransının 29-cu sessiyasının (COP29) iştirakçıları üçün nəzərdə tutulan pulsuz ictimai nəqliyyat xidmətinin sonuncu günü açıqlanıb.
Noyabrın 25-dən etibarən konfrans iştirakçıları artıq avtobus, metro və dəmir yolundan ödənişsiz istifadə edə bilməyəcəklər.
Xatırladaq ki, dünyanın müxtəlif ölkələrindən Azərbaycana gələn və COP29 tədbirinə akkreditasiya olunan hər kəs noyabrın 9-dan etibarən paytaxtın ictimai nəqliyyat vasitələrindən pulsuz yararlanmaq imkanı əldə etmişdi.
Bu güzəşt proqramı tədbir iştirakçılarının şəhərdaxili logistikasını asanlaşdırmaq məqsədi daşıyırdı.