 |
|
2024-cü ilin üçüncü rübünün sonunda Rusiyada kadr çatışmazlığı daha bir rekorda çatıb - bir işsiz adama beş vakansiya düşür.
ng.ru saytı xəbər verir ki, işçi qüvvəsi çatışmazlığının rublun devalvasiyası və anti-immiqrant reydləri səbəbindən Rusiya Federasiyasından miqrantların öz vətənlərinə qayıtmasına görə daha da pisləşəcəyi ehtimal edilir.
2024-cü ilin oktyabrında Nijni Novqorod vilayətindən 500-dən çox qeyri-qanuni miqrant çıxarılıb. Üç yeni vətəndaş hərbi komissarlığa aparılaraq hərbi qeydiyyata alınıb, bir nəfər isə dərhal müharibəyə aparılıb. Amur vilayətində Mərkəzi Asiyadan olan 9 miqrantın ölkədən çıxarılması barədə qərar qəbul edilib.
Leninqrad vilayətində və Sankt-Peterburqda son reydlər nəticəsində 40 nəfər hərbi qeydiyyata alınıb, 21 mindən çox miqrantı leqallaşdıran qeyri-qanuni miqrasiyanın təşkilatçısı saxlanılıb. Nijni Novqorod, Amur və Leninqrad vilayətləri işçi qüvvəsi çatışmazlığının rəsmi göstəricilərinə görə liderdir. Müstəqil iqtisadçıların hesablamalarına görə, bu üç sahədə hər bir potensial işaxtaran üçün 22-dən 28-ə qədər elan edilmiş vakant yer var.
2024-cü ilin üçüncü rübünün sonunda Rusiyanın əksər federal subyektlərində işçi çatışmazlığı var. Yalnız dörd regionda rəsmi işsiz vətəndaşların sayı çoxdur. Bunlar İnquşetiya, Çeçenistan, Tıva və Dağıstandır.
Bütövlükdə Rusiya müəssisələrində 2 milyona yaxın işçiyə ehtiyac var. 392 min adam iş axtarmaq üçün məşğulluq xidmətlərinə müraciət edib, onların hamısı təklif olunan işlərə qane olub, işləməyə başlasalar, bu, müəssisələrin kadr çatışmazlığını cəmi 20% aradan qaldıracaq.
Bununla belə, elə dünən Dövlət Dumasına təqdim olunan anti-miqrant layihəsində əmək mühacirlərinin hüquqlarının sıfıra endirilməsi, başqa sözlə, onların köləyə çevrilməsini nəzərdə tutan müddəalar var. Bu qanunun qəbulundan sınra Rusiyadan miqrant axını daha da güclənəcək və Rusiyanın əmək bazarında işçiyə olan ehtiyac daha da artacaq.
İsrail ordusu Livanın cənub bölgəsindəki bəzi yaşayış məntəqələrinə girişin qadağan edildiyini göstərən xəritə yayımlayıb.
Atəşkəs barədə danışılsa da, gərginlik hələ də davam edir.
İsrail ordusunun nümayəndəsi Aviçay Adrai verdiyi açıqlamada bildirib ki, bu ərazilərdə yaşayan sakinlərə hələlik evlərinə qayıtmaq qadağan edilib. "Bu bölgədən cənuba keçən hər kəs öz həyatını təhlükəyə atmış olur," – deyə Adrai vurğulayıb.
ABŞ Prezidenti Cozef Baydenin administrasiyası Ukrayna üçün növbəti hərbi yardım paketini təsdiqləməyə hazırlaşır.
Reuters xəbər verir ki, yardım paketinin dəyəri 725 milyon dollar təşkil edəcək.
Paket çərçivəsində Ukraynaya müxtəlif növ hərbi texnika və sursatların, o cümlədən minalar, pilotsuz uçuş aparatları, Stinger zenit-raket kompleksləri və HIMARS reaktiv yaylım atəşi sistemləri üçün döyüş sursatlarının tədarükü planlaşdırılır.
Yeni yardım paketi Ukraynanın müdafiə qabiliyyətini artırmağa və ölkənin cəbhə bölgəsindəki mövqelərini gücləndirməyə yönəlib. ABŞ bu addımı ilə Ukraynanın suverenliyini və ərazi bütövlüyünü dəstəklədiyini bir daha nümayiş etdirir.
Xatırladaq ki, ABŞ Ukraynaya müharibənin əvvəlindən bəri milyardlarla dollar dəyərində hərbi yardım göstərib. Yeni paket isə ABŞ-ın Ukraynaya dəstək siyasətinin davamlı olduğuna işarə edir.
“İsrail Beynəlxalq Cinayət Məhkəməsinin üzvü olmadığı üçün ölkənin Baş naziri Benyamin Netanyahu toxunulmazlığa malikdir. Buna görə də həbs qərarına baxmayaraq, Fransa İsrail hökumətinin başçısını saxlamayacaq”.
“Qafqazinfo” xəbər verir ki, bunu Fransanın xarici işlər naziri Jan-Noel Barro deyib.
Barro vurğulayıb ki, bu qərar həm də İsrailin keçmiş müdafiə naziri Yoav Qalanta aiddir.
"Yaxın Şərqdəki müharibəni yalnız bir tərəf uddu - böyük güclər".
Bunu Qaynarinfo-ya açıqlamasında konfliktoloq Azər Hüseynov İsraillə "Hizbullah” arasında son razılaşmalar fonunda başa çatmaqda olan müharibədə hansı tərəfin üstünlük əldə etdiyi barədə suala cavabında deyib.
"Hizbullah"ın İsraillə son müharibəsi əslində bir məsələni ortaya qoydu. Assimetrik müharibə apara bilən güclər nizami orduları çıxılmaz vəziyyətə qoya bilirlər. İsrail hərbi məqsədlərini reallaşdıra bilmədi. "Hizbullah" İsrail qüvvələrinin hərbi məqsədlərinə nail olmasına maneə törədə bildi. Bu da öz növbəsində İsrailin Qəzzadakı hərbi məqsədləri qarşısında maneələr yaratdı. Beynəlxaq Cinayət Məhkəməsinin Benyamin Natanyahuya qarşı qərarı da İsrailin imicini zədələdi. Qəzzada bir humanitar fəlakət yaşandı", deyə Azər Hüseynov bildirib.
Müharibə nəticəsində hansı tərəfin gücləndiyinə gəlincə, həmsöhbətimizə görə, əslində bütün tərəflər müəyyən qədər tükəndilər:
"İsrail cəmiyyəti daxilində siyasi narazılıqlar başlandı. Müdafiə naziri Qallant istefa verdi. Digər tərəfdən, Livan və Qəzzada mülki insanlar zərər gördü, günahsız uşaqlar dünyasını dəyişdi. Əslində bu müharibə bölgəni tükəndirdi".
Azər Hüseynovun fikrincə, müharibədə udan tərəf yalnız böyük güclər oldu:
"Savaşı ABŞ qazandı. Çünki Yaxın Şərqdə proseslərə müdaxilə edə bilməsi üçün yenə əlində əsas yarandı. Bölgədə gedən müharibə proseslərdə oyunçuları artıra bilər. Bura Türkiyə, Rusiya da aiddir. İran onsuz da bölgədədir".
Qeyd edək ki, İsrail və "Hizbullah” ABŞ və Fransanın təklifilə 60 günlük atəşkəsə razılıq verib. Ona əsasən 2 ay ərzində İsrail Livanın cənubundakı ərazilərdən öz qoşunlarını çıxaracaq. Həmin ərazilərə nəzarət isə Livan hökumətinin rəsmi hərbi qüvvələrinə həvalə ediləcək. "Hizbullah” isə bu əraziləri tərk etməli olacaq.
Rusiyada Qurani-Kərimi təhqir edən şəxsə rekord cəza verilib.
Rusiya KİV xəbər verir ki, Rusiya məhkəməsi ötən il Qurani-Kərimi yandıran Nikita Juraveli "dövlətə xəyanət" ittihamı ilə 14 il müddətinə azadlıqdan məhrum edib.
Məhkəmə bəyan edib ki, müttəhim Ukrayna Təhlükəsizlik Xidmətinin göstərişi ilə Qurani-Kərimi yandırıb və bununla da Rusiyanın təhlükəsizliyini təhdid edib.
Volqoqrad Vilayət Məhkəməsinin mətbuat xidmətinin yaydığı bəyanatda Juravelin Rusiya ordusunun Ukraynadakı hərəkətlərinə qarşı çıxdığı da bildirilib.
Məlumatda həmçinin Juravelin barəsindəki ittihamları qəbul etdiyi də yer alıb.
Qeyd edək ki, Nikita Juravel 2023-cü ilin mayında Rusiyanın Volqoqrad şəhərində məscidin qarşısında Qurani-Kərimi yandırdığı üçün saxlanılaraq Çeçenistana göndərilib.
Rusiya Federasiyasının tərkibində olan Çeçenistan Respublikasının məhkəməsi fevralın 27-də Juravel-i “mənəvi dəyərləri təhqir etmək və ictimai nizamı pozmaq” ittihamı ilə 3,5 il müddətinə azadlıqdan məhrum edib.
ABŞ prezidenti Cozef Bayden Konqresə Ukraynaya hərbi dəstək üçün 24 milyard dollar vəsait ayrılması təklifini təqdim edib.
"New York Post" qəzetinin "Politico Pro"ya istinadən verdiyi məlumata görə, bu məbləğ yaxın gələcəkdə Donald Trampın Ukraynaya qarşı edəcəyi dəstək kəsintisinin qarşısını almaq məqsədi daşıyır.
Baydenin təklifi 2 əsas istiqaməti əhatə edir:
• 8 milyard dollar Ukraynaya Təhlükəsizlik Dəstəyi Təşəbbüsünə ayrılacaq. Bu vəsait ABŞ şirkətləri ilə bağlanacaq müqavilələr vasitəsilə Kiyevə silah təchizatını maliyyələşdirəcək.
• 16 milyard dollar ABŞ-ın öz silah ehtiyatlarının bərpasına sərf ediləcək. Bu, Ukraynaya göndərilən hərbi yardımlardan sonra ABŞ-ın öz ehtiyatlarını gücləndirmək məqsədilə planlaşdırılır.
Mənbələr bildirir ki, Bayden administrasiyası bu təklifi 2024-cü ildə ABŞ-da prezident seçkilərinin nəticələrinə görə dəyişə biləcək siyasətə qarşı təminat kimi irəli sürüb. Bayden Konqresin dəstəyini qazanaraq Ukrayna siyasətinin sabit qalmasını və ABŞ-ın müttəfiqləri qarşısında öhdəliklərini qorumağı hədəfləyir.
Təklifin Konqresdə ciddi müzakirələrə səbəb olacağı gözlənilir. Xüsusilə də Respublikaçılar Partiyasının bəzi üzvlərinin Ukraynaya ayrılan yardımları tənqid etdiyi nəzərə alınarsa, bu, siyasi mübahisələrin daha da alovlanmasına səbəb ola bilər.
ABŞ-ın Ukraynaya hərbi dəstəyi Qərb dünyasının Rusiyaya qarşı strategiyasının əsas tərkib hissəsi olaraq qalır. Lakin bu təklifin qəbul olunub-olunmayacağı yaxın günlərdə Konqresdəki debatlardan sonra məlum olacaq.
Yeddilik Qrupu (G7) ölkələri Rusiyaya qarşı əlavə məhdudlaşdırıcı tədbirlər tətbiq etməyi planlaşdırır.
Bu barədə ABŞ dövlət katibi Entoni Blinken mətbuat konfransında bildirib.
“Ötən həftə ABŞ Rusiyanın maliyyə sektoruna, o cümlədən “Qazprombank”a qarşı sanksiyalar tətbiq edib. Düşünürəm ki, biz G7 ölkələrindən də əlavə addımlar gözləyə bilərik”, - deyə o qeyd edib.
Onun sözlərinə görə, G7 ölkələri Rusiyanın dondurulmuş aktivlərindən gələcək gəlirlərdən istifadə etməklə Ukraynaya 50 milyard dollarlıq kreditin köçürülməsi üçün hazırlığı yekunlaşdırır.
Yelisey Sarayı sentyabrda Baş nazir təyin edilmiş Mişel Barnyenin hökumətinin mümkün istefasına hazırlaşır.
“Bu barədə “Le Parisien” qəzeti mənbəyinə istinadən məlumat yayıb.
Məlumata görə, Fransa prezident administrasiyası Nazirlər Kabinetinə etimadsızlıq votumunu qaçılmaz hesab edir. Məsləkdaşlarının əhatəsində Makron ehtimal edib ki, yaxın günlərdə 2025-ci ilin dövlət büdcəsi layihəsinə səsvermə ilə əlaqədar hökumətə etimadsızlıq votumu elan oluna bilər.
“Prezident Barnye kabinetinin süqutunu gözləyir”, – nəşr mənbədən sitat gətirib.
Qəzet yazır ki, hazırkı Baş nazir və onun kabineti istefaya getsə, Fransa yenidən uzun müddət hökumətsiz qala bilər.
“Prezident düşərgəsində heç kim bu hadisənin təkrarını yaşamaq istəməz”, - qəzet prezident dairəsində hökm sürən rəylərdən sitat gətirib.
Qeyd edək ki, bundan əvvəl “Milli Birlik” partiyasının parlament fraksiyasının rəhbəri Marin Le Pen büdcə layihəsini tənqid edib və qanun layihəsinə dəyişiklik edilməyəcəyi təqdirdə etimadsızlıq votumunu dəstəkləmək niyyəti barədə xəbərdarlıq edib.(Report)
ABŞ-ın yeni seçilmiş prezidenti Donald Trampın vəzifəyə başlaması ilə Ukraynaya yardımın sona çatacağı gözləntiləri Avropada narahatlıq yaradıb.
Fransanın “Le Monde” qəzeti İngiltərə və Fransanın bir sıra ölkələrlə koalisiya qüvvələri yaratmağı hədəflədiyini yazıb. Koalisiya üçün ən qaynar mövzu Ukraynaya quru qoşunlarının göndərilməsidir. Belə ki, İngiltərə və Fransa Rusiyaya qarşı döyüşən Ukraynaya hərbi hissələr göndərilməsini müzakirə edir.
Qəzetin Britaniya və Fransa hərbi mənbələrinə əsaslanaraq verdiyi xəbərə görə, Paris və London Ukraynada başçılıq edəcəkləri koalisiya qüvvələrinin yaradılması variantını da müzakirə ediblər. Bu addımlara səbəb ABŞ-ın keçmiş prezidenti Donald Trampın Ağ Evə qayıtmasıdır. Koalisiyaya Polşa və Baltikyanı ölkələrin də qoşulmaq istədiyi bildirilir.
Noyabrın 11-də Fransanın paytaxtı Parisə gedən İngiltərə baş naziri Keir Starmerin Fransa prezidenti Emmanuel Makronla Ukraynaya hərbi dəstək məsələsini müzakirə etdiyi də iddia edilib. Bu səfərdən sonra Fransanın xarici işlər naziri Jan-Noel Barrotun Londona səfəri baş tutub. Bildirilib ki, noyabrın 22-də İngiltərəyə gedən xarici işlər naziri iki ölkənin Ukraynaya qarşı atacağı addımları müzakirə edib. Lakin hələlik rəsmi bəyannamə dərc olunmayıb.
İki ölkə bu məsələləri müzakirə etsə də, digər Avropa ölkələrinin, xüsusən də Almaniyanın nə deyəcəyi maraq doğurur. Rusiyaya qarşı Ukraynanın yanında yer alacaq bu koalisiyanın liderinin kim olacağı da müzakirələr sırasındadır.