![]() |
|
Təhsil Nazirliyinin rəsmi saytının sual-cavab bölümünə sorğu ünvanlayan xaricdə təhsil almaq istəyən gəncə verdiyi cavab sosial şəbəkədə müzakirələrə səbəb olub.
Axar.az xəbər verir ki, nazirliyə ən çox verilən suallar arasında birinci yerdə xaricdə təhsil, xarici universitetlərin diplomlarının ölkəmizdə tanınması ilə bağlı olub.
Gənclərdən biri Təhsil Nazirliyinə hansı xarici ali təhsil müəssisələri tərəfindən verilən diplomların Azərbaycanda tanındığı ilə bağlı sorğu ünvanlayıb. Nazirliyin cavabı isə təxminən belə olub: “Siz oxuyub gəlin, daha sonra diplomunuza baxıb deyə bilərik ki, Azərbaycanda tanınır, ya yox”.
Cavabdan sitat: “Nazirlər Kabinetinin 13 may 2003-cü il tarixində təsdiq edilmiş “Xarici dövlətlərin ali təhsil sahəsində ixtisasların tanınması və ekvivalentliyinin müəyyən edilməsi Qaydaları”na uyğun olaraq ekspertiza keçirilərək həmin diplom üzrə aldığınız ali təhsil ixtisasının ölkə ərazisində tanınıb-tanınmaması barədə qərar qəbul olunur”.
Problemi gündəmə gətirən jurnalist Əli Əhmədov bildirib ki, bu, təhsil almaq arzusu olan bir gəncin olduqca əhəmiyyətli sualına nazirliyin “gələrsən baxarıq” yanaşmasıdır:
“Nazirlik hansı universiteti, onun təhsilini, diplomunu etibarsız, yararsız sayırsa, araşdırmalı və bir siyahı müəyyən etməlidir ki, bu universitetlərin diplomlarını tanımırıq. Yəni ucuzluğuna, imtahansız olduğuna görə gedib aldanmayın”.
Hazırda xarici ölkələrdə təhsil alan azərbaycanlı tələbələrin sayının 40 minə yaxın olduğunu bildirən təhsil eksperti Kamran Əsədov qeyd edib ki, xarici universitetlərdən hansının diplomunun Azərbaycanda tanınıb-tanınmaması ilə bağlı nazirliyin siyahısı yoxdur:
“Hazırda xaricdə təhsil alan tələbələrdən 15 mini Türkiyədə, 20 mindən çoxu Rusiya, Ukrayna, Gürcüstan universitetlərində təhsil alır.
Xarici ölkələrdə təhsil almaq üçün gedənləri əsasən bir neçə qrupa bölmək olar. Onlardan biri Dövlət İmtahan Mərkəzi tərəfindən keçrilən qəbul imtahanlarında topladıqları ballar burda ali məktəblərə qəbul olmağa imkan verməyənlərdir ki, bunların sayı hədsiz dərəcədə çoxdur.
İkinci kateqoriyanı o şəxslər təşkil edir ki, onlar Azərbaycanda ali məktəblərə qəbul olurlar, amma aldıqları təhsil onları qane etmir. Ona görə də daha yüksək səviyyədə təhsil almaq üçün xarici ölkələrə üz tuturlar.
Müəyyən şəxslər də var ki, ali təhsil almaq istəyir, amma Azərbaycanda təhsil haqları yüksək olduğu üçün daha ucuz təhsilhaqqı olan ölkələrə gedirlər.
Əslində Ukrayna, Gürcüstan kimi ölkələrin bəzi universitetlərinin diplomunun Azərbaycanda tanınmaması çox normaldır. Çünki Ukraynada və bir neçə başqa ölkədə elə universitetlər var ki, ora Azərbaycanda ali məktəblərə qəbul imtahanı zamanı 12 bal toplamış insanlar sadəcə attestatın surətini təqdim etməklə qəbul olurlar. Təhsil haqqını ödəyirlər və bir çox halda 4 il bakalavr pilləsində, 2 il magistratura pilləsində cəmi bir neçə dəfə universitetdə olurlar, amma nəticədə diplom da alırlar. Bu diplomların tanınması, sadəcə təhsil haqqı ödəmək və bir neçə dəfə universitetdə görünməklə həmin şəxslərin həmin sahələr üzrə mütəxəssis olmaqlarını təsdiq etmək deməkdir. Bu isə yüksək bal toplamış, illərlə universitet auditoriyalarında, kitabxanalarında dərs oxumuş, müxtəlif bilik və bacarıqlar əldə etmiş şəxslərə qarşı haqsızlıq olardı. Bu baxımdan, bəzi universitetlərin diplomlarının tanınmaması normaldır və bunu gənclərin xaricdə təhsili üçün maneə adlandırmaq doğru olmaz”.
Eksperti bildirib ki, şəxsin xaricdə təhsil aldığı ali məktəblə Təhsil Nazirliyi arasında müqavilə olmalıdır. Əgər müvafiq müqavilə olmasa, həmin diplom tanınmayacaq:
“Azərbaycanda məzun olan tələbələrin 7 mini Dağıstan universitetlərinə gedib. Dağıstan universitetləri isə birmənalı olaraq tanınmır. Yəni 4 il müddətində həmin təhsil mərkəzinə getmədən diplom alaraq o diplomun ölkədə tanınmasını istəmək absurd məsələdir. Bu baxımdan tövsiyyə edirik ki, xaricdə təhsil almaqla bağlı əhali ciddi məlumatlandırılsın.
Birincisi, baxsınlar ki, övladlarının təhsil alacağı universitet nostirifkasiya.edu.az saytında Təhsil Nazirliyi tərəfindən tanınırmı?! İkincisi, həmin universitetlərin fəaliyyət göstərməsi üçün icazəsi, lisenziyası varmı?”
Bakıda yeni tikilən binalarda ən ucuz və ən bahalı mənzillərin qiymətləri məlum olub.
Bu gün Bakı şəhəri ərazisində ölkənin tikinti şirkətlərinin təklif etdiyi 193 yaşayış kompleksində mənzil almaq olar.
2018-ci ilin sentyabr ayının nəticələrinə görə Bakı şəhərində yeni tikili binalarda kvadrat metrin orta qiyməti 1545 AZN təşkil edir.
Əgər yeni tikili binaların qiymətini rayonlar üzrə müqayisə etsək, ən bahalı rayon Səbail rayonudur ki, burada orta hesabla bir kvadrat metrin qiyməti 2950 AZN təşkil edir, yaşayış üçün ən ucuz sektor isə Abşeron rayonudur ki, burada da orta hesabla bir kvadrat metrin qiyməti 900 AZN təşkil edir.
Bakı şəhərinin rayonları üzrə mənzillərin orta qiyməti:
Səbail |
2950 AZN/m2 |
Nəsimi |
2050 AZN/m2 |
Xətai |
2030 AZN/m2 |
Nərimanov |
1900 AZN/m2 |
Yasamal |
1760 AZN/m2 |
Nizami |
1420 AZN/m2 |
Binəqədi |
1380 AZN/m2 |
Sabunçu |
1300 AZN/m2 |
Qaradağ |
1180 AZN/m2 |
Xəzər |
1050 AZN/m2 |
Suraxanı |
980 AZN/m2 |
Abşeron |
900 AZN/m2 |
Əgər inşa edilmiş evlər və hələ də inşaatda olan mənzillərin dəyərini müqayisə etsək, hazır mənzillərin qiyməti daha yüksək olacaq.
Artıq təhvil verilmiş hazır yeni mənzildə kvadrat metrin qiyməti 1580 AZN təşkil edəcək. Bakının 2018-ci ildə, təhvil verilmiş, həmçinin bu ilin sonuna tikintisi başa çatmaqda olan yeni tikili binalarında orta qiymət 1430 AZN təşkil edir. İnşa olunan və 2019-cı ildə başa çatacaq yaşayış komplekslərində orta qiymət 1370 AZN-ə bərabərdir.
Qeyd edək ki, araşdırma “Flatfy” şirkəti tərəfindən aparılıb.
“Qualcomm” şirkəti internetin sürətini saniyədə 10 Qbit olmaqla rekord həddə çatdırmağa imkan verəcək çiplər ailəsini istifadəyə verib.
bu, yeni simsiz internet standartının başlanğıcı olacaq, lakin onlar internet səhifələrinə tipik şəkildə baxılmanın sürətinin artırılması üçün istifadə edilməyəcək.
Bildirilir ki, söhbət hazırda qüvvədə olan “Wi-Fi 5” və ya ondan sonrakı “Wi-Fi 6” standartlı qurğulardan getmir. Çiplər məlumatların əlavə diapazondan istifadə etməklə qısa məsafəyə göndərilməsi üçün nəzərdə tutulub. Hazırda onun sürəti 7 Qbit/saniyə təşkil edir, lakin yeni çiplər vasitəsilə sürəti 20 Qbit/saniyəyədək artırmaq mümkün olacaq.
“Qualcomm” mühəndislərinin sözlərinə görə, çiplər sürətin iki dəfə, eləcə də məlumatların ötürülmə radiusunu hazırkı 10 metrdən 100 metrədək artırılmasını təmin edən “WiGig” texnologiyası ilə modifikasiya ediləcək. Siqnalın yayılma xüsusiyyətlərinə görə texnologiya məlumatların daha sürətli ötürülməsinə ehtiyac duyan istifadəçilər üçün nəzərdə tutulacaq.
“WiGig” istifadəçinin diqqətində “5G” texnologiyası ilə rəqabət aparacaq. Onlar funksiyalarına görə bir-birinə oxşardır və məhdud məsafədə informasiyanın daha sürətli ötürülməsini təklif edirlər. Lakin yeni texnologiya bir sıra çatışmazlıqlara da malikdir. Məsələn, siqnalın divardan çətinliklə keçməsi. Buna baxmayaraq mühəndislər tərəfindən “WiGig” texnologiyasının məhdudiyyət az olan hallarda və paylayıcı və qəbuledici qurğu bir-birindən ayrı olmadıqda istifadə edilməsi planlaşdırılır.
Xəzər dənizində Aktaudan Bakıya gələn gəminin heyət üzvləri arasında kütləvi zəhərlənmə olub.
Dövlət Sərhəd Xidmətindən “Qafqazinfo”ya daxil olan xəbərə görə, Dövlət Dəniz Agentliyindən Xəzər dənizinin mərkəzi hissəsində, Pirallahı adasından 21 mil məsafədə Aktau-Bakı marşrutu üzrə hərəkət edən İran İslam Respublikasına məxsus “Nazmehr” quru yük gəmisində heyət üzvlərinin ilkin fərziyyəyə görə zəhərlənməsi ilə əlaqədar təxirəsalınmaz köməklik istənilməsi barədə Dövlət Sərhəd Xidmətinin Sahil Mühafizısinə məlumat daxil olub.
Məlumat əsasında Dövlət Sərhəd Xidmətinin Sahil Mühafizəsinin sərhəd gözətçi gəmisi dənizdə üzmə şəraitinin əlverişsiz olmasına baxmayaraq dərhal həmin istiqamətə göndərilib.
Sərhəd gözətçi gəmisi 00:30 radələrində “Nazmehr” yük gəmisinə yan alaraq 7 nəfər ağır vəziyyətdə olan heyət üzvünü qəbul edib ilkin tibbi yardım göstərməklə sahilə Abşeron limanı istiqamətində hərəkət edib. Xəstələrə təcili tibbi yardımın göstərilməsi üçün limana həkim briqadaları cəlb olunub.
Oğurluqda təqsirli bilinən Vurğun İbrahimov, Emin Şirinov, Vurğun Həsənov və Yunus İsmayılovun cinayət işi üzrə məhkəmə prosesi keçirilib.
Axar.az xəbər verir ki, Bakı Ağır Cinayətlər Məhkəməsində hakim Əfqan Hacıyevin sədrliyi ilə baş tutan prosesdə hökm oxunub.
Vurğun İbrahimov 8 il, Emin Şirinov 6 il 6 ay, Vurğun Həsənov 3 il, Yunus İsmayılov isə 2 il müddətinə azadlıqdan məhrum ediliblər.
İttihama görə, Vurğun İbrahimov, Emin Şirinov, Vurğun Həsənov və Yunus İsmayılov Bakı şəhər Nəsimi rayon ərazisində yerləşən evlərdən oğurluq etməkdə təqsirli biliniblər.
Onlar Aydın Mövlayevin qızıl-zinət əşyaları da daxil olmaqla ümumilikdə 51 min manat, İlham Həsənovla Türkan İbadovanın 9470 manat, Gülbikə Əhmədovanın 6890 manat, İqbal Xəlilovun 3850 manat, Rauf Əliyevin 5300 manat və Nərgiz Abdullayevanın isə 2050 manat pulunu oğurlayıb.
Xatırladaq ki, Aydın Mövlayev Kənd Təsərrüfatı Nazirliyi (KTN) yanında Aqrolizinq ASC-nin rəhbəri Seymur Mövlayevin atasıdır.
Seymur Mövlayev bu il may ayının əvvəlində nazir İnam Kərimovun əmri ilə Aqrolizinq ASC-yə sədr təyin edilib.
Badamdar qəsəbəsində baş verən sürüşmə zonasından yeni xəbər var.
Ekologiya və Təbii Sərvətlər Nazirliyinin mütəxəssisi Əziz Qaralov bildirib ki, bu gün saat 09:00-a kimi aparılan monitorinqin nəticələrinə əsasən hasar divarları idtiqamətində uçqunların artımı qeydə alınıb.
Evlərin divarlarına qoyulmuş mayaklarda dəyişiklik yoxdur. Torpaq qatı yola doğru gözlə görünəcək dərəcədə irəliləyib. Ərazidə ümumi stabil gərginlik qalmaqdadir.
Prezident İlham Əliyev “Cinayət yolu ilə əldə edilmiş pul vəsaitlərinin və ya digər əmlakın leqallaşdırılmasına və terrorçuluğun maliyyələşdirilməsinə qarşı mübarizə haqqında” Azərbaycan Respublikasının Qanununda dəyişiklik edilməsi barədə” Azərbaycan Respublikasının 2018-ci il 12 oktyabr tarixli 1273-VQD nömrəli Qanununun tətbiqi və “Cinayət yolu ilə əldə edilmiş pul vəsaitlərinin və ya digər əmlakın leqallaşdırılmasına və terrorçuluğun maliyyələşdirilməsinə qarşı mübarizə haqqında” Azərbaycan Respublikası Qanununun tətbiq edilməsi barədə” Azərbaycan Respublikası Prezidentinin 2009-cu il 23 fevral tarixli 66 nömrəli fərmanında dəyişiklik edilməsi haqqında fərman imzalayıb.
Nazirlər Kabinetinə Azərbaycan Respublikası qanunlarının və Azərbaycan Respublikası Prezidentinin aktlarının “Cinayət yolu ilə əldə edilmiş pul vəsaitlərinin və ya digər əmlakın leqallaşdırılmasına və terrorçuluğun maliyyələşdirilməsinə qarşı mübarizə haqqında” Azərbaycan Respublikasının Qanununda dəyişiklik edilməsi barədə” qanuna uyğunlaşdırılması ilə bağlı təkliflərini üç ay müddətində hazırlayıb Azərbaycan Prezidentinə təqdim etmək; Nazirlər Kabinetinin normativ hüquqi aktlarının həmin qanuna uyğunlaşdırılmasını üç ay müddətində təmin edib Azərbaycan Prezidentinə məlumat vermək; mərkəzi icra hakimiyyəti orqanlarının normativ hüquqi aktlarının həmin qanuna uyğunlaşdırılmasını nəzarətdə saxlamaq və bunun icrası barədə beş ay müddətində Azərbaycan Prezidentinə məlumat vermək; həmin qanundan irəli gələn digər məsələləri həll etmək tapşırılıb.
Ədliyyə Nazirliyi mərkəzi icra hakimiyyəti orqanlarının normativ hüquqi aktlarının və normativ xarakterli aktların “Cinayət yolu ilə əldə edilmiş pul vəsaitlərinin və ya digər əmlakın leqallaşdırılmasına və terrorçuluğun maliyyələşdirilməsinə qarşı mübarizə haqqında” Azərbaycan Respublikasının Qanununda dəyişiklik edilməsi barədə” qanuna uyğunlaşdırılmasını təmin edib Nazirlər Kabinetinə məlumat verəcək.
Dəyişikliyə əsasən, fərmana aşağıdakı məzmunda 4.13-cü bənd əlavə edilir:
“4.13. həmin Qanunun 17.5-ci maddəsinin ikinci cümləsində nəzərdə tutulmuş müvafiq icra hakimiyyəti orqanının səlahiyyətlərini Azərbaycan Respublikasının Daxili İşlər Nazirliyi, Ədliyyə Nazirliyi, Vergilər Nazirliyi, Fövqəladə Hallar Nazirliyi, Dövlət Gömrük Komitəsi, Dövlət Təhlükəsizliyi Xidməti və Dövlət Sərhəd Xidməti həyata keçirirlər.”.
Həmçinin qanunun 1.0.4-cü maddəsində “219-1, 226, 227, 277, 278, 279, 280, 282 və 283-1-ci maddələrində nəzərdə tutulmuş əməllərin şəxs və ya qrup (dəstə, təşkilat) tərəfindən hazırlanmasının, təşkil olunmasının və ya törədilməsinin maliyyələşdirilməsi üçün, yaxud göstərilən cinayətlərin törədilməsi məqsədilə şəxsin və ya həmin məqsədlə yaradılan qrupun (dəstənin, təşkilatın) təmin edilməsi” sözləri “219-1, 219-2, 226, 227, 227-1, 270-1, 277, 278, 279, 280, 282 və 283-1-ci maddələrində nəzərdə tutulmuş əməllərin şəxs və ya qrup (dəstə, təşkilat) tərəfindən hazırlanmasının, təşkil olunmasının və ya törədilməsinin, yaxud terrorçunun və ya terrorçu qrupun (dəstənin, təşkilatın) maliyyələşdirilməsi” sözləri ilə əvəz edilir.
Aşağıdakı məzmunda 4.2-ci maddə əlavə edilir:
“4.2. Cinayətkarlarla əlaqəli olan şəxslər monitorinq iştirakçılarında mühüm iştirak payına sahib və ya belə payın benefisiar mülkiyyətçisi ola, habelə monitorinq iştirakçılarında idarəetmə funksiyalarını yerinə yetirə, o cümlədən idarə heyətində, müşahidə şurasında və ya audit komitəsində vəzifə tuta bilməzlər.”.
Bundan başqa, aşağıdakı məzmunda 6.6-cı maddə əlavə edilir:
“6.6. Nəzarət orqanları tərəfindən monitorinq iştirakçıları və monitorinqdə iştirak edən digər şəxslərə münasibətdə cinayət yolu ilə əldə edilmiş pul vəsaitlərinin və ya digər əmlakın leqallaşdırılması, terrorçuluğun maliyyələşdirilməsi riskləri ildə bir dəfə qiymətləndirilir və nəzarət yoxlamaları müəyyən edilmiş risklərə uyğun olaraq aparılır.”.
Aşağıdakı məzmunda 7.4-1-ci maddə əlavə edilir:
“7.4-1. Monitorinq iştirakçıları və monitorinqdə iştirak edən digər şəxslər bu Qanunun 7.3-cü maddəsində nəzərdə tutulan dövlətlərin (ərazilərin) vətəndaşları ilə, qeydiyyat, yaşayış və ya əsas fəaliyyət yeri həmin dövlətdə (ərazidə) olan şəxslərlə işgüzar münasibətlərə və əməliyyatlara, o cümlədən ilkin çıxış və ya təyinat məntəqəsinin həmin dövlətin (ərazinin) olduğu pul vəsaitlərinin istənilən şəxs tərəfindən qəbul olunması və köçürülməsi ilə bağlı əməliyyatlara xüsusi diqqət yetirməli, bu cür əməliyyatların açıq-aşkar iqtisadi və ya qanuni məqsədi olmadıqda onların təyinatını və mahiyyətini aydınlaşdırmalı və bununla əlaqədar yazılı təhlil hesabatı tərtib etməlidirlər. Tələb olunduğu təqdirdə, hesabat qanunla müəyyən edilmiş qaydada maliyyə monitorinqi orqanına, auditora, cinayət təqibini həyata keçirən orqanlara və ya nəzarət orqanlarına təqdim edilməlidir.”.
17.5-ci maddəyə aşağıdakı məzmunda ikinci cümlə əlavə edilir:
“Maliyyə monitorinqi orqanı aparılmış təhlil nəticəsində həyata keçirilən əməliyyatlarda digər cinayətlərin əlamətlərini müəyyən etdikdə, müvafiq məlumatları istintaq aidiyyəti üzrə cinayət təqibini həyata keçirən müvafiq icra hakimiyyəti orqanlarına və ya prokurorluq orqanlarına göndərir.”.
Prezident İlham Əliyev Azərbaycan Milli Elmlər Akademiyasının (AMEA) həqiqi və müxbir üzvlərinin aylıq rütbə maaşlarının artırılması haqqında sərəncam imzalayıb.
sərəncama əsasən, 2018-ci il noyabrın 1-dən AMEA-nın həqiqi üzvlərinin aylıq rütbə maaşları 2000 manat, müxbir üzvlərinin aylıq rütbə maaşları isə 1200 manat məbləğində müəyyən edilib.
Nazirlər Kabinetinə bu sərəncamdan irəli gələn məsələlərin həll edilməsi tapşırılıb.