 |
|
Rusiya Dövlət Duması rus dilini bilməyən miqrant uşaqlarının məktəblərə qəbulunu qadağan edən qanun layihəsinin müzakirəsinə başlayıb.
Təklif olunan qanun layihəsinə əsasən, miqrant uşaqlarının ümumi təhsil müəssisələrinə qəbulundan əvvəl onların rus dili biliyi yoxlanılacaq.
Bu məqsədlə xüsusi dil imtahanlarının keçirilməsi planlaşdırılır.
Bundan əlavə, miqrant uşaqların valideynlərinin Rusiya Federasiyasında qanuni əsaslarla yaşayıb-yaşamadığı da araşdırılacaq.
Qeyd olunur ki, bu qanun layihəsi qəbul olunsa, təhsil hüququnun həyata keçirilməsində miqrant ailələri üçün ciddi maneələr yarana bilər. Rusiya hökuməti bu tədbirləri milli təhlükəsizliyi və mədəni inteqrasiyanı təmin etmək məqsədi ilə əsaslandırsa da, hüquq müdafiəçiləri və beynəlxalq təşkilatlar bu addımın insan hüquqlarına zidd ola biləcəyini bildirirlər.
Miqrant uşaqların rus dilini bilməməsi onların cəmiyyətə inteqrasiyasını çətinləşdirən əsas problemlərdən biri kimi təqdim olunur. Eyni zamanda, valideynlərin qanuni statusunun yoxlanılması, ailələrin daimi yaşama şəraitinə təsir edə və müəyyən sosial narazılıqlara səbəb ola bilər.
Layihə hələ ilkin müzakirə mərhələsində olsa da, bu mövzu artıq cəmiyyətdə geniş rezonans doğurub. Təklifin tərəfdarları hesab edir ki, bu, təhsil sisteminin yükünü azaldacaq və yerli uşaqlar üçün daha əlverişli şərait yaradacaq. Əleyhdarlar isə bu təşəbbüsün ayrı-seçkilik xarakteri daşıdığını, miqrant ailələr üçün əlavə çətinliklər yaradacağını iddia edirlər.
Elmi fantastikanın getdikcə reallığa çevrildiyi bir dünyada Çin tədqiqatçıları heyrətamiz bir inkişafı təqdim ediblər.
Qaynarinfo xəbər verir ki, onlar, kult "Ulduz müharibələri" seriyasındakı "Ölüm ulduzu” kimi, bir neçə güclü mikrodalğa şüasını bir məhvedici nöqtəyə cəmləşdirə bilən bir silah yaratdıqlarını iddia edirlər.
Yeni silah sistemi, mikrodalğalar yayan bir neçə nəqliyyat vasitəsindən ibarət mürəkkəb bir kompleksdir. Lazımi dəqiqlik və gücə nail olmaq üçün bir çox texniki problemləri həll etmək lazım olub. Alimlər şüa yayıcılarının son dərəcə dəqiq sinxronizasiyasını təmin etməli, xarici amillərin təsirini minimuma endirməli və güclü enerji mənbəyi yaratmalı olublar.
Lakin laboratoriya şəraitində əldə edilən təsirli nəticələrə baxmayaraq, belə bir silahın real döyüş şəraitində nə qədər effektiv olacağı sual altındadır. Atmosfer maneələri, təsir məsafəsi və digər amillər onun döyüş qabiliyyətini əhəmiyyətli dərəcədə azalda bilər. Bundan əlavə, belə dağıdıcı texnologiyaların yaradılması ilə bağlı etik məsələlər də ortaya çıxır.
Beləliklə, Çin alimlərinin inkişaf etdirdiyi bu texnologiya enerji silahları sahəsində əhəmiyyətli bir irəliləyiş olsa da, real "Ölüm ulduzu"nun yaradılmasına hələ çox var. Gələcək göstərəcək ki, bu ixtira praktik tətbiq tapacaq, yoxsa sadəcə maraqlı bir elmi eksperiment kimi qalacaq.
İlon Maskın hökumətdə yer alacağı açıqlandıqdan sonra sosial medianın müstəqilliyi yenidən gündəmə gəlib.
News24.az xəbər verir ki, sosial media platformalarının neytrallığı və dövlətlərlə əlaqələri xüsusilə İlon Maskın "X" platformasında etdiyi dəyişikliklərlə yenidən gündəm mövzusu olub.
Sosial media platformalarının neytrallığı və onların dövlətlə münasibətləri son illərin ən mübahisəli məsələlərindən birinə çevrilib. İstanbul Medipol Universiteti Humanitar və Sosial Elmlər Fakültəsinin müəllimi Faiq Tanrıkulu sosial medianın həm sosial transformasiyada hərəkətverici qüvvə, həm də xaosa katalizator ola biləcəyini vurğulayaraq, platformaların tərəfsizlik prinsiplərinə əməl etməkdə çətinlik çəkdiyini bildirib.
Eyni zamanda, o, sosial platformalara Trampın şəxsən nəzarət edəcəyini də iddia edib.
Böyük ehtimalla rəsmi Tiflis hazırda ciddi ehtiyac duyduğu Azərbaycanla strateji tərəfdaşlığın Türkiyənin tam dəstəyinə yol aça biləcəyini də nəzərə alır... Həm rəsmi Bakının, həm də Azərbaycanın hərbi müttəfiqi və NATO ölkəsi olan Türkiyənin ortaq dəstəyi indi Gürcüstan üçün taleyüklü xaraker daşıya bilər...
"Yeni Müsavat" xəbər verir ki, Cənubi Qafqaz uğrunda mübarizə artıq amansız xarakter almağa başlayıb. Belə ki, dünya nəhəngləri bu regiondakı ölkələrə nəzarət etmək üçün malik olduqları bütün təsir mexanizmlərini işə salmağa çalışırlar. Dünya nəhəngləri arasındakı geopolitik qarşıdurmanın zaman keçdikcə daha da kəskinləşməsi Cənubi Qafqazın artmaqda olan strateji əhəmiyyətinin real əlaməti də sayıla bilər. Və bu baxımdan, Cənubi Qafqazın dünya nəhəngləri arasında “nifaq alması”na çevrilməsi qətiyyən təəccüblü deyil.
Onu da qeyd etmək lazımdır ki, ABŞ və Qərbin Rusiya ilə başlatdığı geopolitik savaşın mütləq qalibinin olmayacağı da artıq əvvəlcədən məlumdur. Çünki Cənubi Qafqazın lider dövləti olan Azərbaycana nəzarət etmək üçün ABŞ və Qərbin, eləcə də, Rusiyanın əlində elə bir ciddi təsir mexanizmi mövcud deyil. Xüsusilə də, 44 günlük savaşda tam tarixi zəfər Azərbaycanın müstəqil xarici və daxili siyasət yürütmək imkanlarını maksimum səviyyədə artırıb. Və bu baxımdan, Azərbaycanı dünya nəhəngləri üçün müəyyən mənada, artıq əlçatmaz da hesab etmək olar.
Məsələ ondadır ki, “Dağlıq Qarabağ” problemi müstəqillik dövründə Azərbaycana qarşı əsas təzyiq mexanizmi rolunu oynayırdı. Xüsusilə də, ATƏT-in Minsk Qrupunun həmsədrləri – ABŞ, Rusiya və Fransa bu qondarma problemdən rəsmi Bakıya təsir göstərmək məqsədilə, eyni zamanda, Cənubi Qafqazda geopolitik manevrlər etmək üçün istifadə etməyə cəhd göstərirdilər. Və rəsmi Bakı bu problemi həm təməlindən, həm də birdəfəlik həll etməklə, regiondan kənar qüvvələrin Azərbaycana qarşı təsir faktorlarını sıradan çıxartmış oldu.
Ona görə də, ABŞ və Qərbin Rusiya ilə Cənubi Qafqaz uğrunda mübarizəsində əsas ağırlıq mərkəzi məhz Ermənistan üzərində indeksləşdirildi. ABŞ və Qərb Ermənistanda “məxməri inqilab” törətməklə, baş nazir Nikol Paşinyan və onun yaxın ətrafını hakimiyyətə gətirərək, bu ölkədə Rusiya qarşısında müəyyən üstünlük qazanmağa nail oldu. Çünki Paşinyan hakimiyyəti çox tezliklə Ermənistanın hərbi müttəfiqi Rusiyaya xəyanət kursu tutaraq, ABŞ və Qərbin “geopolitik alət”inə çevrilmək məcburiyyəti ilə barışdı. Və belə vəziyyətdə dünya nəhənglərinin regional savaşında demək olar ki, “pat vəziyyəti”nə bərabər balans yaranmış oldu.
Təbii ki, bu situasiyanın nisbətən dəyişməsi üçün daha bir region ölkəsinə nəzarətin ələ keçirilməsinə ehtiyac olmamış deyildi. Azərbaycan əlçatmaz olduğundan balansın pozulmasında istifadə edilə biləcək region ölkəsi kimi geriyə yalnız Gürcüstan qalırdı. Yəni, ABŞ və Qərb Gürcüstana nəzarət edə bilərdisə, Rusiyanın Cənubi Qafqazdan tamamilə sıxışdırılıb, çıxarılması baş tuta bilərdi. Və Qərb Cənubi Qafqazda nisbi üstünlüyü ələ keçirmiş olardı.
Maraqlıdır ki, ABŞ və Qərb bu baxımdan, Gürcüstanda keçirilmiş növbəti parlament seçkilərini əsas siyasi mexanizm olaraq, seçmişdi. Çünki məhz seçkilərdən sonra Gürcüstan əhalisinin müəyyən qisminin etiraz dalğasını təşkil etməklə, bu ölkədə dövlət çevrilişini reallaşdırmaq mümkün ola bilərdi. Əslində, “xarici agentlər” barədə qanunun qəbuluna etirazla gələcək dövlət çevrilişi ilk mərhələdə sınaqdan da keçirilmişdi. Və seçkilərin bitməsindən sonra saxtakarlıq bəhanəsi ilə yeni kütləvi etiraz dalğasının yaradılması əvvəlcədən hazırlanmış planın baş tutmasına imkan verə bilərdi.
Ancaq ABŞ və Qərbin Gürcüstanda növbəti “məxməri inqilab” planı bu dəfə iflasa uğramaq üzrədir. Böyük ehtimalla vaxtilə “qızılgül inqilabı” ilə hakimiyyətə gətirilmiş keçmiş Gürcüstan prezidenti Mixail Saakaşvilinin sonradan başına gətirilənlər hələ unudulmayıb. Hər halda, Mixail Saakaşvilinin hakimiyyəti tərk etdikdən sonra ABŞ və Qərbə qətiyyən lazım olmadığı və onun indi taleyin ümidinə, yəni dəstəksiz buraxılması olduqca ciddi ictimai örnək faktorudur. Və bu, Qərbin planlarında iştirakın olduqca böyük risk olduğunu göstərir.
Düzdür, ABŞ və Qərb seçkisonrası kütləvi etiraz aksiyalarına liderliyi Gürcüstanın Fransa agenti olduğu bildirilən prezidenti Salome Zurabişviliyə həvalə etmişdi. Ancaq paytaxt Tiflisdə keçirilən kütləvi etiraz aksiyalarının iğtişaşlara çevrilmək əvəzinə hər ötən gün daha da zəifləməsi xanım prezidentin verilən tapşırığın öhdəsindən gələ bilmədiyini göstərir. Yəni, belə anlaşılır ki, ABŞ və Qərbin Gürcüstanda “məxməri inqilab” planları pozulmaq üzrədir. Və bu baxımdan, Cənubi Qafqaz uğrunda mübarizədə Gürcüstanın da Ermənistanla yanaşı, “geopolitik alət” kimi istifadə olunması hələlik baş tutmayacaq.
Halbuki, bütün bunları hakimiyyətini qorumağa nail olmuş “Gürcü arzusu” Partiyası üçün ən yaxşı halda, yalnız müvəqqəti siyasi uğur hesab etmək olar. Çünki Gürcüstanın indiki durumunda rəsmi Tiflisin ABŞ və Qərbə, eləcə də, Rusiyaya uzun müddət müqavimət göstərə biləcəyi o qədər də inandırıcı görünmür. Yəni, siyasi böhranla yanaşı, həm də sosial-iqtisadi problemlərlə də qarşılaşan rəsmi Tiflisin əvvəl-axır dünya nəhənglərindən hansınasa təslim olma ehtimalı qətiyyən istisna deyil. Və bu, Qərbin, yaxud Rusiyanın təsir dairəsinə düşməsindən asılı olmayaraq, Gürcüstanın suverenliyinin böyük ölçüdə məhdudlaşaraq, Ermənistan ardınca Cənubi Qafqazda növbəti “geopolitik müstəmləkə”yə çevrilməsi anlamı daşıya bilər.
Maraqlıdır ki, rəsmi Tiflis bu təhlükənin olduqca real olduğunu artıq qəbul etməyə başlayıb. Ona görə də, Gürcüstanın rəsmi dairələri son vaxtlar Azərbaycanla daha yaxın münasibətlər quraraq, strateji tərəfdaşlığa hazır olduqlarını xüsusi olaraq, vurğulayırlar. Belə anlaşılır ki, rəsmi Tiflis Gürcüstanın yaxınlaşan təhlükədən xilası üçün Azərbaycanın dəstəyinə ehtiyac duyduğunu biruzə verir.
Böyük ehtimalla rəsmi Tiflis Azərbaycanla strateji tərəfdaşlığın Türkiyənin tam dəstəyinə yol aça biləcəyini də mütləq nəzərə alır. Həm rəsmi Bakının, həm də Azərbaycanın hərbi müttəfiqi və NATO ölkəsi olan Türkiyənin ortaq dəstəyi indi Gürcüstan üçün taleyüklü xaraker daşıyır. Və bu, o deməkdir ki, Gürcüstanın “geopolitik müstəmləkə”yə çevrilmə təhlükəsindən yayınmaq üçün rəsmi Tiflis Türk İttifaqına sığınmaq variantının ön plana keçirilməsinə məcbur qalıb.
Türkiyənin Montrö Müqaviləsinə uyğun olaraq İstanbul boğazlarını bağlaması Rusiyanın Ukraynanın Odessa, Nikolayev və digər ərazilərini işğal etmək cəhdlərinə mane olub.
Teleqraf.com xəbər verir ki, bunu Ukraynanın Türkiyədəki səfiri Vasili Bodnar deyib.
“Ukraynanın müdafiəsinin əsas mərhələlərindən biri Türkiyə tərəfindən boğazların bağlanması oldu. "Moskva" gəmisini (Qara dənizdə) batırdıq, daha iki rus kreyseri Aralıq dənizində gözləyirdi. Türkiyənin boğazları bağlaması, məncə, Rusiyanın dənizdəki üstünlüyündən istifadə edərək əraziləri ələ keçirməsinə imkan vermədi. Bura Odessa, Nikolayev və Moskvanın planlarına görə dəniz əməliyyatları nəticəsində işğal edilməli olan digər ərazilər daxildir”, - diplomat vurğulayıb.
Bodnar Türkiyənin Ukrayna üçün ciddi nəqliyyat mərkəzinə çevrildiyini də xatırladıb: "İndi orada Ukrayna daşıyıcıları üçün vizasız nəqliyyat marşrutu mövcuddur".
Müharibənin ədalətli sonu Rusiyanın yer üzündən silinməsi olardı.
Teleqraf.com xəbər verir ki, bunu Ukrayna ordusunun taqım komandiri Dmitri Derkaç deyib.
Onun sözlərinə görə, 2022-ci ildə müharibənin əvvəlində mövcud olan xalq birliyi pozulmasaydı, rus ordusu Donetsk vilayətinin bu qədər böyük ərazisini işğal edə bilməzdi:
"Belə olsaydı, ən azı geri çəkilməyə yox, irəliləməyə davam edərdik. İnsan resurslarımız çatmır. Çünki bizə nə qədər silah verilsə də, onu vuran olmasa, heç nə alınmayacaq. Bu, dəqiqdir.”.
Derkaç qeyd edib ki, Ukrayna üçün hansı nəticənin qələbə ola biləcəyinə cavab vermək çox çətindir:
"Qələbə nə olardı? Düzünü desəm, belə bir qələbə görmürəm. Bunun necə bir qələbə olduğunu deyə bilmərəm. Hər şey bitsə və sərhədlərimizi bərpa etsək belə, bu artıq qələbə olmayacaq, çünki çoxlu sayda resurs və insan itirildi, infrastrukturun bir hissəsi dağıdıldı, artıq bunu qələbə adlandırmaq çətindir.
Bəs müharibənin ədalətli sonu necə olardı? Rusiyanı yer üzündən silmək. Bu, mümkün deyil, amma ədalətlidir".
Derkaç vurğulayıb ki, Ukrayna gördüyü işləri davam etdirməli, yəni daim təkmilləşməli və Rusiya ilə mübarizənin başqa yollarını tapmalıdır.
Amerikalı milyarder İlon Mask mümkün üçüncü dünya müharibəsinin risklərinə toxunub və onları Trampın prezidentliyi ilə əlaqələndirib.
Oxu.Az xəbər verir ki, bununla bağlı o, "X" sosial şəbəkəsindəki hesabında qeyri-adi illüstrasiya ilə yazı paylaşıb.
Mask insan beyninin və uçan güllənin təsvir olunduğu iki şəkil paylaşıb. Birinci şəkildə güllə beyinə dəyir, onun altında isə "III dünya müharibəsi" yazılıb. İkinci şəkildə güllə qulağı cızır və beyindən yan keçir, altında isə "Marsın kolonizasiyası" sözləri yazılıb.
Görünür, bu yolla "Tesla" və "SpaceX" şirkətlərinin sahibi ABŞ-nin yeni seçilmiş Prezidenti Donald Trampa sui-qəsd cəhdinə istinad edib. Həmin vaxt siyasətçi qulağından yaralanıb, güllə onun başının bir neçə santimetr yaxınlığından keçib.
Sülh müqaviləsi imzalanacağı təqdirdə İrəvan Bakıya qarşı iddialarından əl çəkəcək.
Bunu Ermənistanın baş naziri Nikol Paşinyan deyib.
"Əgər görsək ki, biz həqiqətən sülhə nail oluruq və müqavilə imzalayırıq, o zaman hesab edirəm ki, biz belə bir sövdələşmə edə bilərik. Bu o deməkdir ki, keçmiş hadisələrə görə heç kim bir-birini məhkəməyə verməməlidir və biz qarşılıqlı olaraq iddialardan imtina etməliyik", - Paşinyan bildirib.
Türkiyə olaraq İraq türkmənlərinin yanındayıq, onların hüquq və mənafelərini qoruyuruq.
Belə bir bəyanatla Türkiyə Respublikası Xarici İşlər Nazirliyinin sözçüsü Öncü Keçeli İraqda aparılan siyahıyaalma kontekstində Kərkükdə türkmənlərə qarşı yol verdiyi yanlış siyasəti şərh edəkən çıxış edib.
Türkiyə XİN-in açıqlamasında deyilir ki,kürdlərin türkmənlərin sıx yaşadığı Kərkükə köçürülərək süni şəkildə demoqrafik dəyişikliyə yol verilir və bu da yolverilməz haldır.
Açıqlamada qeyd olunub ki, kürdlərin kütləvi şəkildə Kərkükə köçürülərək siyahıyaalmada onların Kəkrük əhalisi kimi göstərilməsi, İraq türkmənləri və ərəbləri arasında haqlı olaraq narahatlığa səbəb olub.
"Kərkükdə sıx əhalisi olan türkmən soydaşlarımızın əmin-amanlığı və təhlükəsizliyi bu ölkə ilə ikitərəfli əlaqələrimizdə əsas prioritetlərimizdən biridir.
İraq səlahiyyətlilərindən siyahıyaalma çərçivəsində baş verən bu son hadisələrə görə son əsrdə saysız-hesabsız qırğın və zülmə məruz qalan türkmən soydaşlarımızın bir daha qurban getməsinə imkan verməməsini gözləyirik.
Türkiyə olaraq bütün qurumlarımızla İraq türkmənlərinin yanındayıq, onların hüquq və mənafelərini qoruyuruq", - XİN sözçüsü bildirib.
Britaniya hökuməti İsrailin baş naziri Benyamin Netanyahunu ölkəyə gələrsə Beynəlxalq Cinayət Məhkəməsinin orderi əsasında həbs edə bilər.
Bunu Britaniya baş nazirinin mətbuat katibi jurnalistlərin Netanyahunun Böyük Britaniyaya səfər edəcəyi təqdirdə həbs edilib-edilməyəcəyini soruşarkən deyib.
Britaniya baş nazirinin mətbuat katibinin sözlərinə görə, hipotetik ssenarilər haqqında şərh vermək istəməsə də, hökumət qanun və qanuni öhdəliklərini yerinə yetirəcək.